Iobu
1 Hetrenyi la ketre atr ngöne la nöje Uza, Iobu* la ëje i angeic. Ketre atr ka mele nyipici* me meköt. Nge ka xoue Akötresie me kötrene la ngazo. 2 Nge 7 lao nekö i angeic trahmany, me köni jajiny. 3 Nge ame la itre si angeic, ke traqa koi 7 000 lao mamoe, me 3 000 lao kamela, me 1 000 lao kau, me 500 lao boliko föe, nge ala nyimu catre fe la itre hlue i angeic. Matre hlemu catre kö angeic hune la nöjei atr asë ne Koië.
4 Nge ame la itre nekö i angeic trahmany, ke isa hetre drai angatre kö troa hnëkë xen. Nge angatr a könën la köni xa i angatr troa ce xeni me iji thei angatr.* 5 Nge ame la kola fenesi la itre drai ne ce xeni angatr, Iobu a hë angatr troa ahmitrötrë* angatr. Nge Iobu a ihlë e hmahmakany troa huujëne la itre huuj ne dreuth asë* koi angatr asë. Ke öni angeic: “Maine jë, hnene la itre neköng hna kuca la ngazo me eji Akötresie e kuhu hni angatr.” Celë hi ewekë hnei Iobu hna majemine kuca.
6 Nge ngöne la ijine kola cil qëmeke i Iehova hnene la itre neköne la nyipi Akötresie,* hnei Satana fe hna lö koi angatr.
7 Ame hnei Iehova hna qaja koi Satana ka hape: “Qa i ö kaa?” Ame hna sa hnei Satana koi Iehova ka hape: “Qange hna nyinyapëne la fen me trongën ej.” 8 Thupene lai, öni Iehova koi Satana ka hape: “Hnei ö kö hna öhnyi* Iobu lo hlueng? Pëkö atr ka tui angeic ngöne la fen, ketre atr ka mele nyipici angeic me meköt, nge ka xoue Akötresie me kötrene la ngazo.” 9 Ame hnei Satana hna sa koi Iehova ka hape: “Maine troa pë ewekë i Iobu, hapeu, tro pala kö angeic a xoue Akötresie?
10 Tha hnei nyipëti kö hna acile la ketre hag matre troa ekögölithi* angeic, memine la hnalapa i angeic, me nöjei ewekë i angeic asë? Hnei nyipëti hna amanathithine la huliwa ne la lue ime i angeic, nge ala nyimu catre la itre si angeic ngöne la nöj. 11 Ngo maine tro pena nyipëti a xejë la ime i nyipë, me lepe la nöjei ewekë i angeic, tro hë angeice lai a eji nyipë qëmeke i nyipë.” 12 Ame hnei Iehova hna qaja koi Satana ka hape: “Goeën! Ame la nöjei ewekë i angeic asë, ke itre eje hë ngöne la lue ime i ö, ngo the ketri angeice pi kö!” Ame hnei Satana hna tro pi qaathei Iehova.
13 Matre ame ngöne la ketre drai, hnene la itre nekö i Iobu trahmanyi me jajiny, hna ce xeni me iji waina ngöne la hnalapa ne la mama i angatr, 14 nge traqa pi hi la ketre atr ka tro fë maca troa qaja koi Iobu ka hape: “Kola uja dro hnene la itre kau, nge itre boliko föe a xeni ezin, 15 nge traqa pi hi la angetre Sheba troa thapa la itre öni. Nge hnei angatr hna humuth la itre hlu hnei taua. Nge eni casi pe hi la ka kötr troa thuemacanyi nyipë.”
16 Angeice pala kö a ithanata, nge traqa pi hi la ketre me hape: “Hna mala la eë* i Akötresie qa hnengödrai, me dreuth asë la hnënge mamoe memine la itre hlu, matre patr asë hë angatr! Nge eni casi pe hi la ka kötr troa thuemacanyi nyipë.”
17 Angeice pala kö a ithanata, nge traqa pi hi la ketre me hape: “Hnene la angetre Kaledaia hna thewe angatr koi köni xötr, me sesë hune la itre kamela, me thepe nyudren me humuth la nöjei hlu hnei taua. Nge eni casi pe hi la ka kötr troa thuemacanyi nyipë.”
18 Angeice pala kö a ithanata, nge traqa pi hi la ketre me hape: “Kola xeni me iji waina hnene la itre nekö i nyipë trahmanyi me jajinyi thene la mama i angatr. 19 Nge hnahna pi hi la enyi atraqatr qa ngöne la hnapapa, me ufe la 4 lao kona ne la uma, nge hna kei trane la itre thupëtresij, matre meci asë hë angatr. Nge eni casi pe hi la ka kötr troa thuemacanyi nyipë.”
20 Ame hnei Iobu hna mejë me kuie zezene la iheetre i nyidrë, me xötre ihe, me kei e kuhu hnadro, me thith 21 me hape:
“Ka xöe ni, lo eni a tro qa ngöne la hni nenë,
Nge tro hmaca kö ni a bëeke xöe.
Hnei Iehova hna hamën,
Nge Iehova a xome hmaca.
Epi tro pala hi a atrune la ëje i Iehova.”
22 Ngacama hna traqa la nöjei ewekë cili, ngo tha hnei Iobu kö hna kuca la ngazo, me upezö Akötresie la ketre huliwa ka ngazo.