Zakaria
1 Ame ngöne la hnaaluene macatre ne mus i Dariu, ngöne la hna 8 ne treu, hnei Iehova hna ithanata koi Zakaria* perofeta nekö i Berekia, lo nekö i Ido. Öni nyidrë: 2 “Hnei Iehova hna elëhni catr kowe la itre keme i epun.
3 “Qaja ju koi angatr ka hape: ‘Hane hi la hna qaja hnei Iehova joxu ne la itre trongene isi e hnengödrai: “‘Bëeke jë koi ni,’ öni Iehova joxu ne la itre trongene isi e hnengödrai, ‘nge tro ni a bëeke koi epun,’ öni Iehova joxu ne la itre trongene isi e hnengödrai.”’
4 “‘The tune kö lo itre keme i epun, lo hna qaja kow hnene la itre perofeta, ka hape: “Hane hi la hna qaja hnei Iehova joxu ne la itre trongene isi e hnengödrai: ‘Eni a pane sipo, nuetrije pi* la itre aqane ujë i epun ka ngazo me itre huliwa i epun ka iakötrë.’”’
“‘Ngo tha hnei angatre kö hna dreng, nge tha hnei angatre kö hna nyipiewekë ni,’ öni Iehova.
5 “‘Ekaa ha la itre keme i epun enehila? Nge ame la itre perofeta ke, ka mele palua kö angatr? 6 Ame pe, hnene la itre keme i epuni hna öhne hnyawa la kola eatr la trengewekëng, me itre hnenge hna amekötin jëne la itre hlueng, itre perofeta.’ Matre hnei angatr hna bëek koi ni me hape: ‘Hnei Iehova joxu ne la itre trongene isi e hnengödrai, hna kuca koi hun thenge la aqane ujë hun me itre huliwa hun, tune lo hnei nyidrëti hna amekötin.’”
7 Ame ngöne la hnaaluene macatre ne mus i Dariu, ngöne la drai 24 ne la hna 11 ne treu, ene la treu Sebat, hnei Iehova hna ithanata koi Zakaria perofeta nekö i Berekia, lo nekö i Ido. 8 Ngöne la jidr, hnenge hna meköle goeëne la ketre trahmany ka ti hos ka madra. Angeic a cile meköt ngöne la itre imirt e hnine la ketre hnathup. Ame hutrö i angeic, ke hetre itre hos ka madra, ka oma mit nge ka wië.”
9 Ame hnenge hna hnying ka hape: “Joxu, drei angatre la?”
Sa jë hi la angela ka hape: “Tro ni a amamai ö ka hape, drei lae angatr.”
10 Matre önine jë hi lo trahmanyi ka cile meköt nyipine la itre imirt: “Kolo itre hna upe hnei Iehova troa nyinyapëne la fen.” 11 Ame hnei angatr hna qaja kowe la angela ka cil nyipine la itre imirt ka hape: “Hne huni hna nyinyapëne la fen, nge ka lolo me tingetinge la fen asë.”
12 Önine jë hi la angela i Iehova: “Iehova fe joxu ne la itre trongene isi e hnengödrai, uti hë eu la tro nyipëti a cipane la utipine i nyipë koi Ierusalema me itre traon ne Iudra, lo hnei nyipëti hna lapa fë trengehni koi 70 lao macatre?”
13 Hnei Iehova hna sa kowe la angela ka ithanata me eni, jëne la itre trengewekë ka ithuecatr me iakeukawany. 14 Ame hnene la angela cili hna upi ni me hape: “Sue jë ka hape: ‘Hane hi la hna qaja hnei Iehova joxu ne la itre trongene isi e hnengödrai: “Pi tro ni a cilëgöli Ierusalema me Ziona hnene la aja ka catr, eje hi, hnene la trenge ajang. 15 Eni a elëhni, eje hi, elëhni catre ni kowe la itre nöj ka mele tingeting. Ame lo co petre kö la elëhning, hnei angatr hna nyixane hmaca kö la akötr.”’
16 “Matre hane hi la hna qaja hnei Iehova: ‘“Tro ni a bëek koi Ierusalema ce memine la utipin. Tro ha xupe la umang e cili,” öni Iehova joxu ne la itre trongene isi e hnengödrai, “nge tro ha hule la eno nyine tuluth hui Ierusalema.”’
17 “Sue hmaca jë me hape: ‘Hane hi la hna qaja hnei Iehova joxu ne la itre trongene isi e hnengödrai: “Tro hmaca a tiqa gala la itre traoneng hnei loi.* Tro hmaca Iehova a akeukawanyi Ziona me ië Ierusalema hmaca.”’”
18 Thupene lai, hnenge hna gala draië me öhne la 4 lao jian. 19 Ame hnenge hna hnyingëne kowe la angela ka ithanata me eni ka hape: “Nemene la itre jiane cili?” Öni angeic: “Kolo hi lo itre jiane ka aije Iudra, me Isaraela, me Ierusalema.”
20 Nge hnei Iehova hna amamai ni la 4 lao atr ka atreine huliwane la lue ime i angatr. 21 Öninge jë hi: “Angatr a ue e celë?”
Öni nyidrë: “Kolo itre jiane lai ka aije Iudra, nge goi pë fe ka atreine amejëne la he i angeic. Tro la itre atre cili a traqa troa axouenyi angatr, me thupa la itre jian ne la itre nöj, ene la itre nöj ka xejë la itre jiane i angatr kowe la nöje Iudra, matre aije angeic.”