Pane Tusi Itre Joxu
22 Ngöne la köni macatre, tha isi kö angetre Suria me angetre Isaraela. 2 Ngöne la hnaakönine macatre, hnei Iehosafata joxu ne Iudra, hna traqa troa wange la joxu ne Isaraela. 3 Ngo önine la joxu ne Isaraela kowe la itre tane sooce i nyidrë, ka hape: “Atre hi nyipunie laka, zi së lo traon ne Ramothe-gileada? Ngo easë a cile hnö troa thapa qaathene la joxu ne Suria.” 4 Thupene lai, öni nyidrë koi Iehosafata ka hape: “Tro kö eö a ce tro me eni troa isi me angetre Suria e Ramothe-gileada?” Nge sa jë hi Iehosafata ka hape: “Tha isa pengöi nyiso kö, nge tune fe la itre sooceng me itre sooce i eö, me itre hoseng me hose i ö.”
5 Ngo öni Iehosafata kowe la joxu ne Isaraela: “Pane hnyingë Iehova jë.” 6 Ame hnene la joxu ne Isaraela hna acasine la itre perofeta, ala 400 lao trahmany, nge öni nyidrë: “Tro kö ni a isi me thepe Ramothe-gileada maine waea?” Matre sa jë hi angatre ka hape: “Tro jë joxu, ke tro Iehova a nue la traone celë koi nyipë.”
7 Ngo öni Iehosafata ka hape: “Hetre itre xa perofeta i Iehova kö ngöne la nöj? Nge maine hetreny, loi e tro fe sa hnyinge koi Akötresie jëne angatr.” 8 Matre önine la joxu ne Isaraela: “Ca atre pala kö ka atreine hnyinge koi Iehova. Ngo cane mething angeic, ke pëkö maca ka loi hnei angeic hna perofetane göi ni, ngo ka ngazo pala hi. Mikaia la ëje i angeic, nekö i Imela.” Ngo öni Iehosafata jë hi: “Joxu, hmitrötre troa qaja tun.”
9 Ame hnene la joxu ne Isaraela hna hëne la ketre ka huliwa koi nyidrë, me hape: “Canga tro jë troa thei Mikaia nekö i Imela.” 10 Nge kola isa lapa hune la itre therone i nyidro hnene la joxu ne Isaraela, me Iehosafata joxu ne Iudra, nge nyidroti a isa heetrë iheetre i joxu. Nyidro a lapa hmekune la hnë lepe qitr, ezine la qëhnelö ne Samaria. Nge itre perofeta asë, a perofetan qëmeke i nyidro. 11 Nge hnei Zedekia nekö i Kenaana hna kuci jiane fao, me hape: “Hane hi la hna qaja hnei Iehova, ‘Jëne la jiane celë, tro eö a thin axulune* la angetre Suria, me lep apatrenyi angatr.’” 12 Nge casi hi la hna qaja hnene la itre perofeta. Öni angatr: “Tro jë e Ramothe-gileada, tro nyipëti a hun, ke tro Iehova a nue la traone koi nyipë joxu.”
13 Nge hnene lo atre hna upe troa thei Mikaia, hna qaja koi angeic ka hape: “Dreng, itre xa perofeta a qeje maca ka loi kowe la joxu, nge hane jë fe eö tui angatr.” 14 Ngo sa jë hi Mikaia ka hape: “Qëmeke i Iehova Akötresie ka mel, tro hi ni a tro fë la maca hna upi ni hnei Iehova.” 15 Thupene lai, hnei angeic hna lö koi joxu, nge önine la joxu: “Mikaia, tro kö huni a isi me thepe Ramothe-gileada, maine waea?” Nge canga öni angeice jë hi: “Tro jë, ke tro kö nyipëti a hun. Tro Iehova a nue la traone celë koi nyipë joxu.” 16 Ngo önine hmaca jë hi la joxu ka hape: “Tro ni a aija upi eö troa sisiny ngöne la ëje i Iehova troa qaja la nyipici?” 17 Matre öni Mikaia jë hi: “Eni a goeëne la angetre Isaraela, angatr a isa lapa ngöne la itre wetr, nge ceitu i angatr me itre mamoe ka pë atre thupën. Matre öni Iehova, ‘Pë hë maseta i angatr, loi e tro angatr a isa bëek koi hnalapan cememine la tingeting.’”
