Daniela
7 Ngöne la pane macatre i Belesaza joxu ne Babulona, hetre hnei Daniela hna puj me meköle goeën hune la ili i angeic. Thupene lai, hnei angeic hna fejan la hnei angeic hna puj; hnei angeic hna qaja asë. 2 Öni Daniela:
“Ame ngöne la itre hnenge hna meköle goeën e jidr, hnenge hna öhne la 4 lao enyi ne hnengödrai ka amejën la hnagejë ka tru. 3 Nge fetra pi hi la 4 lao öni atraqatr qa ngöne la hnagejë; isapengöne kö itre ej.
4 “Ame la pane öni, ke kösë liona, ngo ka hetre iape ne aeto. Eni pala kö a goeën, ame hna fejetrij la lue iapen ej; hna kapa draiën ej qa kuhu hnadro, me acilën ngöne la lue iwaca tune la atr, nge hna hamën ej la hni ne atr.
5 “Nge goeën! Hetre hnaaluene öni kösë bea. Ej a cil ez, ke hna amejën la ca waca, nge köni wengesisila ngöne la qën ej; hna qaja kow ej ka hape: ‘Cile jë, nge öni atrunyi jë la itre ijön.’
6 “Eni pala kö a goeën, nge mama pi hi la ketre öni kösë leopar, ngo hetre 4 lao iape ne waco ngöne la ju ne ej, me 4 lao he, nge hna hamën kow ej la mus.
7 “Thupene lai, hnenge hna meköle goeën e jidr, la hna 4 ne öni hna xouen nge ka iaxoueny, nge ka tru trengecatr, nge ka hetre nyö fao atraqatr. Ej a öni me pelikacan, me tro waja la munën. Isapengöne kö la öni celë memine lo itre öni hnapan; nge traqa koi 10 lao jian ej. 8 Eni pala kö a goeëne la itre jian, nge cia jë hi e kuhu nyipin la ketre neköi jian ka co, hna fejetrij qëmeken ej lo köni pane jian. Nge goeën! Hetrenyi hune la jiane cili la itre alamek kösë alameke ne atr, me që ka ithanata pi tru.*
9 “Eni pala kö a goeën, ame hna acil la itre theron, nge hnene la Atr Ka Hekö hna lapa. Ka wië la itre iheetre i nyidrë tune la kiona, nge ceitu la itre penehe i nyidrë me pene mamoe ka wië kaca. Itre ukahlokine eë la therone i nyidrë; nge eë ka mele catr la itre wiil ne la theron. 10 Kola neni me uti qëmekei nyidrë la hneopegejë eë. Ca milio a nyihlue i nyidrë, nge 100 milio a cile qëmekei nyidrë. Ame hna ilapany la itre atrene la Hnakootr, nge hna fe la itre itus.
11 “Eni pala kö a goeën, ke tru catre la mejene la jian ka qaja la itre trengewekë ka pi tru*; eni pala kö a goeën, ame hna humuthe pi la öni, me trij ej ngöne la eë, matre apatrenetrij. 12 Ngo ame kö la itre xaa öni, hna thapa la mus qaathei angatr, nge hna nue angatre pe troa mel koi ca ijin me ca hnepe ijin.
13 “Hnenge hna meköle goeën ngöne la jidr, la ketre atr kösë nekö i atr a ut hune la itre iaw ne hnengödrai; hna aijijë angeic troa tro kowe la Atr Ka Hekö, me lö sai angeic koi nyidrë. 14 Nge hna hamë angeic la mus, me lolo, me ketre baselaia, matre tro la nöjei atr, me nöjei nöj, me nöjei atr ka qaja la itre xaa qene hlapa a nyihlue i angeic. Ka epine palua la mus i angeic, nge ka pë pun. Nge tha tro kö a apatrene la baselaia i angeic.
15 “Nge ame ni Daniela, jole hë la hning pine la itre hnenge hna meköle goeën ka iaxoueny. 16 Matre hnenge pë hë hna easenyine la ketre thene la itre ka cil e cili, me hnyingë angeic la sipu aliene lai. Ame hnei angeic hna sa me qejepengöne koi ni:
17 “‘Ame la 4 lao öni atraqatre cili, ke kola nyihatrene la 4 lao joxu ka troa mejë e celë fen. 18 Ngo tro kö la itre atr ka hmitrötr ne la Ka Sisitria* a kapa la baselaia, me cilëne la baselaia uti hë epin, eje hi, epine palua.’
19 “Thupene lai, hnenge hna pi atre la pengöne la hna 4 ne öni ka isapengön memine lo itre xan. Ka iaxouenyi catr la öni cili memine la itre nyön ej fao, me itre itaime kopa; ej a öni me pelikacan, me tro waja la munën. 20 Nge hnenge fe hna pi atre la pengöne lo 10 lao jian hune la hen ej, memine lo jian ka cia trane lo köni xan; hetre itre alameken ej, me ketre që ka pi tru, nge kösë ka tru* kö ej hune la itre xan.
21 “Eni pala kö a goeën, nge hnene la jiane cili hna isi memine la itre atr ka hmitrötr. Catre kö ej hui angatr, 22 uti hë la kola traqa la Atr Ka Hekö troa iameköti, matre cilëgöline la itre atr ka hmitrötr ne la Ka Sisitria*; ame hna traqa la ijin hna sa kowe la itre atre ka hmitrötr troa kapa la baselaia.
23 “Hane hi la hna qejepengöne koi ni: ‘Ame la hna 4 ne öni, ke kola nyihatrene la hna 4 ne baselaia ka troa mama e celë fen. Tro ej a isapengön memine la itre xaa baselaia; tro ej a öni asë la fen, me tro waja me pelikacan. 24 Ame la 10 lao jian, ke kola nyihatrene la 10 lao joxu ka troa fetra qa ngöne la baselaia cili. Nge tro hmaca kö la ketre a mejë thupei angatr; tro ej a isapengön memine lo itre xan, me thaipiën lo köni joxu. 25 Tro ej a qajangazone la Ka Draië Catr, me qanangazone lapaane la itre atr ka hmitrötr ne la Ka Sisitria.* Tro ej a mekun troa saze la itre hneijine me itre wathebo, nge tro ha nue koi angeice la itre atre ka hmitrötr koi ca ijine hi, me itre ijin, me sine la ca ijin.* 26 Ngo ase hë ikootrë, nge hna amekötine troa thapa la mus qaathene la joxu cili, matre troa lep me apatrenetriji angeic.
27 “‘Nge hna nue pë hë la Baselaia, memine la mus, me elolone la itre baselaia kowe la nöj ne la itre atr ka hmitrötr ne la Ka Sisitria.* Ka epine palua la baselaia* i angatr, nge tro asë hi la nöjei baselaia a nyihluen, me drengethenge angatr.’
28 “E celë hi la kola nyipun. Nge ame eni Daniela, wië qatresi* hë ni pine la itre mekun ka axouenyi ni; ngo hnenge hna lapa fë la itre mekune cili e kuhu hning.”