Ieremia
9 Ekölöhini! Maine ceitune ju la heng me qeqe ne tim,
Maine ceitune ju la luemekeng me tim ka cua fë trenge timidra!
Tro hë ni a treije pin e lai me jidr
Lo itre hna humuth ngöne la nöjeng.
2 Ekölöhini! Maine atre ju ni ka hape, hetre hnë mano ngöne la hnapapa kowe la itre ka tro!
Tro hë ni a trotrije la nöjeng me ananyi angatr,
Ke itre ka nyixetë asë hi angatr,
Nge ume ka iaö.
3 Ceitune la thineme i angatr me tane pehna hna hul, matre huje la itre trengathoi;
Tiqa ha la nöj hnei iaö, nge pëhë ka mele nyipici.
“Ngazo catre hë la aqane ujë i angatr,
Nge tha nyipiewekë ni hë hnei angatr,” öni Iehova.
4 “Wange pala kö la itre sinee i epun,
Nge the mejiune kö koi ketre, ngacama trejine ju hë me epun.
Ke ka iaö la trejin,
Nge ka silitrengathoi la sinee.
5 Angatr a isa atrekënöne la itre sipu sinee i angatr,
Nge pëkö ka qaja la nyipici.
Hnei angatr hna inine la thineme i angatr troa qeje trengathoi.
Hmanono hë angatr hna kuca la ngazo.
6 Eö a mele nyipine la iaö.
Pine la hnei angatr hna iaö, xele hë angatr ma atrepengöi eni,” öni Iehova.
7 Celë hi matre, hane hi la hna qaja hnei Iehova joxu ne la itre trongene isi e hnengödrai:
“Tro ni a ahmunyi angatr hnei eë, matre wange la elolo i angatr,
Ke pëhë xaa nyine tro ni a kuca memine la nekö jajinyi ne la nöjeng!
8 Ceitune la thineme i angatr me ane pehna hna mecin ka qeje iaö.
Hnene la që i angeic, ketre trahmanyi a qeje tingeting koi ketre,
Ngo ame ngöne la mekuna i angeic, angeic pe a tratheth.”*
9 “Hapeu, tha tro kö ni a ihnyingë me angatr pine lai?” öni Iehova.
“Tha hnëqange kö troa të kowe la nöje ka ujë tun?
10 Tro ni a treije me latresi pine la itre wetr
Nge tro ni a thinge la nyima ne latresi, pine la itre hna axö öni ngöne la hnënge hnitr,
Ke ase hë manith, nge pëhë atr ka cili thenge,
Tha drenge hë la mejene la itre öni.
Kötre hë la itre waco me itre öni wael; patre hë itre ej.
11 Tro ni a kuca matre tro Ierusalema a tra etë, hnë zae ne la itre kuli wael,
Nge tro ni a kuca matre tro la itre traon e Iudra a ketre götran hna nuetrij, me pë atren.
12 Drei la ka inamacan matre trotrohnine la ewekë celë?
Maine hnene la që i Iehova hna ithanata koi angeic, loi e tro angeic a ewekë!
Hnauëne laka, pëhë mel ngöne la nöj?
Hnauëne laka, hna dreuthe ej tune la hnapapa,
Matre pëhë atr ka tro e cili?”
13 Hnei Iehova hna sa me hape: “Ke hnei angatr hna nuetrije la wathebo* hnenge hna hamë angatr, me tha metrötrën ej, me tha drengethenge ni. 14 Ngo hnei angatre pe hna catre fë mekun, me kei thenge la itre aja* i angatr. Hnei angatre hna atrune la itre hnasaatr i Baala, tune lo aqane ini angatr hnei itre keme i angatr. 15 Matre hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tro ni a thuane la nöje celë hnei feja ka haitr, me thue ime i angatre tim hna apoizinën. 16 Tro ni a aije angatr nyipine la itre nöj hnei angatr me itre qaaqaa i angatr hna thatre. Nge tro ni a upe la taua troa weje huzu angatr uti hë la troa humuthi angatr asë.’
17 Hane hi la hna qaja hnei Iehova joxu ne la itre trongene isi e hnengödrai:
‘Huliwa inamacane pi.
Hëne jë la itre föe ka thinge la itre nyima ne kele wezipo,
Nge hëne jë fe la itre föe hna nyithupen troa treij,
18 Loi e tro angatr a canga traqa me treije koi së,
Matre tro fe a xölaxöla la trenge timidra së
Me neni la tim qa ngöne la luemeke së.
19 Ke drenge hë huni la mejene treij qa Ziona:
“Tha aqane akötre kö hun!
Tru la hmahma hun!
Eje hi, hne huni hna trotrije la nöj, nge hnei angatr hna thëtrije la itre uma hun.”
20 Epuni fe, itre föe, drenge ju la trengewekë i Iehova.
Loi e tro la lue hnangenyë i epun a trotrohnine la trengewekë qa ngöne la që i nyidrë.
Inine jë la nyima ne latresi cili kowe la itre nekö i epuni jajiny,
Nge ce inine jë la nyima ne kele wezipo celë.
21 Ke hna elë la mec me lö qa ngöne la itre mamala hun;
Hnene ej hna lö hnine la itre ita ne thup hna eköhagen
Matre troa xome la itre nekönatr e cahu gojeny
Me itre nekö trahmanyi ngöne la gaa tru atr.’
22 Hape jë: ‘Hane hi la hna qaja hnei Iehova:
“Tro la itre ka mec a malamala tune la agetrin hune la hlapa,
Me tune la itre xötre qitr hna thupa hnene la atre menuën,
Nge pëkö ka troa hlem.”’”
23 Hane hi la hna qaja hnei Iehova:
“Tha tro kö la atr ka inamacan a selëne la inamacane i angeic;
Tha tro kö la atr ka catr a selëne la trengecatre i angeic;
Nge tha tro kö la trenamo a selëne la itre mo i angeic.”
24 “Ngo ame la atre selën, ke loi e tro angeic a selëne la:
Ka atreine thelewekë nge ka atre ni,
Nge atre hi angeic laka Iehova ni, atre ihnimi nyipici, nge ka meköt, me thiina ka meköt e celë fen,
Ke itre ewekë lai ka amadrinë ni,” öni Iehova.
25 “Dreng!” öni Iehova. “Tro ha traqa la drai ne tro ni a ihnyingë me itre hna xötrehatren ngöne hi la ngönetrei, 26 ngo tha hna xötrehatrene kö la hni i angatr, ene Aigupito, me Iudra, me Edroma, me angetre Amona me Moaba, memine la nöjei atr ka cine la hnaqathë i angatr, nge ka mele ngöne la hnapapa. Ke tha hna xötrehatrene kö la nöjei nöj, nge tha hna xötrehatrene kö la hni ne la angetre Isaraela asë.”