Mika
3 Öning: “Drenge ju epun, itre tan e Iakobo
Me epun, itre he ne nöj e Isaraela.
Tha hnëqa i epuni kö troa atre la ka meköt?
2 Ngo epuni a methinëne la loi me hniine la ngazo;
Epuni a ule la ikupein ne la nöjeng, memine la ijön hune la itre june i angeic.
3 Epuni fe a öni la ijön ne la nöjeng
Me ule la ikupeine i angeic,
Me axecien me hutra la itre june i angeic,
Tune lo hna atron ngöne öl,* me tune la mitr ngöne la öle ka tru.
4 Tro ha traqa la ijine tro angatr a thele ixatua thei Iehova,
Ngo tha tro kö nyidrëti a sa.
Tha tro hmaca kö nyidrëti a semesine* angatr,
Pine la itre ngazo i angatr.
5 Hane hi la hna qaja hnei Iehova kowe la itre perofeta ka amenune la nöjeng,
Itre ka cainöjëne la tingeting, e hetre nyine tro angatr a munyamunya*
Ngo ka thele* isi pe memine la itre ka xele ma thue a i angatr:
6 ‘Tro ha jidri koi epun, nge pëkö hnei epuni hna troa meköle goeën;
Tro hmekuje hi a menihao koi epun, nge tha tro hmaca kö epuni a kuci haze.
Tro ha lö la jö hune la itre perofeta,
Nge tro ha miti la drai koi angatr.
7 Tro la itre ka qeje pu a hmahma,
Tro la itre ka qajaqaja la drai elany a hleuhleu.
Tro angatr a isa thunge la që* i angatr,
Ke tha tro pi kö Akötresieti a sa koi angatr.’”
8 Ngo hnene la ua i Iehova hna thue trengecatreng,
Me meköt, me men,
Matre amamane koi Iakobo la icilekeu i angeic, me koi Isaraela la ngazo i angeic.
9 Pane drenge ju la, epun itre tane i Iakobo
Me epun, itre he ne nöj e Isaraela,
Epun itre ka methinëne la meköt, me atriane la ka meköt,
10 Epun itre ka xupi Ziona ngöne la ihumuth, nge ka xupi Ierusalema hnene la huliwa ka tha meköti kö.
11 Itre tane i angeic a iameköti göne la mani hna hamën juetrën,
Itre atre huuj i angeic a hamë ini göi thupen,
Nge itre perofeta i angeic a kuci haze göi mani.
Ngo angatre pe a mejiune* koi Iehova me hape:
“Tha ce Iehova kö me easë?
Tha tro kö a traqa la ketre akötr koi së.”