Hnaaluene Tus i Aqane Lapa Itre Joxu

1 Hnei Solomona nekö i Dravita hna acatren pala hi la musi nyidrë. Nge Iehova Akötresi Solomona a ce me nyidrë, matre ketre atre ka tru catre Solomona.

2 Ame hnei Solomona hna hë Isaraela asë: Itre tane la ala 1 000 me ala 100, itre atre amekötin, me nöjei tan e Isaraela, me itre tixe ne lapa. 3 Thupene lai, hnei Solomona memine la icasikeu asë hna elë a tro kowe la hnë hmi gaa hmitrötr e Gibeona, ke e cili la hna amë ekö la itat ne icasikeu ne la nyipi Akötresie, lo itat hnei Mose hlue i Iehova, hna kuca ngöne la hnapapa. 4 Ngo hnei Dravita hna elë fë la pua ne la nyipi Akötresie qa Kiriatha-iarim, a tro kowe la göhnë hnei nyidrëti hna hnëkën. Hnei Dravita hna hnëkë itat kowe la Pua e Ierusalema. 5 Nge ame la ita ne huuj kopa hna kuca hnei Bezaleli nekö i Uri, nekö i Huro, ke hna amë qëmekene la uma maano i Iehova. Nge hnei Solomona memine la icasikeu asë, hna lapaa hmi qëmekene la ita ne huuj* cili. 6 Matre hnei Solomona hna nyiqaane huuj e cili qëmeke i Iehova. Hnei Solomona hna huujëne la 1 000 lao huuj ne dreuth asë,* hune la ita ne huuj kopa ne la itat ne icasikeu.

7 Ngöne la jidri cili, hnei Akötresie hna mama koi Solomona me hape: “Nemene la nyine tro na hamë eö? Sipo ni jë!” 8 Ame hnei Solomona hna sa koi Akötresie ka hape: “Hnei nyipëti hna amamane la ihnimi nyipici i nyipë koi Dravita kemeng. Nge hnei nyipëti hna acili joxu ni troa nyihnai nyidrë. 9 Matre enehila Iehova Akötresie, epi troa eatr la hnei nyipëti hna sisinyi koi Dravita kemeng, ke hnei nyipëti hna acili joxu ni hune la nöj ka ala nyim, tune la xaxau ne la ihnadro. 10 Haawe, epi tro nyipëti a hamëne koi ni la inamacan me wangatrehmekun, matre tro ni a atreine xomiujine* la nöje ce. Ke eje hi, drei la ka atreine amekötine la nöje i nyipë, nöje ka ala nyimu catr?”

11 Ame hnei Akötresie hna sa koi Solomona ka hape: “Pine laka, aja i ö hi lai, nge tha hnei ö kö hna sipo trengamo, me ewekë, me iatruny, nge tha hnei ö kö hna sipone troa meci la itre ka methinë eö, nge tro eö a mel aqeany,* ngo hnei eö pe hna sipo inamacan, me wangatrehmekun troa amekötin la nöjeng, lo hnenge hna acili ö hun, 12 haawe, tro hë eö a kapa la inamacan me wangatrehmekun. Nge tro fe ni a hamëne la itre mo ka tru koi ö, me itre ewekë me iatruny, nge pëkö joxu hnapan nge e thupen ka troa hetrenyi lai tui ö.”

13 Ame hnei Solomona hna tro ju qa ngöne la hnë hmi gaa hmitrötr e Gibeona, lo hnë acil ekö la itat ne icasikeu, nge nyidrëti a bëeke jë a tro Ierusalema, me mus hui Isaraela. 14 Nge kolo pala hi a kökötre la etrune la itre ikatr me itre hos* i Solomona, matre traqa jë kö koi 1 400 lao ikatr, me 12000 lao hos. Nyidrëti a pane amë ju la itre xan ngöne la itre traon ne ami ikatr, nge itre xan e Ierusalema, ezine la hnalapa i nyidrë. 15 Hnei Solomona hna kuca matre tiqa pi e Ierusalema hnei sileva me gool, kösë itre wene etë, nge tiqa fe hnei sinöe arasi, kösë itre sukamore ne Sefela. 16 Hnei Solomona hna itöne la itre hose i nyidrë qa Aigupito. Nge itre ka saleme* i joxu a itöne la itre hos* kowe la ca thupen hna athip. 17 Nge ame la thupene la ca ikatr qa Aigupito, ke 600 pies sileva. Nge ame la thupene la ca hos, ke 150 lao pies sileva. Thupene lai, itre ka saleme i joxu a salemëne hmaca pi koi itre joxu ne Heth, me Suria.