Itre Edromë
5 Neköng, drenge hnyawa ju la inamacaneng.
Hnangenyëne hnyawa ju la hnenge hna ini ö göi troa atreine waiewekë,
2 Matre tro pala hi ö a atreine thelewekë
Nge tro pala hi la itre trengewekë i ö a ihmeku memine la atrehmekun.
3 Ke kola neni la miel qa ngöne la që ne la föe ka nyiape menu,*
Nge ka menyike kö la ukeineqë i angeic hune la oel.
4 Ngazo pe, ceitune hi la aqane haitre i angeic, memine la hnitr ka haitre pun
Nge ceitune hi la aqane ixöj i angeic, memine la taua ka idrei la lue götran.
5 Lue ca i angeic a uti kowe la mec.
Angeic a tro meköt kowe la Hua.*
6 Tha angeice kö a semesinene la gojenyi ne la mel.
Angeic a ngenu agö, ngo thatre kö angeice la pune la aqane ujë i angeic.
7 Neköng,* enehila, drei ni ju
Nge the thipëne kö la hnenge hna qaja.
8 Iananyi pi me angeic;
The easenyine kö la qëhnelö ne la uma i angeic,
9 Wanga troa jelengazo eö hnei itre xan
Nge tro eö a xeni pune la itre macatre ne akötr;*
10 Wanga luzi pi la itre mo* i ö hnene la itre atre menu
Nge tha tro kö la itre mo hnei ö hna huliwa catre kow, a tro kowe la hnalapa ne la trenyiwa.
11 Wanga hokötre jë eö ngöne la pune la mele i ö
Ngöne la kola fitre trootro la ijön me ngönetrei i ö
12 Nge tro eö a qaja ka hape: “Ekölöhini, epi a drenge ju kö ni la ihaji!*
Hnene la hning hna methinëne la iameköti!
13 Tha hnenge kö hna drenge la nin ne la itre ka ini ni
Nge tha hnenge kö hna wangatrune la itre ka hamë ini koi ni.
14 Eni hë qëmekene la akötre ka tru
Qëmekene la nöjei atr ka traqa itrony.”*
15 Iji jë la tim qa ngöne la sipu sima i ö
Memine la tim ka neni ngöne la hna tha tim i ö.
16 Hnauëne pena laka, tro la itre qeqe ne tim i ö a neni e kuhu trön,
Nge tro la itre tim i ö a neni ngöne la itre götran gaa tru ne la traon?
17 Loi e thatraqai ö hmekuje hi la itre qeqe ne timi cili,
Nge the thawa kö me itre trenyiwa.
18 Loi e manathithi la qeqe ne tim i ö,
Nge madrine jë memine la föe ne thupëtresij i ö,
19 Lo drube föe hna hnime catrën, me neköi nani ne wetr ka mingöming.
Epi tro la lue thi i angeic a amadrinë* eö o drai.
Epi tro pala hi ö a hmo hnene la ihnim i angeic.
20 Neköng, hnauëne pena la troa amenu eö hnene la föe ka nyape menu*
Maine tro eö ea la lue thi ne la föe ka kuci ngazo?*
21 Ke öhn asë hi Iehova la itre jë ne la atr;
Nyidrëti a waipengön asë la itre hmene gojenyi angeic.
22 Kola jötre la atr ka ngazo hnene la itre sipu tria i angeic,
Nge troa othi angeic hnene la itre ngazo i angeic, kösë hnei eno.
23 Tro hë angeic a mec, ke tha nyipiewekëne kö angeic la ameköti
Nge tro hë angeic a luz, ke tha mano kö angeice qenahmo.