Ezekiela

20 Ngo ame ngöne la hna 7 ne macatre, ngöne la drai 10 ne la hna 5 ne treu, hnene la itre qatre ne Isaraela hna traqa troa lapa qëmekeng matre hnying koi Iehova. 2 Matre hnei Iehova hna ithanata koi ni me hape: 3 “Nekö i atr, ithanata jë kowe la itre qatre ne Isaraela, nge hape jë: ‘Hane hi la hna qaja hnei Iehova Joxu Ka Sisitria: “Epuni kö a traqa troa hnyinge koi ni? ‘Maine nyipici laka, ka mele ni, tha tro kö ni a sa koi epun,’ öni Iehova Joxu Ka Sisitria.”’

4 “Ka hnëkë kö eö troa ameköti angatr? Nekö i atr, ka hnëkë kö eö troa ameköti angatr? Qaja amamane jë koi angatr la itre ewekë ka ngazo hna kuca hnene la itre qaaqaa i angatr. 5 Hape jë koi angatr: ‘Hane hi la hna qaja hnei Iehova Joxu Ka Sisitria: “Ame lo eni a ië Isaraela, hnenge hna sisinyi* kowe la itre matra i Iakobo, nge hnenge hna mama koi angatr e Aigupito. Eje hi, hnenge hna sisinyi koi angatr me hape: ‘Eni Iehova Akötresi epun.’ 6 Ngöne la drai cili, hnenge hna sisiny troa amele angatr qa Aigupito, me tro sai angatr kowe la ketre nöj hnenge hna thele* thatraqai angatr, ketre nöj gaa neni la melek me miel. Ka mingöminge* catre kö la nöje cili hune la itre xaa nöj. 7 Thupene lai, öning koi angatr: ‘Qa i epun troa isa nuetrije la itre ewekë ka ngazo qëmekei epun; the adronyi epuni kö hnene la itre idrola ka sis* ne Aigupito. Eni Iehova Akötresi epun.’

8 “‘“Ngo hnei angatr hna icilekeu me eni, nge tha hnei angatre kö hna drei ni. Tha hnei angatre kö hna nuetrije la itre ewekë ka ngazo qëmekei angatr, nge xele kö angatr ma nue la itre idrola ka sis ne Aigupito. Matre hnenge hna sisiny troa nenge la elëhning me wesitreng hui angatr e Aigupito. 9 Ngo hnenge hna kuca lai pine la ëjeng, matre tha tro kö a adron ej qëmeken la itre nöj hnei angatr hna mele ngön. Eje hi, hnenge hna mama koi angatr qëmekene la itre nöje cili, ngöne lo eni a amele angatr qa Aigupito. 10 Aqane amele angatre hi ni lai qa Aigupito, me tro sai angatr ngöne la hnapapa.

11 “‘“Thupene lai, hnenge hna hamë angatr la itre wathebong me itre hnenge hna amekötin,* matre tha tro kö a meci la atre drengethenge itre ej. 12 Hnenge mina fe hna hamë angatr la itre sabathing nyine hatrene koi ni me angatr, matre tro angatr a atre laka, eni Iehova la ka ahmitrötrë angatr.

13 “‘“Ngo hnene la nöje Isaraela hna icilekeu me eni ngöne la hnapapa. Tha metrötrëne kö angatr la itre wathebong, nge hnei angatr hna nuetrij la itre hnenge hna amekötin (ngacama jëne itre ej, tha tro kö a meci la atre idrengethenge.) Nge hnei angatre hnyawa hna adrone la itre sabathing. Matre hnenge hna sisiny troa nenge la elëhning hui angatr ngöne la hnapapa, matre apatrenyi angatr. 14 Hnenge hna kuca lai pine la ëjeng, matre tha tro kö a adron ej qëmeken la itre nöj ka öhne la eni a amele angatr qa Aigupito. 15 Nge ngöne la hnapapa, hnenge fe hna sisiny ka hape, tha tro kö ni a alö angatr ngöne lo nöj hnenge hna hamë angatr (ketre nöj gaa neni la melek me miel, nge ka mingöminge* catre kö hune la itre xaa nöj). 16 Eje hi, hnei angatr hna nuetrij la itre hnenge hna amekötin, me tha metrötrëne la itre wathebong, me adrone la itre sabathing, ke ka tru kö koi angatr la itre idrola i angatr ka sis.