18 Ame hnene la joxu ne Isaraela hna qaja koi Iehosafata ka hape: “Öhne hi eö, eni hi lo a qaja hnyawa koi eö ka hape, pëkö maca ka loi hnei angeic hna perofetane göi ni, ngo ka ngazo pala hi.”
19 Thupene lai öni Mikaia: “Pane drenge ju la hnei Iehova hna qaja koi nyipë: Hnenge hna öhnyi Iehova hune la therone i nyidrë. Nge itre trongene isi e hnengödrai a cil ezi nyidrë, ngöne la götrane maca me mi. 20 Öni Iehova jë hi, ‘Drei la ka troa amenu Ahaba, matre tro angeic a tro Ramothe-gileada me mec?’ Ame hna sa hnene la ketre angela, nge ketre angela a qeje ketre mekun. 21 Ame hnene la ketre angela* hna easenyi Iehova, me hape: ‘Tro ni a amenu angeic.’ Nge öni Iehova jë hi: ‘Tro eö a kuca tune kaa?’ 22 Nge sa jë hi lai angela ka hape: ‘Tro ni a tro koilo, me kuca matre thoi* jë la itre perofeta i angeic.’ Nge öni Akötresieti jë hi: ‘Ka loi, tro hë eö lai a amenu angeic. Tro jë hë, nge kuca jë la hnei eö hna qaja.’ 23 Celë hi aqane kuca i Iehova, matre thoi* jë la itre perofeta i nyipë. Ngo eje hi laka, ase hë nyidrëti mekun troa lepi nyipë hnei akötr.”
24 Ame hnei Zedekia nekö i Kenaana, hna tro koi Mikaia me xe angeic, me hape: “Matre eö lai a hape, hna tro qaatheng la ua i Iehova troa ithanata me eö? Nga hna kaa thenge?” 25 Sa jë hi Mikaia ka hape: “Tro eö lai a öhn, e tro eö a zae hnine la hnahag ka mi ne la uma.” 26 Matre önine la joxu ne Isaraela: “Tro sai Mikaia jë koi Amona tane la traon, me Ioasa nekö i joxu. 27 Hape jë koi nyidro, ‘Hane hi la hna amekötin hnei joxu, “Umë angeice jë hnine la kalabus, nge tro hi a thue wamine falawa me timi koi angeic, uti hë la bëeke hmaca ni memine la tingeting.”’” 28 Ngo öni Mikaia jë hi: “E traqa jë nyipë bëek cememine la tingeting, hatrene hi lai laka, tha hnei Iehova kö hna ithanata me eni.” Nge öni angeice hmaca: “Mekune pala kö epun* lo hnenge hna qaja.”
29 Nge hnene la joxu ne Isaraela, me Iehosafata joxu ne Iudra, hna tro Ramothe-gileada. 30 Nge önine la joxu ne Isaraela koi Iehosafata: “Tro ni a nyiha troa isi. Ngo ame eö, tro eö a heetrëne la iheetr ne joxu.” Matre hnene la joxu ne Isaraela hna nyiha, me tro troa isi. 31 Nge hnene la joxu ne Suria hna amekötin kowe la 32 lao tane la itre ikatr ka hape: “The tro kö nyipunie a isi me itre sooc, me itre ka huliwa koi joxu. Tro hi nyipunie a isi memine la joxu ne Isaraela.” 32 Matre ame hë la itre tane ikatr a öhnyi Iehosafata, öni angatre pala kö ka hape, joxu ne Isaraela. Matre angatr a tro ju koi nyidrë troa lepi nyidrë. Ame hnei Iehosafata hna hë me sipo ixatua. 33 Nge ame la itre tane ikatr a trotrohnine laka, tha joxu ne Isaraela kö, tha weje huzu Iehosafata ju hi angatr.
