Salamo
Qaathei Dravita.
35 Iehova fe, isigöli ni jë pine la itre ithupëjiang;
Isi jë memine la itre ka isi me eni.
2 Xome jë la neköi petr* memine la petr atraqatre i nyipë,
Nge mejë jë troa xatua ni.
3 Adraiëne jë la jo memine la ze ne isi i nyipë kowe la itre ka weji ni.
Qaja jë koi ni ka hape: “Eni la atre amele* eö.”
4 Epi ahmahmane me thaipiëne la itre ka thele troa xome la meleng.
Epi tro la itre ka iaö ka thele troa humuthi ni, a hmahma me kötre bëek.
5 Epi tro angatr a tune la kupeine qitr hna ufe enyin;
Epi tro la angela i Iehova a helëne triji angatr.
6 Epi troa miti me ucic la itre jë i angatr
Nge tro la angela i Iehova a weji angatr.
7 Ke hnei angatr hna juetrëne la ketre ifile matre tra thethi ni, nge pëkö kepin;
Hnei angatr hna sine la ketre hnaope koi ni, nge pë pe kepin.
8 Epi troa asesëkötrë angatr hnene la ketre akötr;
Epi tro angatr a jötr ngöne la ifile hnei angatr hna juetrën;
Epi tro angatr a kei e cili me patr.
9 Ngo ame ni, tro ni a madrine göi Iehova;
Tro ha elitrauje la madrineng göne la itre huliwa ne iamele i nyidrë.
10 Tro la itre juneng a qaja ka hape:
“Iehova fe, drei la ka ceitu me nyipë?
Nyipëti a amelene la itre ka kucakuca qaathene la itre ka catr,
Me itre ka pë trengecatr me ka pë ewekë qaathene la itre ka atrekënö angatr.”
11 Kola traqa la itre ka anyipicine thoi,
Angatr a hnyingë ni la itre ewekë hnenge hna thatre.
12 Angatr a të koi ni la ngazo pine la loi hnenge hna kuca,
Celë hi matre eni a kei ngöne la hleuhleung.
13 Ngo ame lo angatr a wezipo, eni a heetrëne la bëek ka tru thenyin;
Tha xeni hë ni,
Nge maine tha hna sa kö la itre thithing,
14 Eni a tro kano kösë eni a hnëmecin la ketre sinee me ketre trejin;
Eni a wenini hnei hleuhleu tune la ketre atr ka treije pine la thine i angeic.
15 Ngo ame hë la eni a kei, hnei angatre hna icasikeu me madrin;
Hnei angatre hna ce zae troa humuthi ni;
Tha hnei angatre kö hna lapa thaup ngöne la angatr a lepi ni.
16 Kola hnyimasai* ni hnene la itre atr ka pë metrötr koi Akötresie,
Angatr a kiki inyö koi ni.
17 Iehova fe, uti hë eu la tro hi nyipëti a goeën?
Amele ni jë qa ngöne la itre iakötrë i angatr,
Thupëne ju la meleng* qa ngöne la itre neköi liona.
18 Tro hë ni a olene koi nyipë ngöne la icasikeu ka tru;
Tro ni a atrunyi nyipë nyipine la ka ala nyim.
19 Epi the tro kö la itre ithupëjiang a madrine la akötreng, nge pëkö kepin;
Epi the tro kö la itre ka methinë ni nge pëkö kepin, a goeën amenyi ni.
20 Ke eje hi, tha angatre kö a qaja la itre trengewekë ne tingeting,
Ngo angatre pe a kuca la itre nyinyithiina ka iaö kowe la itre atr ka mele tingeting ngöne la nöj.
21 Angatr a fe angangane la që i angatr matre upezö ni,
Me hape: “Nyipici! Nyipici! Angeice hi lo, hne huni hna öhnyi angeic.”
22 Iehova fe, ase hë nyipëti öhne lai! The lapa thaupe kö.
The ananyi ni kö hnei nyipë, Iehova fe.
23 Iehova Akötresinge fe, mejë jë nge cile jë troa isigöli ni,
Isigöli ni jë ngöne la kola akötrë ni.
24 Ameköti ni jë thenge la meköt i nyipë, Iehova Akötresinge fe;
Epi tha tro kö angatr a madrine pine la akötreng.
25 Epi tha tro kö angatr a qaja ka hape: “Ase hë huni kapa la hne huni hna ajan.”
Epi tha tro kö angatr a qaja ka hape: “Hne huni hna ulumi angeic.”
26 Epi troa hmahma me thaipië angatr asë,
Itre ka madrine fë la akötreng.
Epi tro la itre ka pi draië hui eni a xetrëne la hmahma me menu.
27 Ngo ame la itre ka kapa madrine la meköting, tro angatr a sue madrin;
Epi tro angatr a qaja lapan ka hape:
“Epi troa atrunyi Iehova, atre kapa madrine la tingetinge ne la hlue i nyidrë.”
28 Haawe, tro hë la thinemeng a qaja* la meköt i nyipë
Nge tro ni a atrunyi nyipë e nöjei drai.