Salamo
Masekil* i Asafa.
78 Nöjenge fe, drenge ju la wathebong;*
Hnangenyëne jë la itre trengewekë ne la qeng.
2 Tro ni a fe la qeng matre qaja la ketre edromë.
Tro ni qaja la itre xötra* ka traqa ekö.
3 Ame la hne huni hna dreng me atre,
Lo hna ini huni hnene la itre keme hun,
4 Tha tro kö huni a juetrëne kowe la itre matra i angatr;
Tro huni a porotrikën kowe la itre xötr elany
La itre huliwa i Iehova nyine atrun me trengecatre i nyidrë,
Ene la nöjei huliwa nyine hain hnei nyidrëti hna kuca.
5 Hnei nyidrëti hna acile la nyine amekunën e Iakobo
Me acile la ketre wathebo e Isaraela;
Hnei nyidrëti hna ahnith kowe la itre qaaqaa së
Troa inine la itre ewekë cili kowe la itre nekö i angatr,
6 Matre troa atre hnene la itre xötr ka troa traqa,
Ene la itre nekönatr hna troa hnahon.
Tro pena ha angatr a qaja itre ej kowe la itre nekö i angatr.
7 Tro hë angatr a mejiune koi Akötresie.
Tha tro kö angatr a thëthëhmine la itre huliwa i Akötresie
Ngo tro pe angatr a trongëne la itre hnei nyidrëti hna amekötin.
8 Matre tha tro kö angatr a tune la itre qaaqaa i angatr,
Ketre xötr ka pi hun nge ka icilekeu,
Ketre xötr ka saze mekun* lapaa
Nge ka tha mele nyipici koi Akötresie ngöne la itre mekuna i angatr.
9 Hnene la angetre Eferaima hna cile fë tane pehna,
Ngo hna lep abëekë angatr ngöne la ijine isi.
10 Tha hnei angatre kö hna metrötrëne la isisinyikeu i Akötresie
Nge xele kö angatr ma trongëne la wathebo i nyidrë.
11 Hnei angatre fe hna thëthëhmine lo hnei nyidrëti hna kuca,
Ene lo itre huliwa nyine hain hnei nyidrëti hna amamane koi angatr.
12 Hnei nyidrëti hna kuca la itre huliwa nyine hain,
Qëmekene la itre qaaqaa i angatr e Aigupito, ngöne la nöj e Zoana.*
13 Hnei nyidrëti hna thawaluëne la hnagejë matre nyi jë i angatr,
Nge hnei nyidrëti hna acilëne la itre tim kösë lue ihag.
14 Ame e lai, hnei nyidrëti hna eatrongë angatr jëne la ketre iaw
Nge ame jidr, jëne la ehudrumene la eë.
15 Hnei nyidrëti hna akaqane la itre git ngöne la hnapapa,
Me apatrene la trenge pi ij i angatr, kösë hna thue ime i angatr hnei tim ka jui.
16 Hnei nyidrëti hna axulune la itre tim qa ngöne la git
Me akacane la tim tune la itre hneopegejë.
17 Ngo hnei angatre pala hi hna kuca la ngazo qëmekei nyidrë
Ene la troa icilekeu memine la Ka Draië Catr ngöne la hnapapa;
18 Hnei angatr hna tupathi Akötresie ngöne la itre hni i angatr
Ngöne la angatr a iele fë la hnei angatr hna pi xen.
19 Celë hi matre, hnei angatr hna qajangazo Akötresie,
Me hape: “Atreine kö Akötresie thua i easë* ngöne la hnapapa?”
20 Ke eje hi, hnei nyidrëti hna lepe la git
Matre axulune la tim me itre tim ka cua.
“Ngo hapeu, ijiji nyidrëti fe troa thue falawa së,
Me hamë mitr nyine thuane la nöje i nyidrë?”
21 Ame hë la Iehova a drei angatr, hnei nyidrëti hna elëhni;
Palulu hë la eë koi Iakobo,
Nge xulu hë la elëhni i nyidrë koi Isaraela
22 Ke tha hnei angatre kö hna lapaune koi Akötresie;
Tha hnei angatr kö hna mejiun laka, atreine hi nyidrë troa amele angatr.
23 Ame hnei nyidrëti hna amekötine kowe la itre iaw e koho hnengödrai,
Me fe la itre qëhnelö ne la hnengödrai.
