Salamo
95 Trohemi, nge sue madrine jë së koi Iehova!
Sue draië jë kowe la Git atre amele* së.
2 Ce traqa pi së qëmekei nyidrë nge olene jë së;
Nyima jë së nge sue draië jë koi nyidrë.
3 Ke ame Iehova, Akötresieti ka draië nyidrë,
Nge Joxu ka tru nyidrë hune la nöjei haze asë.
4 Eje ngöne la ime i nyidrëti la itre gaa jui ne la fene hnengödrai;
Thatraqai nyidrë la itre he ne wetr.
5 Ewekë i nyidrë la hnagejë, lo hnei nyidrëti hna xup,
Nge hnene la lue ime i nyidrë hna xupe la ihnadro.
6 Trohemi, matre tro sa thili koi nyidrë, me nyihlue i nyidrë;
Sa iwatingöneca jë së qëmekei Iehova, lo atre xupi së.
7 Ke nyidrëti la Akötresi së,
Nge easë la nöj ne la zi i nyidrë,
Me itre mamoe hnei nyidrëti hna thupën.*
Ame enehila, maine epuni a drenge la aqane ewekë i nyidrë,
8 The axetine kö la itre hni i epun tune lo e Meriba,*
Me tune lo drai ne Masa* ngöne la hnapapa,
9 Lo kola tupathi ni hnene la itre qaaqaa i epun;
Hnei angatr hna amejëne la trenge hning ngacama öhne hi angatr la itre huliwang.
10 Traqa koi 40 lao macatre ne eni a sisine la xötre atr celë, nge hnenge hna qaja ka hape:
“Ame la nöje celë, ka xeti pala hi la hni i angatr;
Tha hnei angatre kö hna thel troa trotrohnine la itre jëng.”
11 Celë hi matre, hnenge hna sisiny ngöne la elëhning ka hape:
“Tha tro kö angatr a lö kowe la hnë manong.”