Salamo
105 Olene jë koi Iehova, nge atrune* jë la ëje i nyidrë,
Amamane jë la itre huliwa i nyidrë ka tru nyipine la itre nöj!
2 Nyima jë koi nyidrë, nyima* atrunyi nyidrëti jë,
Lapa mekune* jë la nöjei huliwa i nyidrë nyine hain.
3 Selëne jë la ëje i nyidrë ka hmitrötr.
Epi tro la hni ne la itre ka thele Iehova a madrin.
4 Thele Iehova jë memine la trengecatre i nyidrë.
Thele lapaane jë la qëmeke i nyidrë.*
5 Mekune jë la itre huliwa i nyidrë nyine hain, lo hnei nyidrëti hna kuca,
Me itre iamamanyikeu i nyidrë, me itre hna amekötin hnei nyidrë,
6 Epun itre matra* i Aberahama, hlue i nyidrë,
Epun itre nekö i Iakobo, lo hnei nyidrëti hna iën.
7 Iehova nyidrë, lo Akötresi së.
Thatraqane la fene hnengödrai asë la itre hna amekötin hnei nyidrë.
8 Tro pala kö nyidrëti a mekun la isisinyikeu i nyidrë uti hë epine palua,
Memine la hnei nyidrëti hna qaja amë* ngöne la 1 000 lao xötr,
9 Lo hnei nyidrëti hna isisinyikeu me Aberahama,
Me sisiny koi Isaaka,
10 Lo isisinyikeu hnei nyidrëti hna acil nyine wathebo koi Iakobo
Me isisinyikeu ka epine palua koi Isaraela,
11 Lo öni nyidrë, “Tro ni a hamë eö la nöje Kanana,
Edrö i eö hë lai.”
12 Kolo ijine tha ala nyimu kö angatr,
Nyipici, ala xalaithe hi angatr, nge trenyiwa angatr ngöne la nöj.
13 Angatr a tro qa ngöne la ketre nöj koi ketre nöj,
Qaane la ketre baselaia kowe la ketre nöj.
14 Tha nue kö nyidrë la ketre atr troa akötrë angatr,
Ngo pi angatr, hnei nyidrëti hna wesitrëne la itre joxu,
15 Me hape, “The ketre kö la itre hnenge hna iën,
Nge the akötrëne kö la itre perofetang.”
16 Hnei nyidrëti hna hëne la ketre jiin kowe la nöj;
Hnei nyidrëti hna cipane la falawa* koi angatr.
17 Hnei nyidrëti hna up qëmekei angatr la ketre trahmany
Iosefa, hna salemën tune la ketre hlu.
18 Hna alöne* la lue ca i angeic ngöne la inehe ne iaxösisi,
Nge hna othe la nyinawa i angeic hnine la itre fao;
19 Hnene la itre hna amekötin hnei Iehova hna apexejenyi angeic,
Uti hë la ijine eatre la trengewekë i Akötresie.
20 Hnene la joxu hna iup troa sei angeic,
Hnene la tixe ne la itre nöj hna nue angeice hmaca.
21 Hnei nyidrë hna acili angeic troa mus ngöne la hnanyijoxu,
Me tan kowe la nöjei ewekë i nyidrë,
22 Matre troa mus hune la itre he ne nöj* thenge la mekuna i angeic
Me inine la inamacan kowe la itre xötre ka tru.
23 Ame hna traqa hnei Isaraela e Aigupito,
Nge hnei Iakobo hna lapa trenyiwa ngöne la nöje Hama.
24 Ame hnei Akötresieti hna atiqane la nöje i nyidrë;
Hnei nyidrëti hna acatrenyi angatr hune la itre ithupëjia me angatr,
25 Lo hnei nyidrëti hna nu troa methinëne la nöje i nyidrë,
Matre ce thë troa akötrëne la itre hlue i nyidrë.
26 Hnei nyidrëti hna upi Mose hlue i nyidrë,
Me Arona, lo hnei nyidrëti hna iën.
27 Hnei nyidroti hna kuca la itre hatren nyipi angatr,*
Lo itre iamamanyikeu ngöne la nöje Hama.
28 Hnei nyidrëti hna upe la melöhlem, ame hna miti pi la nöj;
Tha hnei angatre* kö hna icilekeu memine la itre trengewekë i nyidrë.
29 Hnei nyidrëti hna saze la itre tim i angatr koi madra
Matre humuthe la itre ie i angatr.
30 Hna lapan asë la nöj hnene la itre grenui,
Uti hë la itre hnahag ne la hnanyijoxu.
31 Hnei nyidrëti hna upe la itre neng ka ihej troa lapan la nöje i angatr
Me itre tresitr troa haöthe la itre zi i angatr.
32 Hnei nyidrëti hna saze la mani hnei wene mani ka catr
Me upe la samek* kowe la nöje i angatr.
33 Hnei nyidrëti hna lepe la itre vine i angatr me hnënge iwacua i angatr
Me hutra la itre sinöe ne la nöje i angatr.
34 Hnei nyidrëti hna upe la itre sipa troa lapane la nöje i angatr,
Ene la itre neköi sipa hna thatreine e.
35 Hnei itre ej hna xeni asë la hnitre ne la nöj,
Me xeni asë la itre ka cia.
36 Hnei nyidrëti hna humuth asë la itre pane nekön ngöne la nöje i angatr,
Lo hnei angatr hna pane hnahon.
37 Hnei nyidrë hna lö fë pi la nöje i nyidrë memine la wenge sileva me gool;
Ngöne la itre tribu i nyidrë, pëkö ca ka tria.
38 Ame hë la angatr a tro, hnene la angetre Aigupito hna madrin,
Ke hna traqa la xou koi angatr pine la angetre Isaraela.*
39 Hnei nyidrë hna seluthe la iaw nyine juetrëne la nöje i nyidrë
Memine la eë nyine thina angatr e jidr.
40 Ngo hnei angatr hna sipon, nge hnei nyidrë hna hamëne la itre neköi waco;
Hnei nyidrë hna ameji angatr hnene la falawa qa hnengödrai.
41 Hnei nyidrëti hna fe la git, ame hna neni pi la tim;
Itre ej a neni ngöne la hnapapa tune la hneopegejë.
42 Ke tha thëthëhmine kö nyidrë lo hnei nyidrëti hna thingehnaean ka hmitrötr koi Aberahama, hlue i nyidrë.
43 Matre hnei nyidrëti hna tro fë la nöje i nyidrë ngöne la madrin,
Lo hnei nyidrëti hna iën ngöne la kola sue madrin.
44 Hnei nyidrë hna hamë angatr la itre hnepadro ne la itre nöj;
Hnei angatr hna kepe thangane la hna huliwa mec hnene la itre xaa nöj,
45 Celë hi matre, tro angatr a metrötrëne la itre hna amekötin
Me trongëne la itre wathebo.
Atrunyi Ia jë!*