Genese
27 Ngöne la ketre drai, lo qatre hë Isaaka nge ti hë la luemeke i angeic, Isaaka a hë Esau jë, lo pane nekö i angeic me hape: “Neköng!” Nge öni Esau: “Eni hi la.” 2 Öni Isaaka hmaca jë: “Qatre hë ni la, nge thatre kö ni la ijine tro ni a mec. 3 Matre pane ajöne jë la nyine weje öni eö, me uke pehna i eö, me pehna, nge tro jë helep troa thele öning. 4 Nge hnëkëne hnyawa jë lo xen hnenge hna ajan, nge traqa fë jë koi ni, matre tro ni a xen, me amanathithi eö qëmekene tro na mec.”
5 Ame la Isaaka a ithanata me Esau, drenge hi Rebeka. Thupene lai, hnei Esau hna tro helep troa weje öni, matre traqa fë öni. 6 Rebeka a qaja jë koi Iakobo nekö i eahlo ka hape: “Drenge hë ni la keme i eö e qaja koi Esau ka hape, 7 ‘traqa fë mitre pi koi ni, nge hnëkëne jë koi ni la ketre xeni ka lolo, matre tro ni a xen, me amanathithi eö qëmeke i Iehova, e tha meci pala kö ni.’ 8 Ngo enehila neköng, pane drei ni hnyawa ju, nge kuca jë la hnenge hna qaja. 9 Tro jë kowe la hna axö öni, nge traqa fë pi koi ni la lue neköi nani ka lolo, matre tro ni a kuca la xeni koi kaka, lo hnei nyidrë hna ajan. 10 Nge tro hë eö a tro fë koi kaka, matre tro nyidrëti a öni, me amanathithi eö qëmekene tro nyidrëti a mec.”
11 Öni Iakobo jë hi koi Rebeka thine i angeic: “Ka cia pene lo mamang, nge ame ni pëkö. 12 Nge e traqa ju kaka ketri ni, tro hë nyidrëti a mekune laka, eni a qehnamo nyidrë, nge tha tro kö nyidrëti lai a amanathithi ni, ngo tro pe nyidrëti a eji ni.” 13 Ngo önine la thine i angeic: “Epi eatre koi ni la ieji cili neköng, ngo kuca ju pe la hnenge hna qaja. Tro ja xome la lue neköi nani.” 14 Matre angeic a tro ju troa xom, me traqa fë koi thin. Ame hnei eahlo hna hnëkëne la xen, lo hna ajan hnene la keme i angeic. 15 Nge eahlo a xome jë qa ngöne la uma la itre iheetre ka mingöming i Esau, lo pane nekö i eahlo, me heetrë Iakobo, lo nekö i eahlo ka co. 16 Eahlo a heetrëne ju fe hnei ikupein neköi nani la lue ime i Iakobo, me nyinawa i angeic ka pë pen. 17 Nge eahlo a hamë Iakobo jë la xeni ka lolo, memine la falawa hnei eahlo hna san.
18 Iakobo a lö jë kowe la keme i angeic me hape: “Kaka!” Öni Isaaka: “Öö neköng, drei hmunë?” 19 Öni Iakobo ka hape: “Eni Esau, pane nekö i nyipë. Ase hë ni kuca la hnei nyipëti hna qaja. Matre pane lapa jë nge öni jë la mitr hnenge hna traqa fë, nge amanathithi ni jë.” 20 Ngo öni Isaaka ka hape: “Neköng, hnei eö hna tune kaa matre canga saqe hi eö hetre tha?” Sa jë hi angeic ka hape: “Iehova Akötresi nyipë la ka engën koi ni.” 21 Ame hnei Isaaka hna qaja koi Iakobo ka hape: “Alemi jë neköng, matre tro ni a ketri eö, nge tro hë ni a atre ka hape, Esau kö eö maine drei.” 22 Iakobo a alemi jë koi Isaaka keme i angeic. Nge thupene la Isaaka a ketri angeic, öni Isaaka: “Aqane ithanata i Iakobo, ngo ime i Esau pe.” 23 Tha wangatrehmekunyi Iakobo kö hnene la keme i angeic, ke ka cia pene la lue ime i angeic tui Esau. Matre Isaaka a amanathithi angeice jë.