17 “‘“Ngo hnenge* hna utipi angatr, matre tha apatrenyi angatre ju kö ni. Waea, tha hnenge ju kö hna apatrenyi angatr ngöne la hnapapa. 18 Öning kowe la itre nekö i angatr ngöne la hnapapa: ‘The drengethenge kö la wathebo ne la itre qaaqaa i epun, the trongëne kö la itre hnei angatr hna amekötin, nge the adronyi epuni kö hnene la itre idrola i angatr ka sis. 19 Iehova ni Akötresi epun. Drengethenge ju la itre wathebong, xötrethenge jë nge trongëne jë la itre hnenge hna amekötin. 20 Ahmitrötrëne jë la itre sabathing, nge tro itre ej a nyine hatrene koi ni me epun. Matre tro epuni a atre laka, Iehova ni Akötresi epun.’

21 “‘“Ngo hnene la itre nekön hna icilekeu me eni. Tha metrötrëne kö angatr la itre wathebong, nge tha hnei angatre kö hna xötrethenge me trongëne la itre hnenge hna amekötin (ngacama jëne itre ej, tha tro kö a meci la atre idrengethenge.) Hnei angatr hna adrone la itre sabathing. Matre hnenge hna sisiny troa nenge la elëhning me wesitreng hui angatr ngöne la hnapapa. 22 Ngo hnenge hna xomihni, me kuca matre tha tro kö a adrone la ëjeng qëmeken la itre nöj ka öhn lo eni a amele angatr qa Aigupito. 23 Ame pe, hnenge hna sisiny koi angatr ngöne la hnapapa, troa aisa angatr ngöne la nöjei nöj me aisaije angatr ngöne la itre nöj. 24 Eje hi, tha metrötrëne kö angatr la itre hnenge hna amekötin. Hnei angatr hna nuetrije la itre wathebong, me adrone la itre sabathing. Nge ka tru* kö koi angatr la itre idrola ka sis ne la itre qaaqaa i angatr. 25 Hnenge mina fe hna nue angatr troa trongëne la itre wathebo ka tha loi kö, me itre hna amekötin ka tha thupëne kö la mele i angatr. 26 Nge hnenge hna nue angatr troa puingazo hnene la itre huuje i angatr, ngöne lo angatr a dreuthe* la itre pane nekö i angatr, matre tro angatr a akötr, me atre laka, Iehova ni.”’

27 “Celë hi matre nekö i atr, ithanata jë kowe la nöje Isaraela me hape: ‘Hane hi la hna qaja hnei Iehova Joxu Ka Sisitria: “Celë hmaca kö la aqane qaqa ni hnene la itre qaaqaa i epun: hnei angatr hna mele thoi koi ni. 28 Hnenge hna lö sai angatr ngöne la nöj hnenge hna thingehnaean koi angatr. Ame lo angatr a öhne la itre sasala ka draië me itre sinöe ka cia hlöeë, hnei angatr hna tro fë la itre huuj, me ahnahna i angatr hna sisin. Hnei angatr hna tro fë huuj ka pui loi, me waina nyine fii huuj. 29 Öninge jë hi koi angatr: ‘Epuni a ue e celë ngöne la hnë hmi gaa hmitrötr? (Hna hëne pala hi enehila ka hape, Hnë Hmi Gaa Hmitrötr.)’”’

30 “Celë hi matre, qaja jë kowe la nöje Isaraela: ‘Hane hi la hna qaja hnei Iehova Joxu Ka Sisitria: “Tune lo itre qaaqaa i epun, epuni a puingazo hnene la hna atrun la itre idrola ka sis i angatr, matre epuni fe hë a hane kuci ngazo memine la itre xaa haze. 31 Nge enehila pala hi, epuni a adronyi epun la epuni a huujën* kowe la itre idrola i epun ka sis, la itre nekö i epun trahmany. Nge ame la mekuna i epun, tro ni a kapa la itre sipo i epun?”’

“‘Maine nyipici laka, Akötresie ka mele ni,’ öni Iehova Joxu Ka Sisitria, ‘tha tro kö ni a drei epun. 32 Nge tha tro kö a eatr la mekuna i epun celë: “Loi e tro sa tune la itre xaa nöj, me itre xaa fami ne la itre nöj, ka hmi* kowe la sinöe me etë.’”

