Deuteronomi

1 Hane hi la hna qaja hnei Mose kowe la angetre Isaraela asë, ngöne la nöje Ioridrano, ngöne la hnapapa qëmekene la hnapapa e Sufe, nyipine Parana, me Tofel, me Labana, me Hazeroth, me Dizahab. 2 Nge qa Horeba* a tro Kadesi-Banea, troa e la 11 lao drai ne trongë ihnadro qa ngöne la gojenyi ne tro kowe la Wetre Seira. 3 Ngöne la hna 40 ne macatre, ngöne la pane drai ne la hna 11 ne treu, hnei Mose hna qaja kowe la angetre Isaraela la nöjei ewekë hnei Iehova hna upi angeic troa qaja. 4 Kolo thupene lo angatr a lepi Sihona joxu i angetre Amora ka lapa e Hesebona, me Oga joxu ne Basana, ka lapa e Aseterotha, e Ederei. 5 Ame ngöne la götrane Ioridrano, ngöne la nöje Moaba, hnei Mose hna nyiqaane qejepengöne la trenge Wathebo. Öni angeic:

6 “Ame e Horeba, hnei Iehova Akötresi së hna qaja ka hape: ‘Loi hë hnei epuni hna lapa ngöne la itre wetre celë. 7 Qa i epuni troa tro kowe la itre Wetr ne la angetre Amora, me itre nöj ka lapa ezin: ene la Araba,* memine la itre wetr, memine la Sefela, memine la Negeb, me itre ngönegejë trootro. Celë hi nöj ne la angetre Kanana. Nge tro epuni a tro e Lebanona* uti hë la hneopegejë ka tru, ene la hneopegejë Euferate. 8 Goeën: Ase hë ni amë la nöj qëmekei epun. Tro jë troa thapa la nöj hnei Iehova hna sisiny troa hamën kowe la itre keme i epun, ene Aberahama, me Isaaka, me Iakobo, me kowe la itre matra i angatr.’

9 “Ngöne la ijine cili, hnenge hna qaja koi epun ka hape: ‘Thatreine kö ni troa thue casi epun, 10 ke hnei Iehova Akötresi epun hna kuca matre mana pi epun, nge ala nyimu hë epuni enehila, tune la itre wëtresij ne hnengödrai. 11 Epi tro Iehova Akötresie ne la itre qaaqaa i epun a amanathithi epun, me amananyi epun matre ala nyimu jë epun, tune lo hnei nyidrëti hna sisiny. 12 Ngo tune kaa la aqane tro ni a xomihnine casi epun, me itre iwesitrë i epun? 13 Iëne jë ngöne la itre tribu i epun, la itre trahmanyi ka inamacan, nge ka atreine waiewekë, me ka macaj. Nge tro ni a acili angatr nyine tan thatraqai epun.’ 14 Matre sa jë hi epun ka hape: ‘Ka loi hi la hnei ö hna qaja.’ 15 Celë hi matre hnenge hna xome la itre tan ne la itre tribu i epun, itre ka inamacan me ka macaj, nge hnenge hna acili angatr nyine tan thatraqai epun: itre tan ne la ala 1 000, me itre tan ne la ala 100, me itre tan ne la ala 50, me itre tan ne la ala 10, me itre ka mus ngöne la itre tribu i epun.

16 “Ngöne la ijine cili, hnenge hna amekötin kowe la itre ka iameköti thei epun ka hape: ‘Thupen la epuni a dreng la itre trejin me epun a qaja la jole i angatr, amekötine jë thenge la meköt, kowe la trahmany memine la trejin me angeic, me kowe la trenyiwa ka lapa thei epun. 17 Tha tro kö epuni a ië hna hnim ngöne la epuni a iameköti. Qa i epuni pe troa drenge la ka co memine la ka tru. Nge tha tro kö epuni a xoue atr, ke qaathei Akötresieti la iameköti. Nge maine hace pala ha la ketre jole koi epun, tro hë epuni a tro fë koi ni, nge tro ni a dreng.’ 18 Ngöne la ijine cili, hnenge hna hamë epun la itre hna amekötin göne la nöjei huliwa nyine tro epuni a kuca.

19 “Thupene lai, hne së hna tro qa Horeba me sasaithe la hnapapa ka tru nge hna mecin, ngöne lo easa tro kowe la itre Wetre i angetre Amora, tune lo hnei Iehova hna amekötin koi së. Ame hne së hna traqa e Kadesi-Banea. 20 Nge e cili, öning koi epun: ‘Traqa ha epun kowe la itre wetre i angetre Amora, lo hnei Iehova Akötresi së hna hamën koi së. 21 Goeën: Iehova Akötresi epun a nue la nöj koi epun. Elë jë hë troa thapa la nöj, tune lo hna amekötin hnei Iehova, Akötresi ne la itre qaaqaa i epun. The xou kö, nge the hmengöhmengöne kö.’

