Nahuma
3 Ekölöhini la traon ka ihumuth!
Ase hë haöthi angeic hnei iaö me atrekënö.
Ka hetre tha i angeic pala hi!
2 Kola keciqa la wameuc nge kola kuqa la itre wiil,
Kola nyenyape la hos me sesë la ikariota.
3 Hetre ka ti hos, me taua ka mel, me jo ka melemel,
Ala nyimu la hna humuth, nge hna iatëkeune la itre ka mec
Thatreine kö troa e la etrune la itre ka mec.
Kolo pala hi a wali së hnene la itre ngönetrei ka mec.
4 Hna traqa lai pine la itre huliwa ka sis ne la föe ne gojeny:
Ka wesiwes me mingöming angeic, nge maseta ne kuci iöni,
Angeic a tra thethine la itre nöj jëne la hna nyi föe ne gojeny, me tra thethine la itre fami jëne la kuci iöni.
5 “Tro ni a ujë koi ö,*” öni Iehova joxu ne la itre trongene isi e hnengödrai,
“Tro ni a xejë draië la iheetre i ö me amë hune la he i ö;
Nge tro ni a amamane kowe la itre nöj la ngönetrei i ö ka xöe,
Me kowe la itre baselaia, la ewekë i ö nyine hmahman.
6 Tro ni a trije koi ö la itre salite
Nge tro ni a kuca matre troa methinë eö;
Eje hi, tro ni a ahmahmanyi ö qëmekei nöjei atr.
7 Ame la itre ka troa öhnyi ö, ke tro angatr a kötre eö me hape:
‘Ase hë lep apatrenyi Nineve!
Drei la ka troa treije pi angeic?’
Troa öhne ekaa la itre ka akeukawanyi ö?
8 Ka sisitria kö eö hui Noamona,* lo ka lapa ezine la itre jë i tim ne la hneopegejë Nil?
Hna xötreithi angeic hnene la itre tim;
Hnagejë la trengamo i angeic, nge hnagejë la ihage i angeic.
9 Ka pë ifego la trengecatr hna hamë angeic hnei Aithiope me Aigupito.
Nge hna xatua angeic* hnei Futa me angetre Lubi.
10 Ame pe, hna kötre sai angeice fe;
Hna xomi angeic kowe la ketre nöj.
Ngazo la aqane humuth la itre nekö i angeic ngöne la itre hna ijejea.*
Hna uthidrönegötiëne la itre he ne nöje i angeic,
Nge hna othe la itre atr ka tru i angeic.
11 Tro fe eö a hane hnaitö;
Tro hë eö a zae.
Tro eö a thele hnë zae pine la ithupëjia.
12 Ceitu la itre ihag atraqatre i ö me itre iwacua hna thipin hnei itre pane wen;
Ame la kola jumejum la iwacua, kola mala la itre wen ngöne la që ne la itre ka xen.
13 Goeën! Ceitune hi la itre soc nyipi ö me itre föe.
Tro ha fe angangane la itre qëhnelö ne la nöje i ö kowe la itre ithupëjia.
Tro ha dreuthetrij la itre agö nyine acatrei qëhnelö.
14 Jöe timi jë qëmekene troa cil xötreithi ö!
Acatrene jë la itre hna eköhagen.
Uti pi ngöne la trëtr nge wajawaja jë la dro ka fedr;
Xome pi la nyine xupi* birik.
15 Goi ame fe e cili, tro la eë a dreuthetriji ö.
Tro la taua a apatrenyi ö.
Tro ej a xeni ö tune la aqane xuj hnene la wanak ne sipa.
Akökötrene jë la etru i ö tune la itre wanak ne sipa!
Tune la itre sipa ka nyimutre!
16 Hnei ö hna atiqane la itre ka saleme i ö tune la itre wëtresij e hnengödrai.
Kolo ha unene me sesë lo wanak ne sipa.
17 Ceitu la itretre thup i ö me itre sipa,
Nge ceitu la itre tane soce i ö me iume sipa.
Nyudren a zae hnötr ngöne la hna axö öni,
Ngo ame hë la kola jö, ume ej a sesë;
Nge pëkö ka atre la hmeku i nyudren.
18 Joxu ne Asuria fe, kola fefenedrem la itre atre thupë mamoe i ö;
Nge itre he ne nöje i ö a lapa ngöne la itre uma i angatr.
Hna aijene la nöje i ö hune la itre wetr,
Nge pëkö ka acasi angatr.
19 Pëkö nyin la akötre i ö.
Thatreine kö troa meu la kakötre i ö.
Tro asë hi a xexe hnene la itre ka drei nuvel göi ö;
Ke drei pe kö la ka tha akötr pine la aqane iaxösisi ö?”