Habakuka
3 Thithi Habakuka perofeta hna fejan nyine nyima ne latresi:*
2 Iehova fe, drenge hë ni la hna qaja göi nyipë.
Iehova fe, eni ha xou pine la huliwa i nyipë.
Eatrëne jë ngöne la itre macatre ka troa traqa!*
Amamane jë la huliwa i nyipë ngöne la itre macatre ka troa traqa.*
Ngöne la itre macatre cili, the thëthëhmine kö troa utipin.
3 Hnei Akötresie hna traqa qa Temana,
Lo Atre Ka Hmitrötr ne la Wetr e Parana. (Sela)*
Kola haöthe la hnengödrai hnene la emingömingöne la mus i nyidrë;
Nge tiqa ha la ihnadro hnene la hna atrunyi nyidrë.
4 Hnei nyidrëti hna hudrum tune la lai.
Hna xulu la lue uke lai qa ngöne la ime i nyidrë,
Lo hna juetrën la trengecatre i nyidrë.
5 Hna tro pa la meci ka ixötrekeu qëmekei nyidrë,
Nge hna xötrethenge nyidrë hnene la fiva ka idreuth.
6 Hnei nyidrë hna pane cil, matre hna hmengöhmengöne la ihnadro.
Hnene hi la aqane goe i nyidrë, matre hna sesëkötre la itre nöj.
Kaqa ha la itre wetr ka epine palua,
Nge ipië hë la itre sasala ka hekö.
Ewekë i nyidrë la itre gojenyi hnapan.
7 Hnenge hna öhne la akötr e hnine la itre itat e Kuza.
Hna hmengöhmengöne la itre itat ngöne la nöj e Midiana.
8 Iehova fe, nyipëti kö a elëhni kowe la itre hneopegejë,
Nyipëti kö a meci hnei elëhni kowe la itre hneopegejë?
Maine nyipëti pena a elëhni kowe la hnagejë?
Ke hnei nyipëti hna të hune la itre hose i nyipë;
Hune* ju kö la itre ikariota i nyipë.
9 Hna hule la tane pehna i nyipë qa ngöne la trengen,* ase hë hnëkën ej.
Hna hnëkëne hë la itre jia ne isi* göne la hna sisiny.* (Sela)
Hnei nyipëti hna thawaluëne la ihnadro jëne la itre hneopegejë.
10 Hna qali hnei akötr la itre wetr la kola goeë nyipë.
Hna hlupi la itre mani.
Hna ulili catr la itre tim ka jui.
Hnene itre ej hna cua draië.
11 Hnene la treu me jö hna lapa ngöne la göhne i nyidro ka tru.
Hnene la itre ane pehna i nyipë hna fetra tune la lai.
Hnene la jo i nyipë hna melemel tune la samek.
12 Hnei nyipëti hna trongëne la ihnadro me wesitr.
Hnei nyipëti hna wajafica* la itre nöj ngöne la elëhni i nyipë.
13 Hnei nyipëti hna tro troa amelene la nöje i nyipë, memine la hnei nyipëti hna iën.*
Hnei nyipëti hna wajahuje la tan* ne la hnalapa ne la atr ka ngazo.
Hna thëtriji ej asë.* (Sela)
14 Hnei nyipëti hna jaqa la he ne la itre soc i angeic hnene la itre sipu jia ne isi i angeic
Ngöne lo angatr a sasaqe thele troa aije ni.
Ngöne la hnë zae i angatr, hnei angatr hna madrin troa apatren la atr ka akötr.
15 Hnei nyipëti hna kuhu thenge hnagejë memine la itre hose i nyipë,
Me tro nyipine la ecatrene la itre hoke ne gejë ka tru.
Kucakuca ha la ngönetreing;*
Nge hna hmengöhmengöne la lue cang.
Ngo eni a treqene hnyawa la drai ne akötr,
Ke tro ej a traqa kowe la itre ka lepi së.
17 Ngacama tha enge kö la iwacua,
Nge tha wa kö la itre vin;
Ngacama tha hame kö la ioliv,
Nge pëkö xen ngöne la itre hlapa;
Ngacama patre hë la itre neköi öni ngöne la hnë axö öni,
Nge patre fe hë la itre öni ka tru ngöne la uma i öni;
18 Ngo ame kö ni, tro ni a madrin pi Iehova;
Tro ni a öhnyi madrin thene la Akötresie ka amele ni.*
19 Iehova Joxu Ka Sisitria la trengecatreng;
Tro nyidrëti a kuca matre tro la lue cang a tune la waca ne drube
Tro nyidrëti a eatrongë ni hune la itre gaa draië.
Thatraqane la atre jumi traem; cememine la itre nyine elo miuzikeng ka hetre filen.