24 Nge öni Isaaka: “Esau neköng, eö hi la?” Nge öni Iakobo: “Öö eni hi.” 25 Matre öni Isaaka: “Neköng, pane thue öninge jë mitr, nge thupene lai, tro ni a amanathithi eö.” Iakobo a hamëne pi la mitr me waina koi kem, matre Isaaka a öni jë me ij. 26 Nge öni Isaaka jë hi: “Alemi jë neköng, nge pane dremi ni ju.” 27 Angeic a alemi jë me dremi Isaaka, nge drenge hi Isaaka la punepunene la iheetre i angeic. Matre Isaaka a amanathithi angeice jë me hape:
“Ceitune la punepunene la neköng, memine la punepunene la hnitr hnei Iehova hna amanathithin. 28 Epi tro la nyipi Akötresie a hamë eö la wene lepany ne hnengödrai, me itre gaa hmelek ne la ihnadro, me itre wene feja ka nyimutre, nge troa tru hnei waina ka hnyipixe. 29 Epi tro la itre nöj a huliwa koi eö, nge epi tro la itre nöj a thili qëmeke i eö. Musinëne jë la itre trejin me eö, nge epi tro la itre neköne la thine i eö a thili koi eö, nge epi tro ha hnëjine la itre ka eji eö, nge epi tro la itre ka amanathithi eö a manathith.”
30 Thupene la Isaaka a ase amanathithi Iakobo, nge kolo petre hi a trotriji Isaaka hnei Iakobo, xulu pi hi Esau qa hna weje öni. 31 Angeic a hnëkëne ju fe la ketre xeni ka lolo, me tro fë koi kem, me hape: “Lapa jë kaka, nge pane öni jë la mitreng, matre tro nyipëti a amanathithi ni.” 32 Öni Isaaka jë hi: “Drei eö?” Nge öni angeic: “Eni Esau nekö i nyipë, lo pane nekö i nyipë.” 33 Ame hnei Isaaka hna hmengöhmengöne catr, me hape: “Nga drei kö lo ka weje öni koi ni, me traqa fë mitr? Ase hë ni xen qëmekene tro eö a traqa, nge ase fe hë ni amanathithi angeic, matre manathithi hë angeic.”
34 Ame hë la Esau a ase drenge la hna qaja hnei kem, angeic a sue catre jë me treije latresi, me hape: “Amanathithi ni ju fe kaka!” 35 Ngo sa jë hi Isaaka ka hape: “Ase hë iaö ni hnene la jini eö, matre tro angeic a kapa la manathith hna hnëkëne koi eö.” 36 Nge öni Esau jë hi: “Tha kolo kö a hëne menu angeic ka hape, Iakobo*. Alua thipatrë ni hë hnei angeic. Ase hë angeice thapa la edröng ne ka tru, nge enehila, angeic a thapa la manathithing!” Nge öni angeice hmaca: “Hetre ketre manathith pala kö nyine tro nyipëti a hamë ni?” 37 Ngo sa jë hi Isaaka ka hape: “Ase hë ni acili angeic troa musi koi eö, me hamëne la itre trejin me angeic troa hlue i angeic, me hamë wene feja, me waina ka hnyipixe. Matre, nemene hmaca pe kö la nyine tro na hamë eö neköng?”
38 Nge öni Esau: “A casi hi la manathithi nyipë kaka? Nga amanathithi ni ju fe kaka?” Nge angeic a treije catre jë. 39 Öni Isaaka jë hi:
“Tro eö a lapa ananyine la itre gaa hmelek ne la ihnadro, me wene lepanyi ka uti qa hnengödrai. 40 Tro eö a mel hnene la taua i eö, nge tro eö a hlue ne la jini eö. Nge e thele hë eö troa isi memin, tro hë eö a hutra la ehnef hnei angeic hna atë hune la nyinawa i eö.”
41 Ngo Esau pala kö a lapa fë trengehni, pine laka, hnei kem hna amanathithi Iakobo. Nge Esau a mekune ka hape: “Easenyi hë tro kaka a mec, nge easenyi hë la ijine troa hnëmeci nyidrë, nge thupene lai, tro ni a humuthi Iakobo jining.” 42 Ngo ame hë la kola qajaqaja koi Rebeka la itre trengewekë i Esau, lo pane nekö i eahlo, hnei eahlo hna canga iupe troa hë Iakobo, nekö i eahlo ka co. Öni eahlo: “Pane dreng, Esau mama i eö a thele troa humuthi eö, matre troa të koi eö* lo ewekë hnei eö hna kuca. 43 Kuca ju la hnenge hna qaja koi eö neköng, kötre pi a tro Karan thei Labana xa i nenë. 44 Pane lapa ju thei nyidrë, uti hë la troa lapa kötre la elëhni ne la mama i eö, 45 nge uti hë patre hnyawa la elëhni angeice koi eö, nge thëthëhmine hë angeic la hnei eö hna kuca. Nge e cili, tro hë ni a upi ketre troa thei eö. Hnauëne la tro epon a ce patr qaatheng ngöne la drai ka cas?”
46 Thupene lai, tha mano kö Rebeka qaja koi Isaaka ka hape: “Pine la lue nekö i Heth, thatreine hë ni xomihnine la mele ce! E traqa ju fe Iakobo xome la ketre föe ne Heth, tune la itre jajinyi ne la nöj, nga nyine ue hmaca kö la tro na mel?”