24 Hnei nyidrëti hna kuca matre trotro pi la mana nyine a i angatr;
Hnei nyidrëti hna hamë angatr la qitr qa hnengödrai.
25 Matre hnene la itre trahmany hna xeni la falawa ne la itre atr ka catr;*
Hnei nyidrëti hna hamëne la ka ijij matre tro angatr a xeni mej.
26 Hnei nyidrëti hna amejën e hnengödrai la enyi ne koië
Me axulune la eny ne kolojë hnene la mene i nyidrë.
27 Nge hnei nyidrëti hna kuca matre trotro pi la mitr tune la so ne dro,
Ene lo itre waco tune la ngöni ne hnagejë.
28 Hnei nyidrëti hna amalane itre ej nyipine la lapa i nyidrë,
Me xötreithe la itre itate i nyidrë.
29 Ame hnei angatr hna öni uti hë la cipa qa la itre hni i angatr;
Hnei nyidrëti hna kapa la aja i angatr.
30 Ngo qëmekene troa lapa kötre la aja i angatr,
Nge hetre mitre pala kö ngöne la itre që i angatr,
31 Hna xulu la elëhni Akötresie koi angatr.
Hnei nyidrëti hna humuth la itre trahmany ka catr;
Hnei nyidrëti hna lepe humuth la itre nekö trahmany ne Isaraela.
32 Ngazo pe, hnei angatre hmaca kö hna kuca la ngazo
Nge tha hnei angatre kö hna lapaun kowe la itre huliwa nyine haine i nyidrë.
33 Ame hnei nyidrëti hna apatrene la itre drai i angatr tune la hnamano,
Me itre macatre i angatr hnene la itre ewekë hna xouen ka iasesëkötrë.
34 Ngo ame ngöne la nöjei ijine nyidrëti a humuth la itre xan thei angatr, hnei angatre hmaca hna thele nyidrë;
Hnei angatre hna bëeke hmaca me thele Akötresie,
35 Ke mekune hë angatr laka, Akötresieti la Giti angatr
Nge ame la Akötresie ka draië catr, nyidrëti la Atre Itö Mele* i angatr.
36 Ngo hnei angatr hna thele troa iaö nyidrë hnene la itre që i angatr
Me thoi koi nyidrë hnene la itre thineme i angatr.
37 Tha cile huti kö la itre hni i angatr koi nyidrë;
Nge tha mele nyipici kö angatr kowe la isisinyikeu i nyidrë.
38 Ngo ka utipine pe nyidrë;
Hnei nyidrëti hna nue* la itre ngazo i angatr, ngo tha hna apatrenyi angatre kö.
Hnei nyidrëti hna anyimua xomihni angatr
Ngo tha hnei nyidrëti kö hna nu asë la trenge hni i nyidrë.
39 Ke hnei nyidrëti hna mekun laka, itre atre hi angatr,
Ketre uqanyin ne enyi ka tro nge ka tha bëeke kö.*
40 Hnei angatr hna anyimua icilekeu me nyidrë ngöne la hnapapa
Me akötrëne la hni i nyidrë ngöne la itre gaa qaqacil!
41 Hnei angatr hna anyimua tupathi Akötresie,
Me ahleuhleune la Ka Hmitrötr e Isaraela.
42 Thëthëhmine hë angatr la mene* i nyidrë,
Memine lo drai hnei nyidrëti hna amele* angatr qaathene la ithupëjia,
43 Thëthëhmine hë angatr la itre hatren hnei nyidrëti hna kuca e Aigupito
Me itre iamamanyikeu i nyidrë ngöne la nöje Zoana,
44 Nge hnei nyidrëti hna saze la tim koi madra ngöne la itre jë i tim ne la hneopegejë Nil
Matre pëkö ala cas ka atreine iji qa ngöne la itre qeqe ne tim i angatr.
45 Hnei nyidrëti hna upe la itre neng* troa heje la angetre Aigupito
Me itre grenui troa ajolë angatr.
46 Hnei nyidrëti hna hamëne kowe la itre sipa la itre hnei angatr hna menuën,
Memine la thangane la itre huliwa i angatr kowe la ume sipa.
47 Hnei nyidrëti hna angazone la itre hlapa vine i angatr hnene la wene mani ka catr
Me itre sukamore hnene la itre wene mani ka catr.
