Iobu
2 Nge ngöne la ijine kola cil qëmeke i Iehova hnene la itre neköne la nyipi Akötresie* hna lö troa cil qëmeke i Iehova, hnei Satana fe hna lö koi angatr, matre cil qëmeke i Iehova.
2 Ame hnei Iehova hna qaja koi Satana ka hape: “Qa i ö kaa?” Ame hna sa hnei Satana koi Iehova ka hape: “Qange hna nyinyapëne la fen me trongën ej.” 3 Thupene lai, öni Iehova koi Satana ka hape: “Hnei ö kö hna öhnyi* Iobu lo hlueng? Pëkö atr ka tui angeic ngöne la fen, ketre atr ka mele nyipici angeic me meköt, nge ka xoue Akötresie me kötrene la ngazo. Nge angeic a catre mele nyipici, ngacama eö a thele tro ni a apatrenyi* angeic nge pë pe kepin.” 4 Ngo hna sa hnei Satana koi Iehova ka hape: “Kupein hnane la kupein! Ame asë hi la nöjei ewekë hna hetrenyi hnene la atr, ke tro angeic a hamën nyine thupene la mele i angeic.” 5 Ngo maine tro nyipëti a xejë la ime i nyipë, me lepe la itre june i angeic, me ngönetrei angeic, tro hë angeice lai a eji nyipë qëmeke i nyipë.”
6 Ame hnei Iehova hna qaja koi Satana ka hape: “Goeën! Angeice hë ngöne la lue ime i ö! Ngo wange kö eö la mele i angeic!” 7 Ame hnei Satana hna tro pi qaathei Iehova, me lepi Iobu hnene la itre thewek ka catrehnin,* qaane la lue waca uti hë la he i angeic. 8 Nge hnei Iobu hna xome la ketre sine inege matre xoxo la ngönetrei angeic, nge angeic a lapa ju hune la hnatresij.
9 Ame hnene la föi Iobu hna qaja koi angeic ka hape: “Tro pala kö nyipëti a mele nyipici? Eji Akötresieti jë, nge meci pi!” 10 Ngo sa jë hi Iobu ka hape: “Nyipoti a ithanata tune la ketre föe ka hmo. Hapeu, tro hi sa kapa la itre ewekë ka loi qaathene la nyipi Akötresie? Nge tha tro kö sa hane kapa la itre ewekë ka ngazo?” Ngacama hna traqa la itre ewekë cili, ngo tha qaja* pi kö angeic la ketre ewekë ka ngazo.
11 Nge ame hë la kola drenge hnene la köni sinee* i Iobu la itre akötr ka traqa koi angeic, hnei angatr hna isa traqa qa ngöne la itre zi angatr, ene Elifaza atre Temana, me Biledad atre Sua, me Zofar atre Naamathi. Hnei angatr hna ce ithanatane troa itrony, matre tro angatr a amamane la utipine i angatr koi Iobu, me aupunyi angeic. 12 Matre ame hë la angatr a öhnyi angeic qa gaa nany, tha wangatrehmekunyi angeice kö hnei angatr. Ame hnei angatr hna itreijeny, me kuie zezene la itre iheetre i angatr, me hna draiëne la xaxau, me jum hune la he i angatr. 13 Ame hnei angatr hna ce lapa me angeic e kuhu hnadro, koi 7 lao drai me 7 lao jidr. Nge pëkö ala casi e angatr ka ithanata koi angeic, ke öhne hi angatr laka, atraqatre la akötre i angeic.