Numera

6 Öni Iehova hmaca jë hi koi Mose: 2 “Qaja jë kowe la angetre Isaraela ka hape: ‘Maine tro la ketre trahmanyi maine föe a sisiny troa mel tune la ketre atre Nazeri* koi Iehova, 3 tha tro kö angeic a iji waina, maine iji kahaitr. Nge tha tro kö angeic a iji vinega ne waina, maine vinega ne kahaitr. Tha tro kö angeic a iji la itre nyine ij hna kuca hnei zane rezë, maine iji wene rezë hna nyipi huj, maine xen la itre ka qaqacil. 4 E nöjei drai ne angeic a Nazeri, tha tro kö angeic a ij la wene ne la vin, ene la wene rezë ka ija memine la ikupein.

5 “‘Ngöne la itre drai ne Nazeri angeic, tha tro kö a cine la he i angeic. Nge tro angeic a nue la hnaihe i angeic, matre tro angeic a hmitrötr uti hë la troa pexej la itre drai ne Nazeri angeic koi Iehova. 6 Ngöne la nöjei drai ne angeic a Nazeri koi Iehova, tha tro kö angeic a easenyine la ngönetrei ka mec. 7 Ngacama keme i angeice ju hë, maine thine i angeic, maine trejine me angeic, maine xa i angeic la ka mec. Tha tro kö angeic a pui ngazo hnei angatr, ke eje kö hune la he i angeic la hatrene Nazeri kowe la Akötresi angeic.

8 “‘Tro angeic a hmitrötre koi Iehova ngöne la nöjei drai ne Nazeri angeic. 9 Maine troa mec la atr ezi angeic, nge hna asesëkötrë angeic, matre pui ngazo hë la itre pene he i angeic ka nyihatrene la Nazeri angeic koi Akötresie, qa i angeic troa cine la he i angeic ngöne la drai ne apuiloinyi angeic, ene la hna 7 ne drai. 10 Nge ngöne la hna 8 ne drai, tro pë hë angeic a traqa fë la lue meketrë, maine lue neköi pinyi kowe la atre huuj ngöne la hnë lö ne la itat ne icasikeu. 11 Tro la atre huuj a hnëkëne la ketre, nyine huuj ne ngazo,* nge ketre, nyine huuj ne dreuth asë.* Nge tro la atre huuj a kuca la huuj ne ialoinekeun thatraqane la atr, pine angeic easenyine la ketre ka mec. Tro hë angeic a ahmitrötrëne la he i angeic ngöne la drai cili. 12 Qa ngöne lai, tro hmaca angeic a hmitrötr thatraqai Iehova ngöne la itre drai ne angeic a Nazeri. Tro angeic a traqa fë la ca neköi mamoe trahmanyi ka ca macatre a utipië, nyine huuj ne la ngazo.* Ngo tha tro kö a e la itre drai qëmeken tro angeic a pui ngazo, ke hnei angeic hna apuingazone la Nazeri angeic.

13 “‘Hane hi la wathebo ne Nazeri: E pexeje hë la itre drai ne angeic a Nazeri, tro ha tro sai angeic kowe la hnë lö ne la itat ne icasikeu. 14 Tro hë angeic a tro fë la huuje i angeic koi Iehova, ene la ca neköi mamoe trahmanyi ka pë ethan nge ka ca macatre a utipië nyine huuj ne dreuth asë, memine la ca neköi mamoe föe ka pë ethan nge ka ca macatre a utipië nyine huuj ne ngazo, me ca mamoe trahmanyi ka pë ethan nyine huuj ne tingeting,* 15 memine la ca trenge falawa ka pë levenen kösë korona, nge hna kuca hnei farin ka lolo hna ce lomën me oel, me itre areto ka pë levenen hna köle hnei oel, me itre huuj ne wene feja, me waina nyine fii huuj. 16 Nge tro la atre huuj a tro fë itre ej qëmekei Iehova, me huujëne la huuj ne ngazo i angeic, memine la huuj ne dreuth asë i angeic. 17 Tro la atre huuj a huujëne la mamoe trahmanyi nyine huuj ne tingeting koi Iehova, memine la trenge falawa ka pë levenen. Nge tro angeic a tro fë la huuj ne la itre wene feja, memine la waina nyine fii huuj.

18 “‘Tro la atre Nazeri a cine la he ne Nazeri i angeic ngöne la hnë lö ne la itat ne icasikeu, me xome la itre ipene he ne Nazeri i angeic, me kuiëne kowe la eë fene la huuj ne tingeting. 19 Nge tro la atre huuj a xome la inaea ka tro ne la mamoe trahmany, memine la ca falawa ka pë levenen kösë korona qa hnine la treng, me ca areto ka pë levenen, nge tro hë angeic a atë itre ej hune la lue hnatrapaime ne la atre Nazeri, e ase hë cine la he i angeic ka nyihatrene lo Nazeri angeic. 20 Tro la atre huuj a jume itre ej nyine huuj ne jumejume* qëmekei Iehova. Nge celë hi ewekë ka hmitrötr kowe la atre huuj, tune la imano ne la huuj ne jumejum, memine la inaea hna tro fë nyine huuje ka hmitrötr. Nge thupene lai, ijije hë kowe la atre Nazeri troa iji waina.

21 “‘Hane hi la wathebo göne la Nazeri ka sisiny: Maine tro angeic a sisiny, nge ijiji angeice hi troa kuca la ketre huuj ka tru kö hune la hna majemine kuca hnene la Nazeri koi Iehova, qa i angeic troa eatrëne la hnei angeic hna sisiny, matre metrötrëne la wathebo ne Nazeri.’”

22 Thupene lai, öni Iehova koi Mose: 23 “Qaja jë koi Arona me itre nekö i angeic ka hape: ‘Hane hi la aqane tro epuni a amanathithine la nöje Isaraela. Qaja jë koi angatr ka hape:

24 “Epi tro Iehova a amanathithi ö, me thupë eö.

25 Nge epi tro la madrine i Iehova a eje hui ö, nge epi tro eö a hnimina i nyidrë.

26 Epi tro Iehova a amamane la thiina ka menyike i nyidrë koi ö, me hamë eö la tingeting.’”

27 Nge tro angatr a atë la ëjeng hune la nöje Isaraela, matre tro ni a amanathithi angatr.”