Nahuma
1 Maca ne iameköti koi Nineve. Tusi ka qaja la hna meköle goeën hnei Nahuma,* atre Elekosi:
2 Iehova la Akötresie ka ajane troa nyihlue i nyidrëti hmekuje hi,* nge ka të la ngazo;
Iehova a të la ngazo, nge tro nyidrëti a amamane la elëhni i nyidrë.
Iehova a nyithupene kowe la itre ka icilekeu me nyidrë,
Nge nyidrëti a lapa fë trengehni kowe la itre ithupëjia me nyidrë.
3 Ka hmitre Iehova troa elëhni, ngacama atraqatre la mene i nyidrë,
Tha cile kö Iehova troa amekötine la itre atr ka thele ge.
Nyidrëti a tro* hnine la udreli me wene,
Nge itre iaw la so ne dro ka mejë fene la lue ca i nyidrë.
4 Nyidrëti a wesitrëne la hnagejë me aqaqacilën ej;
Nyidrëti a aqaqacilën la nöjei hneopegejë asë.
Kola fitre la Basana me Karemela,
Kola meci la itre iengen e Lebanona.
5 Itre wetr a hmengöhmengöne hnei nyidrë,
Nge hmu hë la itre sasala.
Tro la ihnadro a mejë draië hnene la iqëmeke i nyidrë,
Ene la ihnadro me itre ka lapan ej.
6 Drei la ka atreine cil kowe la elëhni i nyidrë?
Drei la ka atreine xomihnin la ecatrene la trengehni i nyidrë?
Tro ha mele la elëhni i nyidrë tune la eë ka dreuth asë,
Nge tro ha thë la itre etë atraqatr hnei nyidrë.
7 Ka lolo Iehova; nyidrëti la hnë zae ngöne la ijin akötr.
Nyidrëti a semesinene* la itre ka thele troa zae thei nyidrë.
8 Tro nyidrëti a lep apatrene la götrane cili* jëne la di atraqatr,
Nge tro ha wej la itre ithupëjia me nyidrë hnene la jidr.
9 Nemene la ngazo hnei epun hna mekun troa kuca koi Iehova?
Nyidrëti a apatren asë.
Tha tro kö a alua traqa la akötr.
10 Angatr a ijoli tune la itre ka ithiny,
Nge kösë angatr a hmo hna iji bier;*
Ngo tro ha dreuthetriji angatr tune la jez ka qaqacil.
11 Tro ha fetra qaathei ö la atr ka mekun troa akötrë Iehova,
Nge ka hamë eamo ka pë alien.
12 Matre hane hi la hna qaja hnei Iehova:
“Ngacama ka pexej nge ala nyimu angatr,
Ngo tro ha thupatrij me apatrenyi* angatr.
Ase hë ni thaipië eö,* ngo tha tro hmaca kö ni a thaipië eö.
13 Nge enehila, tro ni a axeciën la ehnef ne hlu ka ahacenyi ö,
Me seng la itre otretre i ö.
14 Ase hë Iehova amekötine göi ö* ka hape:
‘Tha tro hmaca kö ketre a xom la ëje i ö.
Tro ni a apatren qa hnine la uma hmitrötre ne la itre haze i ö, la itre idrola hna tratraun me ahmun.*
Tro hë ni a hnëkë hua i ö, ke cane mething eö.’
15 Hana cahmijë hune la itre wetr, la lue ca ne la atre tro fë maca ka loi,
Lo atre qeje tingeting.
Iudra fe, atrune jë la itre feete i ö, nge eatrëne jë la hnei ö hna sisiny,
Ke tha tro hmaca kö la atr ka ngazo a Iudra thenge.
Tro hë angeic a patre palua.”