34 Ngo hnene la ketre sooc hna huje menune la pehna i angeic, nge eatre ju hi la joxu ne Isaraela. Hna lö meköt akawane la lue götranene la iheetr ne isi.* Matre önine la joxu kowe la ka xomiujine la ikatr: “Bëeke hmaca jë, ke eatre hë ni la, loi e tro na tro qa ngöne la hna isi.”* 35 Nge ngöne la drai cili, hna catrehnine catre la isi, nge hnene la itre xa sooc hna xolouthe la joxu, matre tro nyidrëti a cile meköt qëmeke i angetre Suria ngöne la ikatr. Nge kolo pala hi a neni la madra i nyidrë hnine la ikatr, matre meci ju kö nyidrë la heji cili. 36 Nge ame hë la kola lö la jö, hna suene kowe la itre trongene isi ka hape: “Isa bëeke jë kowe la itre traone i nyipunie! Isa bëeke jë kowe la isa nöje i nyipunie!” 37 Hane hi la aqane meci ne la joxu ne Isaraela. Matre hna bëeke fë la ngönetrei i nyidrë a tro Samaria, nge hna kelemi nyidrë e cili. 38 Nge ame hë la kola wasine la ikaatre i nyidrë ngöne la pisin e Samaria, hnene la itre kuli hna hadrumëne la madra i nyidrë, nge itre föe ne gojeny a sie* ju e cili, thenge lo aqane qaja i Iehova.
39 Nge ame la mele i Ahaba, me nöjei huliwa i nyidrë, me hnalapa i joxu hnei nyidrëti hna xup hnei jiane elefa, me itre traon hnei nyidrëti hna xup, hna fejan asë hnine la itre itusi ne la mele ne la itre joxu ne Isaraela. 40 Ahaba a meköle ju ngöne la mec me itre qaaqaa i nyidrë, nge hna acili joxu Ahazia nekö i nyidrë, troa nyihna i nyidrë.
41 Nge hna acili joxu Iehosafata, nekö i Asa troa joxu ne Iudra, hmekune la kola 4 lao macatre ne musi Ahaba joxu ne Isaraela. 42 Ka 35 lao macatre i Iehosafata lo kola acili joxu nyidrë. Nge hnei nyidrëti hna musi koi 25 lao macatre e Ierusalema. Azuba la ëjene la thine i nyidrë, nge eahlo la nekö i Silehi. 43 Iehosafata hnyawa hi la hnaiji Asa keme i nyidrë, hnei nyidrëti pala hi hna tui kem, me kuca la loi qëmeke i Iehova. Ngo ame pe, tha hna apatrene kö la itre hnë hmi gaa hmitrötr qa hnine la nöj. Nge itre atrene la nöje pala kö a tro fë huuj e cili, me huhajine la itre huuje i angatr. 44 Ka mele tingetinge hi Iehosafata memine la joxu ne Isaraela. 45 Nge ame la mele i Iehosafata, me nöjei huliwa nyine haine i nyidrë, me itre isi i nyidrë, hna fejan asë hnine la itre itusi ne la mele ne la itre joxu ne Iudra. 46 Ngöne la ijine mus i Asa keme i Iehosafata, tha hna helëne asë kö qa ngöne la nöj, la itre trahmanyi ka salemë ngönetrei thatraqane la hmi. Matre hnei Iehosafata hna helëne trij la itre munën qa hnine la nöj.
47 Ngöne la ijine cili, pëkö joxu e Edoma, ngo hna acil la ketre tane la nöj troa nyi joxu.
48 Nge hnei Iehosafata hna cane la itre he nyine tro qa Tasesa* a tro Ofira, me bëeke fë gool. Ngazo pe, tha traqa ju kö la itre he, ke hna lö e Eziona-gebera. 49 Ame hnei Ahazia nekö i Ahaba, hna sipo Iehosafata matre tro la itre atrene hnagejë ne la nöje i nyidrë, a ce tro me itre atrene hnagejë i Iehosafata. Ngo xele kö Iehosafata.
50 Thupene lai, Iehosafata a meköle ju ngöne la mec me itre qaaqaa i nyidrë, nge hna kelemi nyidrë me angatr, ngöne la Traone i Dravita qaaqaa i nyidrë. Ame hna acili joxu Iorama nekö i nyidrë, troa nyihna i nyidrë.
51 Nge hna acili joxu Ahazia nekö i Ahaba e Samaria, lo kola 17 lao macatre ne musi Iehosafata joxu ne Iudra. Hnei nyidrë hna musi hui Isaraela koi lue macatre. 52 Hnei nyidrë hna kuca la ngazo koi Iehova, nge hnei nyidrë hna nyitipune la tulu ka ngazo ne la keme me thine i nyidrë, me tulu i Ieroboama nekö i Nebata, atre uku Isaraela troa ngazo. 53 Hnei Ahazia hna nyihlue i Baala, me thili koi angeic, me akötrëne la hni Iehova Akötresi Isaraela, tune lo hna kuca hnei keme i nyidrë.