Ieremia
24 Ame hnei Iehova hna amamai ni la lue trenge wacua hna amë qëmekene la uma ne hmi i Iehova. Ngöne la ijine cili, ase hë Nebukaneza* joxu ne Babulona xomi Iekonia* nekö i Iehoiakima joxu ne Iudra, me itre nekö i joxu ne Iudra, me itre ka atreine huliwa, me itre ka dreu fao;* hnei angeic hna xomi angatr qa Ierusalema a tro Babulona. 2 Ame ngöne la ketre treng, hetre wene wacua ka loi kösë itre pane wene wacua. Ngo ame pena ngöne la ketre treng, hetre wene wacua ka ngazo, goi ngazo fe troa xen.
3 Ame hnei Iehova hna hnyingë ni ka hape: “Ieremia, nemene la hnei ö hna öhn?” Öninge jë hi: “Itre wene wacua. Ame la itre wene wacua ka loi, ke ka lolo catr. Ngo ame la itre wene wacua ka ngazo, ke ka ngazo catr nge goi ngazo fe troa xen.”
4 Thupene lai, hnei Iehova hna ewekë koi ni me hape: 5 “Hane hi la hna qaja hnei Iehova Akötresi Isaraela: ‘Tune la itre wene wacua ka loi, tro ni a wangaloine la angetre Iudra hna kötre fë, lo hnenge hna helën kowe la nöje i angetre Kaledaia. 6 Nge tro ni a thupë angatr matre amanathithi angatr, me abëekë angatr kowe la nöje ce. Tro ni a xupi angatr, ngo tha tro kö a thëtriji angatr. Tro ni a traa angatr, ngo tha tro kö a fejetriji angatr. 7 Eje hi, tro ni a hamë angatre la hni ka ajan troa atrepengöi eni me atre laka, Iehova ni. Tro hë angatr a nöjeng, nge tro ni a Akötresi angatr, ke tro angatr a bëeke koi ni hnene la hni i angatr ka pexej.
8 “‘Ngo hane hi la hna qaja hnei Iehova göne la itre wene wacua ka ngazo, nge tha ka loi kö troa xen: “Celë hi aqane tro ni a goeë Zedekia joxu ne Iudra, me itre nekö i joxu, memine la angetre Ierusalema ka mele pe, me itre ka lapa e Aigupito. 9 Tro la akötr hnenge hna troa axulune koi angatr a axouen la nöjei baselaia ne la fen. Ngöne la nöjei götran hnenge hna troa aisaije angatr, tro hë la itre atr a thaipië angatr. Tro ha hnyima sai angatr me qeje angatr ngöne la itre edromë, me ngöne la kola ieji. 10 Eje hi, tro ni a upe koi angatre la isi, me jiin, me meci ka ixötrekeu,* uti hë la tro angatr a patre qa ngöne la nöj, lo hnenge hna hamë angatr me itre qaaqaa i angatr.”’”