33 “‘Maine nyipici laka, ka mele ni,’ öni Iehova Joxu Ka Sisitria, ‘tro ni a musi hui epun hnene la ecatrene la iwanakoimeng, memine la emenene la imeng,* me etrune la trengehning. 34 Eje hi, jëne la ecatrene la iwanakoimeng, memine la emenene la imeng, me etrune la trengehning, tro ni a xomi epun qa ngöne la itre nöj, me acasi epun qa ngöne la itre götran hna aisaije epuni kow. 35 Tro ni traqa sai epun kowe la hnapapa ne la itre nöj, me cil qëmekei epun matre ameköti epun.

36 “‘Tune lo aqane amekötine ni la itre qaaqaa i epun ngöne la hnapapa e Aigupito, tro fe ni a hane ameköti epun,’ öni Iehova Joxu Ka Sisitria. 37 ‘Tro ni a engë epun hnene la tö ne la atre thupë mamoe, me upi epuni troa metrötrëne* la isisinyikeu. 38 Ngo ame lo itre ka icilekeu me ka kuca la ngazo qëmekeng, tro ni a xometriji angatr qaathei epun. Eje hi, tro ni a tro xomi angatr qa ngöne la nöj hnei angatr hna lapa trenyiwa ngön, ngo tha tro kö angatr a tro Isaraela. Nge tro hë epuni a atre laka, Iehova ni.’

39 “Ngo ame kö epun nöje Isaraela, hane hi la hna qaja hnei Iehova Joxu Ka Sisitria: ‘Isa tro jë hö epun troa nyihluene la itre idrola i epuni ka sis! Ngo maine tha drei ni kö hnei epuni e thupen, tha tro hmaca kö epuni a adrone la ëjeng hnene la itre huuj, me itre idrola i epun ka sis.’

40 “‘Ke tro la nöje Isaraela asë a nyihlueng ngöne la nöj, hune la wetreng ka hmitrötr, me hune la wetr ka draië e Isaraela,’ öni Iehova Joxu Ka Sisitria. ‘E cili, tro angatr a amadrinë ni, nge tro ni a sipo ahnahna koi epun, memine la itre huuje i epun ka sisitria,* lo nöjei ewekë i epun ka hmitrötr. 41 Nge tro hë epuni a amadrinë ni, jëne la itre huuje i epun ka pui lolo, ngöne la eni a tro xomi epun qa ngöne la itre nöj, me acasi epun qa ngöne la itre götran hna aisaije epuni kow; eje hi, tro ha ahmitrötrë ni qëmekene la itre nöj.’

42 “‘Nge tro hë epuni a atre laka, Iehova ni, e tro ni a bëeke sai epuni a tro Isaraela, lo nöj hnenge hna sisiny troa hamën kowe la itre qaaqaa i epun. 43 E cili, tro epuni a mekune hmaca la aqane ujë i epun me itre huliwa i epuni ka apuingazo epun. Nge tro hë epuni a sisi epuni* kö, pine la nöjei ewekë ka ngazo hnei epuni hna kuca. 44 Nge tro hë epuni a atre, nöje Isaraela laka, Iehova ni, nge eni a kuca lai pine la ëjeng, ngo tha pine kö la itre aqane ujë i epun ka ngazo, me itre thiina ka sis i epun,’ öni Iehova Joxu Ka Sisitria.”

45 Thupene lai, hnei Iehova hmaca hna ewekë koi ni, me hape: 46 “Nekö i atr, xei jë a tro kolojë. Tro fë jë la maca celë thatraqane la götrane kolojë, nge perofetane jë kowe la hnaxulu ne la hlapa e kolojë. 47 Hape jë kowe la hnaxulu ne kolojë: ‘Drenge ju la maca i Iehova. Hane hi la hna qaja hnei Iehova Joxu Ka Sisitria: “Tro ni a amelene la ketre eë koi ö, nge tro ej a dreuthe la nöjei sinöe i ö ka hatr me ka mec. Tha tro kö a pi la ecatrene la ukahlokin, nge tro ej a dreuth la nöjei iqëmek qa kolojë uti hë kolopi. 48 Nge tro hë la nöjei atr* a öhne laka, eni Iehova la ka amelene la eë celë, nge tha tro jë kö ej a pi.”’”

49 Ame hnenge hna sa ka hape: “Ekölöhini Iehova Joxu Ka Sisitria! Hane hi la hnei angatr hna qaja göi ni: ‘Angeic pala hi a ijelaxötra*!’”