Salamo
Thatraqane la atre jumi traem. Masekil* ne la itre nekö i Kora.
44 Akötresieti fe, drenge hë la itre hnangenyë hun,
La hna qaja hnene la itre qaaqaa hun,
Göne la itre huliwa hnei nyipëti hna kuca ngöne lo ijine i angatr ekö,
Ene lo itre drai hnapan.
2 Hnei nyipëti hna upe trije la itre nöj hnene la ime i nyipë
Matre amë pena la itre qaaqaa hun.
Hnei nyipëti hna waja fica la itre nöj me helë angatr.
3 Tha hnene kö la itre taua i angatr matre thapa pi angatr la nöj,
Nge tha hna jëne kö la iwanakoime i angatr matre huune pi angatr.
Hnene pe la ime maca i nyipë, memine la hnatrapaime i nyipë,
Memine la lai ne la qëmeke i nyipë, ke hnei nyipëti hna kepe angatr.
4 Akötresieti fe, nyipëti la Joxung;
Aijijë Iakobo jë troa huun.*
5 Hnene la mene i nyipë, matre eahuni a ahuëne la itre ithupëjia me eahun;
Jëne la ëje i nyipë, tro huni a waja trane la itre ka cile koi hun.
6 Ke tha eni kö a mejiune kowe la pehnang,
Nge thatreine kö la tauang troa amele ni.
7 Nyipëti hi la atre amele huni qa ngöne la itre ithupëjia,
Nge nyipëti a thaipiëne la itre ka methinë hun.
8 Eahuni a ajan troa atrunyi Akötresie ngöne la drai, jëne la itre nyima,
Me atrune la ëje i nyipë, uti hë epine palua. (Sela)
9 Ngo ame enehila, ase hë nyipëti nuetriji hun me thaipië hun,
Nge tha nyipëti hmaca kö a ce tro memine la itre trongene isi hun.
10 Nyipëti a abëekë hun qëmekene la itre ithupëjia;
Itre ka methinë hun a xome la itre hnei angatr hna ajan.
11 Hnei nyipëti hna nue hun matre heji hun tune la itre mamoe;
Hnei nyipëti hna isa ije huni nyipine la itre nöj.
12 Nyipëti a salemëne la nöje i nyipë kösë pëkö thupen;
Pëkö hnei nyipëti hna kapa qa ngön.
13 Nyipëti a ahmahmanyi hun qëmekene la itre ka lapa easenyi hun,
Nyipëti a kuca matre troa hnyimasai hun me qenahmo hun hnene la itre ka lapa xötreithi hun.
14 Nyipëti a ami hun nyipine la itre nöj, matre methinë* hun,
Nge angatr a nangenang e troa goeë hun.
15 Ngöne la drai, drenge hi ni la kola thaipië ni,
Nge kola lapane la hning hnei hmahma,
16 Pine angatre hnyimasai ni me qaqa ni,
Nge pine la ithupëjia ka thele troa të koi ni.
17 Hna traqa asë lai koi hun, ngacama tha hne huni kö hna thëthëhmi nyipë,
Nge tha hne huni kö hna sasaithe la isisinyikeu i nyipë.
18 Tha ujë kö la itre hni hun;
Tha jea kö la itre thupaca hun qa ngöne la gojeny i nyipë.
19 Ngo hnei nyipëti hna waja fici hun ngöne la hnë lapa ne la itre kuli wael;
Hnei nyipëti hna heetrë hun hnene la melöhlem.
20 Maine hne huni hna thëthëhmine la ëjene la Akötresi hun
Maine hne huni pena hna xeji ime draië troa thithi kowe la haze trenyiwa,
21 Hapeu, tha tro kö Akötresieti lai a öhn?
Atre asë hi nyidrëti la hne së hna lapa fë e kuhu hni.
22 Pine laka, eahuni a nyihlue i nyipë, kolo pala hi a humuthi hun;
Kola goeë hun ceitu me itre mamoe nyine troa humuth.
23 Iehova fe, mejë jë! Hnauëne laka, nyipëti pala hi a meköl?
Hlë jë! Nge the nuetriji huni kö epine palua.
24 Hnauëne laka, nyipëti a xele ma wai ni?
Hnauëne laka, thëthëhmine hë nyipëti la akötre hun me aqane axösisi hun?
25 Ke hna triji hun ngöne la xaxau;
Hna amekölene la itre ngönetrei hun e kuhu hnadro.
26 Mejë jë, ke nyipëti la atre amele hun!
Amele* huni jë pine la ihnimi nyipici i nyipë.