Deuteronomi

21 “Maine troa öhne la ketre atr ka mec ngöne la ketre hlapa ne la nöj hnei Iehova Akötresi ö hna hamën nyine zi i ö, nge thatre kö eö la atre ihumuth, 2 tro hë la itre qatre thup me itre atre iameköti, a tuluthe la enanyin qa ngöne la wezipo uti hë la itre traon ezin. 3 Nge tro pë hë la itre qatre thup ne la traon ka lapa easenyine la wezipo, a xom qa ngöne la itre öni ka tru, la ketre neköi kau föe, hna tha huliwane pala kö, nge tha hna isilekeune petre kö. 4 Thupene lai, tro la itre qatre thup ne la traon a tro fë la neköi kau föe ngöne la ketre hnathup gaa hetre tim, nge hna tha uja dro me jumi feja pala kö, nge tro hë angatr a ela la nyinawan ej ngöne lai hnathup.

5 “Nge tro ha traqa la itre atre huuj, lo angetre Levi, ke hnei Iehova Akötresi ö hna ië angatr troa huliwa koi nyidrë, me amanathithin ngöne la ëje i Iehova. Qa i angatr troa qaja la aqane troa amekötine la jole cili. 6 Nge tro pë hë la itre qatre thup asë ne la traon ka lapa easenyine la wezipo, a wasi wanakoim hune la neköi kau föe hna ela la nyinawa ngöne la hnathup, 7 me hape: ‘Tha lue ime huni kö la ka anenine la madra cili, nge goi tha öhne fe hun la atre anenin. 8 Iehova fe, the upezöne kö la nöje i nyipë Isaraela, lo hnei nyipëti hna itön, nge the ahacene kö la nöje i nyipë Isaraela, hnene la hna anenine la madra ne la atr ka pë engazon.’ Qa ngöne lai, tha tro kö a upe koi angatr la meci ne la atre cili. 9 Nge celë hi aqane tro eö a apatrene qaathei ö la madra ne la atr ka pë engazon, ke hnei ö hna kuca la ka meköt qëmekei Iehova.

10 “Maine eö a tro troa isi memine la itre ithupëjia me eö, nge tro Iehova Akötresi ö a nue angatr kowe la lue ime i ö, nge tro eö a kötre fë la itre atren, 11 nge e cili, öhne ju hi ö la ketre föe ka mingöming, nge hnei ö hna ajan, matre faipoipo memin, 12 ijiji ö hi troa lö sai angeic kowe la hnalapa i ö. Ngo tro pe la föe cili a pane cin apane la he i angeic, me xötre itaim, 13 me una lo iheetre hna kötre sai angeice fë, nge tro hë angeic a lapa thei ö. Tro angeic a treije pine la kem me thine i angeic koi ca treu ka pexej. Thupene lai, ijiji ö hë troa ce meköl me angeic, nge tro hë epon a lue trefën. 14 Ngo maine tha eö kö a madrin koi angeic, tro hë eö a nue angeic troa tro kowe la hnei angeic hna ajan. Tha tro kö eö a salemë angeic göi thupen, maine akötrë angeic pena, ke ase hë eö ahmahmanyi angeic.

15 “Pane mekune jë laka, ketre trahmanyi a xome la lue föe, nge nyidrëti kö a hnime catrëne la ketre hune la ketre.* Hnei nyidroti asë hna hnaho nekö trahmany, ngo pane kö la föe hna hnim acon. 16 Matre ame ngöne la ijine tro nyidrë a thewe edrö, tha tro kö nyidrëti a xom la neköne la föe hnimina i nyidrë, kösë pane nekö i nyidrë, me wangacone pena la neköne la föe hna hnim acon, ke angeice hi lo pane nekö i nyidrë. 17 Tro pe nyidrëti a hamë angeic la lue edrö qa ngöne la itre ewekë i nyidrëti asë, matre mama pi laka, angeice hi la pane nekö i nyidrë hna hnahon hnene la föe hna hnim acon. Tro nyidrëti a kuca tun, ke angeice hi la pane* nekö i nyidrë, lo qaane la egöcatre i nyidrë. Angeice hi la atrekë ewekëne la edrö ne ka tru.

18 “Maine tro la ketre atr a hetre nekö trahmany ka pi tru nge ka tha idrei, ka tha drei kem me thin, ngacama ase hë kem me thin hajin, ngo xele pala hi ma dreng, 19 tro hë nyidroti a uti sai angeic kowe la itre qatre thup ngöne la qëhnelö ne la traon, 20 me hape: ‘Ka pi tru la nekö i nyio nge ka tha idrei; xele kö angeice ma drei nyio. Ka xeni atrun, nge ka hnaitö pala pe hi.’ 21 E cili, tro hë la nöjei trahmanyi ne la traon a tranyi angeic hnei etë. Celë hi aqane tro eö a apatrene la ngazo qaathei ö, matre tro la angetre Isaraela asë a drenge me xou.

22 “Maine tro la ketre atr a kuca la ketre ngazo, nge meci la pun kowe la atre kuca la ngazo cili, nge ase hë eö humuthi angeic me athipi angeic hune isinöe, 23 tha tro kö a nue la ngönetrei i angeic troa thip uti hë e hej. Qa i ö troa kelemi angeic ngöne ju kö la drai cili, ke Akötresieti a ejine la ngönetrei hna athip. Tha tro pi kö eö a apuingazone la nöj hnei Iehova Akötresi ö hna hamën nyine edrö i ö.