Esodro
20 Nge hnei Akötresieti hna qaja la nöjei ewekë celë. Öni nyidrë:
2 “Iehova ni Akötresi eö, atre thepe eö qa ngöne la nöje Aigupito, lo nöj ka thahluë eö. 3 The tro kö eö a thele la itre xa haze, ngo eni hmekuje hi.*
4 “The tro kö eö a kuci idrola thatraqai eö, maine aceitunëne la ketre ewekë e koho hnengödrai nyine haze, maine e celë fen, maine ngöne la itre tim.* 5 The tro kö eö a thili kow, me nue ketre troa upi eö troa nyihluen itre ej. Ke ame ni Iehova Akötresi eö, eni a ajane laka, eni hmekuje hi* la nyine tro eö a nyihluen. Nge eni a nyithupene la ngazo hna kuca ne la itre kem kowe la itre nekön, hune la hnaakönine xötr, me hna 4 ne xötr ne la itre ka methinë ni. 6 Ngo ka amamane pe la ihnimi nyipici kowe la hna 1 000 ne xötr ka hnimi ni, nge ka drenge la itre hnenge hna amekötin.
7 “Tha tro kö eö a huliwane menune la ëje i Iehova Akötresi eö, ke tha tro kö Iehova a jele pë engazon la atre thaipiëne la ëje i nyidrë.
8 “Mekune ju eö la drai Sabath, matre tro pala hi ej a hmitrötre koi eö. 9 Ngöne la 6 lao drai, qa i eö troa huliwa, me kuca la nöjei jole i eö. 10 Ngo ame ngöne la hna 7 ne drai, ke sabath i Iehova Akötresi eö lai. Tha tro kö eö a kuca la ketre huliwa, eö me nekö i eö trahmanyi me jajiny, memine la hlue i eö, trahmanyi maine föe, memine la si eö, me atre lapa trenyiwa ngöne la lapa* i eö. 11 Ke ngöne la hna 6 ne drai, hnei Iehova hna xupe la hnengödrai, me ihnadro, me hnagejë, me nöjei ewekë ngön ej. Nge ngöne la hna 7 ne drai, hnei nyidrëti hna pane mano. Celë hi matre, hnei nyidrëti hna amanathithine la drai Sabath, me ahmitrötrën.
12 “Metrötrëne ju la keme me thine i eö, matre tro eö a mel aqeany ngöne la nöj hnei Iehova Akötresi eö hna hamëne koi eö.
13 “The ihumuthi kö.
14 “The nyixetë kö.
15 “The atrekënö kö.
16 “The sili trengathoine kö la atre lapa ezi eö.
17 “The tro kö eö a mecipine la uma ne la atre lapa ezi eö. The tro kö eö a meciune la föe ne la atre lapa ezi eö, me hlue i angeic trahmanyi me föe, me kau i angeic, me boliko i angeic, me nöjei ewekë i angeic.”
18 Nge drenge hë la nöj asë la hedreng me trutru. Nge öhne hi angatre la itre samek, memine la kola so la wetr. Qa ngöne lai, angatr a hmengöhmengöne me cil ananyin. 19 Öni angatre jë hi koi Mose ka hape: “Ewekë jë eö koi hun, nge tro huni a drei eö, ngo tha tro kö Akötresie a ithanata koi hun, wanga meci pi hun.” 20 Ame hnei Mose hna qaja kowe la nöj ka hape: “The xou kö, ke kola tupathi epuni hnene la nyipi Akötresie, matre tro pala hi epuni a xoue nyidrë, nge tha tro hmaca kö epuni a kuca la ngazo.” 21 Matre hnene la nöj hna cil e gaa nany, ame hnei Mose hna easenyine la iaw ka mit, lo hna acil hnene la nyipi Akötresie.
22 Nge öni Iehova koi Mose: “Hane hi la nyine tro eö a qaja koi angetre Isaraela, ‘Öhne hë epuni laka, hnenge hna ithanata me epuni qa hnengödrai. 23 The tro kö epuni a xupi haze sileva, nyine troa thili kow ezi eni. Nge the tro kö epuni a xupi haze gool. 24 Qa i eö troa xupi ita ne huuj dro koi ni. Nge hun ej, tro eö a dreuthe la itre huuje ne dreuth asë koi ni, me itre huuj ne tingetinge* i eö, me itre mamoe trahmany, me itre kau trahmanyi* eö. Ngöne la nöjei götrane tro ni a amekunëne la ëjeng, tro ni a traqa koi eö, me amanathithi eö. 25 Nge maine tro eö a kuca la ita ne huuj hnei etë koi ni, tha tro kö eö a huliwane la etë hna thupathupa, ke e huliwane hë eö la jia ne huliwa i eö hun ej, tro hë eö a tha ahmitrötrën ej. 26 Nge the tro kö eö a elë jëne la itre ija kowe la ita ne huujeng, matre tha tro kö a öhne la götran ka hmitrötr i eö.*