48 Hnei nyidrëti hna nue la itre öni i angatr kowe la wene mani ka catr
Me itre si i angatr kowe la samek.*
49 Hnei nyidrëti hna axulune la trenge elëhni nyidrëti koi angatr,
Ene la elëhni, me wesitr, me akötr,
Nge hnei nyidrëti hna upe la itre angela troa tro fë trongëne la akötr.
50 Hnei nyidrëti hna hnëkë gojeny thatraqane la elëhni nyidrë.
Tha hnei nyidrëti kö hna cipane la meci koi angatr;
Nge hnei nyidrëti hna nue* angatr kowe la meci ka ixötrekeu.
51 Thupene lai, hnei nyidrëti hna humuthe la itre hna pane hnahon e Aigupito,
Ene la qaane la ijine hnaho i angatr fene la itre itate i Hama.
52 Ame hnei nyidrëti hna troxome la nöje i nyidrë tune la itre öni ka co
Me engë angatr ngöne la hnapapa.
53 Hnei nyidrëti hna eatrongë angatr me thupë angatr,
Matre pëkö xou i angatr;
Nge hnene la hnagejë hna hetine la itre ithupëjia me angatr.
54 Nge hnei nyidrëti hna tro sai angatr kowe la zi i nyidrë ka hmitrötr,
Lo nöj gaa draië hnei nyidrëti hna thapa hnene la ime maca i nyidrë.
55 Hnei nyidrëti hna helëne la itre nöj qëmekei angatr;
Hnei nyidrëti hna thue zi i angatr memine la eno nyine tuluth;
Hnei nyidrëti hna alapane la itre tribu i Isaraela ngöne la itre uma i angatr.
56 Ngo tha mano kö angatr tupath lo Akötresie Ka Draië Catr me icilekeu me nyidrë;
Tha semesinene kö angatr la itre hna amexej* hnei nyidrë.
57 Hnei angatr hna jea qa ngön itre ej me thoi tune lo itre qaaqaa i angatr.
Thatreine kö troa mejiune koi angatr tune la pehna ka nunu.
58 Hnei angatr pala hi hna aelëhni nyidrë hnene la itre hnë hmi gaa hmitrötr* i angatr,
Me amejëne la trenge hni* nyidrë hnene la itre idrola i angatr hna tratraun.
59 Hnei Akötresieti hna dreng me elëhni,
Ame hnei nyidrëti hna nuetriji Isaraela.
60 Hnei nyidrëti hna trotrije la uma maano e Silo,
Ene lo itat hnei nyidrëti hna lapan nyipine la itre atr.
61 Hnei nyidrëti hna nue troa kötre fë la hatrene la catre i nyidrë;
La lolo i nyidrë kowe la ime ne la ithupëjia.
62 Hnei nyidrëti hna nue la nöje i nyidrë kowe la taua
Me elëhni kowe la edrö i nyidrë.
63 Hnene la eë hna dreuthe la itre nekö trahmany,
Nge pëkö nyima ne faipoipo hna nyimane kowe la itre jajiny.*
64 Hna kei la itre atre huuje i nyidrë hnei taua,
Nge tha hna treije pi angatre kö hnene la itre föi angatr.
65 Hnei Iehova hna hlë, kösë hnei nyidrëti hna meköl,
Tune la ketre atr ka catr nge ka hlë thupen la hna iji waina.
66 Nge hnei nyidrëti hna wej abëekëne la itre ithupëjia me nyidrë;
Hnei nyidrëti hna nue angatr kowe la hmahma uti hë epine palua.
67 Hnei nyidrëti hna thipetrije la itat i Iosefa;
Tha iëne kö nyidrëti la tribu i Eferaima.
68 Ngo hnei nyidrëti pe hna iëne la tribu i Iudra,
Ene la wetre Ziona, lo hnei nyidrëti hna hnim.
69 Hnei nyidrëti hna acile hutine la uma ne hmi i nyidrë tune la itre hnengödrai,*
Nge tune la ihnadro, hnei nyidrëti hna acilën ej uti hë epine palua.
70 Hnei nyidrëti hna ië Dravita hlue i nyidrë
Me xomi angeic qa ngöne la itre hna axö mamoe,
71 Lo götran hnei angeic hna thupëne la itre ithinene mamoe;
Hnei nyidrëti hna kuca matre tro angeic a thupë Iakobo, lo nöje i nyidrë,
Me Isaraela, lo edrö i nyidrë.
72 Hnei angeic* hna iuji angatr cememine la hni ka nyipici,
Me eatrongë angatr hnene la ime i angeic ka maca.