Deuteronomi

31 Thupene lai, hnei Mose hna tro troa qaja la nöjei trengewekë celë kowe la angetre Isaraela: 2 “Ame enehila, 120 hë lao macatreng. Tha ijijinge hmaca kö troa tro sai epun, ke öni Iehova koi ni: ‘Tha tro kö eö a sasaithe la Ioridrano.’ 3 Ngo Iehova Akötresi epun la ka troa tro pa qëmekei epun. Tro nyidrëti a apatrene la itre nöje cili qëmekei epun, matre tro epuni a thapa la nöje i angatr. Nge tro Iosua a tro sai epun troa sasaithe la hneopegejë Ioridrano, tune lo hnei Iehova hna qaja. 4 Tro Iehova a kuca koi angatr, tune lo hnei nyidrëti hna kuca koi Sihona me Oga, lo lue joxu ne la angetre Amora, me kowe la nöje i nyidro, lo nyidrëti a apatrenyi angatr. 5 Nge tro hë Iehova a lepi angatr pi epun, ngo qa i epuni pe troa kuca thenge lo hnenge hna amekötin koi epun. 6 Haawe, catre pi nge hni ne trahmanyi jë. The xou kö, nge the hmengöhmengöne kö qëmekei angatr, ke Iehova Akötresi epun a ce tro me epun. Tha tro jë kö nyidrëti a nue epun, me nuaxöji epun.”

7 Ame hnei Mose hna hë Iosua, me qaja koi angeic qëmekene la angetre Isaraela asë ka hape: “Catre pi, nge hni ne trahmanyi jë, ke eö la ka troa lö fë la nöje ce kowe la nöj hnei Iehova hna sisiny kowe la itre qaaqaa i angatr. Nge tro hë eö a hamën ej, nyine edrö i angatr. 8 Tro Iehova a tro qëmekei ö me ce me eö. Tha tro kö nyidrëti a nue eö me nuaxöji ö, matre the xou kö, nge the hmengöhmengöne kö.”

9 Thupene lai, hnei Mose hna cinyianyine la Wathebo celë, me hamën kowe la itre atre huuj, lo angetre Levi ka xututhe la Pua Ne Isisinyikeu i Iehova, me kowe la itre qatr ne Isaraela. 10 Nge hnei Mose hna amekötin koi angatr ka hape: “Ame e nöjei 7 lao macatre, lo macatre ne nue la itre gufa, hmekune la ijin hna sa thatraqane la Feet Ne Itre Ihmelekap, 11 la angetre Isaraela a cil qëmekei Iehova Akötresi ö, ngöne la götran hnei nyidrëti hna troa iën, qa i epuni troa e la Wathebo celë kowe la angetre Isaraela, matre tro angatr asë a dreng. 12 Icasikeune jë la nöj, ene la itre trahmany, me itre föe, me itre nekönatr,* me itre trenyiwa ka lapa ngöne la itre traone* i epun. Matre tro angatr a dreng me inine troa atrepengöi Iehova Akötresi epun, me xoue nyidrë, nge tro angatr a trongëne la nöjei trengewekë ne la Wathebo celë. 13 E cili, tro hë la itre nekö i angatr ka thatre la Wathebo celë, a dreng me inin troa xoue Iehova Akötresi epun e nöjei drai ne epuni a mele ngöne la nöj hnei epuni hna troa thapa, thupene la hna sasaithe la Ioridrano.

14 Thupene lai, öni Iehova jë hi koi Mose: “Easenyi hë tro eö a mec. Hë Iosua jë, nge ce lö jë ngöne la itaat ne icasikeu, matre tro ni a acili angeic troa elemekene la nöj. Ame hnei Mose me Iosua hna ce tro kowe la itaat ne icasikeu. 15 Matre hnei Iehova hna mama e hnine la itaat, ngöne la iaw ka cile meköt, nge kola të la iaw ka cile meköt hune la hnë lö ne la itaat.

