Salamo
94 Iehova Akötresieti fe, atre të la ngazo,
Akötresieti fe, atre të la ngazo, hudrume pi!
2 Atre Amekötine la fene hnengödrai fe, cile jë.
Të jë kowe la itre ka pi tru thenge la itre huliwa i angatr.
3 Iehova fe, uti hë eu?
Uti hë eu la tro la nöjei atr ka ngazo a elitrauj hnei madrin?
4 Angatr a ithanata catr nge ka pi tru la aqane ewekë i angatr;
Itre atr ka iakötrë a sipu selë angatre kö.
5 Iehova fe, angatr a wajahuj la nöje i nyipë,
Nge angatr a akötrëne la edrö i nyipë.
6 Angatr a humuthe la sine föe memine la trenyiwa,
Me humuthe la nekön hna mecitrij hnei kem.
7 Öni angatr: “Tha öhne kö Ia;
Tha semesinene kö hnene la Akötresi Iakobo.”
8 Trotrohnine ju epun itre ka pë inamacan;
Ame epun itre hmo, eu la tro epuni a atreine thelewekë?
9 Hapeu, thatreine kö la ka xup* la hnangenyë troa dreng?
Ame la ka xup la luemek, thatreine kö nyidrëti troa öhn?
10 Ame la ka hajine la itre nöj, thatreine kö nyidrëti amekötin?
Nyidrëti la ka hamëne la atrehmekune kowe la itre atr!
11 Atre kö Iehova la itre mekuna ne la itre atr,
Nge atre kö nyidrëti laka, kösë eny itre ej.
12 Ia fe, madrine la atr hnei nyipëti hna hajin,
Lo hnei nyipëti hna inine la wathebo i nyipë,
13 Matre tingetinge pi angeic ngöne la itre drai ne akötr,
Nge uti hë la kola si hnaop thatraqane la itre atr ka ngazo.
14 Ke tha tro kö Iehova a nuaxöj la nöje i nyidrë,
Nge tha tro kö nyidrëti a nuetrij la edrö i nyidrë.
15 Ke tro hmaca a acile la meköt,
Nge tro hë la itre hni ka meköt a metrötrë nyidrë.
16 Drei la ka troa mejë thatraqai ni, matre cil kowe la itre atr ka ngazo?
Drei la ka troa ce me eni, matre cil kowe la itre ka iakötrë?
17 Maine tha hna xatua ni ju hnei Iehova,
Ke saqe hi ni troa mec.*
18 Ame lo eni a qaja ka hape: “Kola ucici la lue cang,”
Ke ihnimi nyipici i nyipë Iehova fe, la ka sajuë ni.
19 Ame la kola heti* ni hnene la itre mekun hnenge hna hnehengazon,*
Hnei nyipëti hna aupunyi ni me akeukawanyi ni.
20 Atreine kö troa ce xöle me nyipë hnene la therone* ka ngazo
Nge eje pe a huliwan la wathebo* nyine iakötrë?
21 Angatr a thele isi memine la atr ka meköt
Me upezöne* la atr ka pë ethan matre humuthi angeic.
22 Ngo tro hë Iehova a hnë zaeng* ka catr,
Lo Akötresing me giting nyine tro ni a zae then.
23 Tro hmaca kö nyidrëti a të la itre huliwa ka ngazo i angatr.
Hnene kö la thiina ka ngazo i angatr matre tro nyidrëti a apatrenyi* angatr.
Tro ha apatrenyi* angatr hnei Iehova Akötresi së.