Ieremia
11 Hane hi la hna qaja hnei Iehova koi Ieremia: 2 “Drenge ju epuni asë la itre hna amekötin ngöne la isisinyikeu celë!
“Nge thuemacanyine ju* la angetre Iudra me Ierusalema. 3 Qaja jë ka hape: ‘Hane hi la hna qaja hnei Iehova Akötresi Isaraela: “Hnëjine la atr ka tha trongëne la itre hna amekötin ngöne la isisinyikeu celë, 4 lo hnenge hna ahnithe kowe la itre qaaqa i epun troa metrötrën, ngöne lo drai ne eni a amele angatr qa Aigupito, qa ngöne la ifur ne ahmu fao. Öning: ‘Drengethenge ni jë, nge kuca asë jë la hnenge hna amekötin. Nge tro hë epuni a nöjeng, nge tro ni a Akötresi epun, 5 matre eatrëne jë ni lo hnenge hna sisinyi kowe la itre qaaqa i epun. Ke hnenge hna thingehnaean troa alapa angatr ngöne la nöj gaa neni gala hnei melek me miel. Nge hapeu, tha celë kö la hnenge hna kuca?’”’”
Matre öning: “Amen* Iehova.”
6 Ame hnei Iehova hmaca hna qaja koi ni ka hape: “Tro fë jë ngöne la itre traon e Iudra, me ngöne la itre gojenyi e Ierusalema la nöjei trengewekë celë: ‘Drenge ju la itre hna amekötin ngöne la isisinyikeu celë, nge trongëne jë. 7 Ke qaane lo eni a amelene la itre qaaqa i epuni qa Aigupito uti hë enehila, hnenge pala hi hna hmekë angatre hnyawa. Hnenge pala hi hna thel troa ahmalane la hni i angatr, me hape: “Drei ni ju.” 8 Ngo tha drenge kö nge tha hnangenyëne kö angatr. Hnei angatre pe hna isa catre fë mekun, me kei thenge la itre aja* i angatr ka ngazo. Matre hnenge pë hë hna axulun koi angatr la nöjei ewekë hna qaja ngöne la isisinyikeu, lo hnenge hna upi angatr troa metrötrën, ngo xele pe angatr ma trongën.’”
9 Matre öni Iehova koi ni: “Hnene la angetre Iudra me Ierusalema hna ca mekun troa icilekeu me eni. 10 Hnei angatr hna nyitipune la itre ngazo ne la itre qaaqa i angatr ekö, lo angatr a xele ma drei ni. Hnei angatre fe hna hane xötrethengen me nyihluen la itre xaa haze. Hnene la nöje Isaraela me Iudra hna thë lo isisinyikeung memine la itre qaaqa i angatr. 11 Qa ngöne lai, öni Iehova: ‘Tro ni a axulune la ketre akötr koi angatr, hna thatreine kötren. Maine tro angatr a sipo ixatua koi ni, ke tha tro kö ni a dreng. 12 Nge tro hë la itre traon ne Iudra me angetre Ierusalema, a ujë me sipo ixatua kowe la itre haze hnei angatre hna huuje kow.* Ngo tha tro pi kö la itre haze cili a amele angatr ngöne la ijin akötr. 13 Ke nyimutre hë la itre haze i ö Iudra, tune la itre traone i ö. Nge tune la etrune la itre gojenyi e Ierusalema, hnei ö hna xup atrun la itre ita ne huuj thatraqane la ewekë nyine hmahman,* itre ita ne huuj nyine huuj koi Baala.’
14 “Ngo ame kö eö,* the thithi kö thatraqane la nöje ce. The sipo ixatua kö koi ni, nge the thithi sai angatre kö, ke tha tro kö ni a dreng la angatr a xëwe fë la akötre i angatr.
15 Hnauëne pena la kola lapane la umang hnene la nöje hniminang
Ngo ala nyimu pe thei angatr la ka kuca la itre huliwa ka sis?
Hapeu, atreine kö angatre sawa la akötr ka troa traqa koi ö,* hnene hi la hna tro fë mitr ka hmitrötr*?
Tro jë kö eö lai a madrin?
16 Hnei Iehova hna ati ëje i ö ekö,
Ioliv* ka catr, sinöe ka mingöming nge ka hamë wen ka loi.
Ngöne la mejen atraqatr, hnei nyidrëti hna dreuthe la sinöe,
Nge hna axeciën la itre picin.
17 “Nöje Iudra fe, ase hë qaja hnei Iehova joxu ne la itre trongene isi e hnengödrai, lo atre traa eö ka hape, troa traqa la akötre koi ö, pine la itre ngazo i ö me Isaraela, lo epon a akötrë ni me huuje koi Baala.”
18 Iehova fe, hnei nyipëti hna thuemacanyi ni matre atre jë ni;
Ngöne la ijine cili, hnei nyipëti hna amamai ni la itre huliwa i angatr.
19 Ceitunge hi lo me neköi mamoe ka mem hna tro fë troa humuth.
Thatre kö ni lo hnei angatre hna ce ithanatan troa kuca koi ni:
“Satrije pi* la isinöe memine la itre wen,
Nge apatrene pi ej qa ngöne la nöj ne la itre ka mel,
Matre tha tro hmaca kö sa mekun la ëjen ej.”
20 Ngo ka meköt la aqane iameköti i Iehova, joxu ne la itre trongene isi e hnengödrai;
Nyidrëti a waipengöne la hni me itre mekun ka sihngödr.*
Aijijë ni jë troa goeën la nyipëti a të la ngazo i angatr,
Ke hnenge hna nue koi nyipë troa kootrë ni.
21 Matre hane hi la hna qaja hnei Iehova göne la angetre Anathoth ka thele troa humuthi ö, me hape: “Loi hë hna perofeta ngöne la ëje i Iehova, wanga tro huni a humuthi ö!” 22 Hane hi la hna qaja hnei Iehova joxu ne la itre trongene isi e hnengödrai: “Tro ni a ihnyingë me angatr. Tro la itre nekö trahmanyi a mec hnei taua, nge tro la itre nekö i angatr trahmanyi me jajinyi a mec hnei jiin. 23 Pëkö ala cas ka troa mel, ke tro ni a axulune la akötr kowe la angetre Anathoth, ngöne la macatre ne tro ni a ihnyingë me angatr.”