22 “Ngo hnei epuni asë hna traqa koi ni me hape: ‘Pane upe pi la itre xaa trahmany troa goeëne la nöj, matre tro angatr a bëeke fë la itre ithuemacany göne la gojeny nyine tro sa xom, memine la itre traon e cili.’ 23 Nge öning, nyipici hi lai hnei epun hna qaja; matre hnenge pë hë hna iëne la 12 lao trahmany, cas qa ngöne la isa ca tribu. 24 Hnei angatr hna elëne la itre wetr, nge traqa ju hi angatr ngöne la hnathup e Esekolo. Nge e cili, hnei angatr hna pane waipengöne la nöj. 25 Nge hnei angatr hna huje la itre xaa wene sinöe qa cili, me traqa fë koi së, me hape: ‘Lolo catre la nöje hnei Iehova Akötresi së hna hamën koi së.’ 26 Ngazo pe, xele kö epuni ma elë, nge hnei epuni hna icilekeu memine la hna amekötin hnei Iehova Akötresi epun. 27 Tha mano kö epun nyiulil ngöne la itre itate i epun me hape: ‘Iehova a methinë së. Celë hi matre hnei nyidrë hna xomi së qa Aigupito, troa nue së kowe la imene la angetre Amora, me lep apatrenyi së. 28 Matre, ka tune kaa la götran hne së hna tro kow? Ke hnene la itre trejin me easë hna ajolëne la hni së, lo öni angatre ka hape: “Ame la nöje cili, ke nöje ka draië kö, nge ka catre kö hui easë. Nge ame la itre traone i angatr, ke ka tru catre kö, nge hna eköhagen uti hë e hnengödrai.* Nge hne huni fe hna öhn e cili la itre nekö i Anaka.”’

29 “Matre öninge jë hi koi epun: ‘The hmengöhmengöne kö, nge the xoue angatre kö. 30 Tro kö Iehova Akötresi epun a tro qëmekei epun, me isigöli epun, tune lo hnei nyidrëti hna kuca qëmekei epun e Aigupito. 31 Nge ngöne la hnapapa, öhne hnyawa hi epun la aqane kuca i Iehova Akötresi epun, lo nyidrëti a xepi epun tune la kem a xepe la kuku, ngöne la nöjei jë i epun, uti hë la epuni a traqa ngöne la götrane celë.’ 32 Ngo ame pe, tha lapaune kö epun koi Iehova Akötresi epun, 33 ngacama nyidrëti hi la ka tro qëmekei epun, matre thele hnë lapa i epun. Hnei nyidrëti pala hi hna mama koi epun jëne la eë e jidr, me jëne la iaw e lai, matre köja gojenyi epun.

34 “Ngöne la ijine cili, dreng asë hi Iehova la hnei epuni hna qaja. Matre hnei nyidrëti hna elëhni me sisinyi ka hape: 35 ‘Pëkö tro la ketre trahmany qa ngöne la xötre ka ngazo celë, a hane öhne la nöje ka lolo hnenge hna sisiny troa hamën kowe la itre keme i epun, 36 ngo Kaleba hi nekö i Iefune. Tro angeic a öhne la nöj, nge tro ni a hamë angeic me itre nekö i angeic, la götran hnei angeic hna trongën, ke hnei angeic hna drengethenge Iehova hnyawa. 37 (Zö i epun la Iehova a elëhni koi ni, me hape: ‘Ketre tui ö fe, tha tro kö eö a hane lö kowe la nöj. 38 Ngo Iosua nekö i Nuna hlue i ö, la ka troa lö kowe la nöj. Haawe, aegöcatrenyi* angeice jë, ke angeice hi la ka troa lö sai Isaraela kowe la nöj hnei angatr hna troa kepe edrön.) 39 Ketre, ame lo itre nekö i epun, lo hnei epuni hna qaja ka hape, troa xomi angatr, memine la itre nekö i epuni trahmany ka thatre la loi me ngazo, ke angatre hi la ka troa lö kowe la nöj. Tro ni a hamën ej nyine zi i angatr. 40 Ngo ame kö epun, bëeke hmaca jë, nge xome jë la gojenyi ne tro kowe la Hnagejë ka Palulu, nge tro jë kowe la hnapapa.’

41 “Matre öni epuni jë hi koi ni: ‘Ase hë huni ngazo koi Iehova. Ngo eahuni hë la a elë troa isi, tune lo hnei Iehova Akötresie hna amekötin!’ Matre hnei epuni hna isa xomi jia ne isi, ke öni epuni pena kö, ka pë pengön la troa elëne la wetr. 42 Ngo öni Iehova koi ni: ‘Hape jë koi angatr: “The elë kö troa isi, ke tha ce eni kö me epun. Ngo maine tro epuni a tro, ke wai epuni kö hnene la itre ithupëjia.”’ 43 Haawe, hnenge hna ewekë koi epun, ngo xele kö epuni ma dreng. Hnei epuni pe hna icilekeu memine la hna amekötin hnei Iehova. Nge hnei epun hna pi tru, me catre fë troa elë hune la wetr. 44 Ame hnene la angetre Amora ka lapan la itre wetr, hna uti koi epun me helë epun, tune lo kola huzun la ketre atr hnene la ume bii. Hnei angatr hna helë epun qa Seira uti hë Horema. 45 Matre hnei epun hna bëeke hmaca me treij koi Iehova, ngo tha pi drei epuni kö hnei Iehova, nge goi tha semesine epuni fe hnei nyidrë. 46 Celë hi kepin matre hnei epuni hna lapa aqeanyi e Kadesi.