16 Nge öni Iehova koi Mose: “Pane dreng: Easenyi hë la ijine tro eö a mec, nge ngöne la nöj hnei angeic hna troa tro kow, tro la nöje ce a kuci ngazo memine la itre haze trenyiwa ka troa lapa xötreithi angeic. Nge tro angeic a triji ni, me nuetrije la isisinyikeung me angeic. 17 E cili, tro ni a elëhni koi angatr me nuetriji angatr, nge tha tro hmaca kö ni a meku angatr uti hë la troa apatrenyi angatr. Nge thupene la kola traqa la itre jol me itre akötre koi angatr, tro hë angatr a hape: ‘Hapeu, tha easë kö a akötr, ke patre hë Akötresie nyipi së?’ 18 Ngo tro pala hi ni a juetrëne la iqëmekeng ngöne la drai cili, pine la itre ngazo hnei angatr hna kuca, lo angatr a ujë kowe la itre xaa haze.

19 “Enehila, cinyianyine jë la nyima celë, nge inine jë kowe la angetre Isaraela. Ini* angatre jë matre tro la ni a huliwan la nyima celë, nyine qajaqaja* la thiina ne la angetre Isaraela. 20 Ame hë la eni a ase tro sai angatr ngöne la nöj hnenge hna sisinyi troa hamën kowe la itre qaaqaa i angatr, ketre nöje gaa neni gala hnei melek me miel, nge e tro hë angatr a xeni mej, nge tro ha tro loi* la mele i angatr, tro hë angatr a tro troa nyihluene la itre xaa haze. Nge tha tro hmaca kö angatr a metrötrë ni, ngo tro pe angatr a nuetrije la isisinyikeung. 21 Ame hë la kola traqa la itre jol me itre akötr koi angatr, tro la nyima celë a qajaqaja la thiina i angatr (ke tha tro kö a thëthëhmin hnene la itre matra i angatr). Eje hi, atre fe hë ni la itre mekuna i angatr, qëmekene tro ni a lö sai angatr kowe la nöj hnenge hna sisiny koi angatr.”

22 Ngöne la drai cili, hnei Mose hna cinyianyin me inine lai nyima kowe la angetre Isaraela.

23 Thupene lai, hnei nyidrëti* hna acili Iosua nekö i Nuna, ngöne la hnëqa i angeic me hape: “Catre pi nge hni ne trahmanyi jë, ke eö la ka troa lö fë la angetre Isaraela kowe la nöj hnenge hna sisinyi troa hamë angatr. Nge tro hë ni a ce me eö.”

24 Ame hë la Mose a ase cinyianyin asë la nöjei trengewekë ne la Wathebo celë ngöne la ketre itus, 25 öni angeic jë hi kowe la angetre Levi ka xututh la Pua Ne Isisinyikeu i Iehova: 26 “Xome jë la itusi Wathebo celë, nge amë ju ezine la Pua Ne Isisinyikeu i Iehova Akötresi epun, matre nyine anyipicine koi epun. 27 Ke atre hnyawa hi ni laka, itre ka icilekeu epun, me ka pi tru.* Maine epuni pala hi a icilekeu me Iehova, nge mele pala kö ni, nga the qaja pala ha elany e meci hë ni! 28 Haawe, icasinekeune jë koi ni la nöjei qatr asë ne la itre tribu i epun me itre tane huliwa; qanyinge kö qaja koi angatr la itre trengewekë celë. Tro fe ni a huliwane la hnengödrai me ihnadro, matre qajaqaja la thiina i angatr. 29 Ke atre hë ni laka, e meci hë ni, tro epuni a kuca la ngazo, me jea qa ngöne la gojenyi hnenge hna ahnithe koi epun. Nge tro ha traqa koi epun la akötr ngöne la itre drai ne la pun, ke tro epuni a kuca la ngazo qëmekei Iehova, me amejëne la trengehni i nyidrë hnene la itre huliwa i epun.”

30 Ame hnei Mose hna e gufane la itre trengewekë ne la nyima qa ngöne la qaan uti hë la pun, kowe la icasikeu ne Isaraela: