Ieremia
35 Ame ngöne la ijine mus i Iehoiakima nekö i Iosea joxu ne Iudra, hnei Iehova hna ithanata koi Ieremia me hape: 2 “Tro jë a wang la fami i angetre Rekaba, ithanata jë me angatr, nge hë angatre jë kowe la uma i Iehova hnine la ketre hnahag hnë xen. E cili, hamë waina i angatre pi.”
3 Matre hnenge hna hë Iazania nekö i Ieremia, lo nekö i Habazinia, me itre trejin me angeic, me itre nekö i angeic, memine la fami i angetre Rekaba asë, 4 matre tro kowe la uma ne hmi i Iehova. Hnenge hna lö sai angatr e hnine la hnë xen ne la itre nekö i Hanan, nekö i Igedalia, ketre atre ne la nyipi Akötresie. Ame la hnahag cili, ke ej ezine la hnahag hnë xeni ne la itre nekö i joxu, hune la hnahag hnë xen i Maseia nekö i Saluma, lo atre thupë qëhnelö. 5 Thupene lai, hnenge hna amë qëmekene la itre trahmanyi ne la fami i angetre Rekaba, la itre ver me itre neköi verë waina me hape: “Iji waina jë.”
6 Ngo öni angatre jë hi: “Tha tro kö huni a iji waina, ke hnei Ionadaba qaaqaa hun, lo nekö i Rekaba, hna amekötin ka hape: ‘Tha tro pi kö epun me itre nekö i epuni trahmanyi a iji waina. 7 Tha tro kö epuni a xupi uma, me jumi feja, me eënyi vin, me hetre hlapa vin, ngo tro pala hi epuni a lapa fene la itre itat. Nge maine tro epuni a kuca tun, tro hë epuni a mel aqeanyi ngöne la nöje trenyiwa.’ 8 Celë hi matre, eahuni pala hi a trongëne la hna amekötin hnei Ionadaba nekö i Rekaba, qaaqaa hun: pëkö ka iji waina the hun, eahun me itre föi eahun, me itre nekö huni trahmanyi me jajiny. 9 Tha eahuni kö a xupi uma matre lapan, nge pë fe kö vine hun, me hlapa, me feja. 10 Eahuni pala hi a lapa fene la itre itat, me metrötrën lo hna amekötin hnei Ionadaba qaaqaa hun. 11 Ngo ame hë lo Nebukaneza* joxu ne Babulona a traqa troa lepe la nöj, öni eahun: ‘Jë fe, lö jë së e Ierusalema, matre kötrene pi së la trongene isi i angetre Kaledaia me Suria.’ Nge qaane ju hi lai, eahuni pë hë e Ierusalema.”
12 Ame hnei Iehova hna ithanata koi Ieremia, me hape: 13 “Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tro jë a qaja kowe la itre trahmanyi ne Iudra me itre atrene Ierusalema ka hape: “Hapeu, tha hnenge kö lo hna lapaa upi epuni troa drei ni?” öni Iehova. 14 “Hnei Ionadaba nekö i Rekaba hna wathebone la itre matra i angeic troa iji waina, nge hnei angatr hna trongën: uti pala hi enehila, tha angatre kö a iji waina. Angatr a drengethenge lo hna amekötin hnene la qaaqaa i angatr. Ngo ame pe kö ni, hnenge hna anyimua ithanata koi epun,* ngo tha drenge kö epun. 15 Nge tha mano kö ni upe koi epun la itre hlueng perofeta. Hnenge pala hi hna upi angatr* troa qaja koi epun ka hape: ‘Eni a sipo epuni asë, nuetrije pi la itre aqane ujë i epuni ka ngazo, nge kuca jë la meköt! The drenge kö la itre xaa haze, nge the nyihlue i angatre kö. Maine tro epuni a tro tun, tro pala hi epuni lai a lapane la nöj hnenge hna hamën koi epun me itre qaaqaa i epun.’ Ngo tha hnangenyëne kö epun, nge xele kö epuni ma dreng. 16 Hnene la itre matra i Ionadaba nekö i Rekaba hna trongëne lo hna amekötin hnene la qaaqaa i angatr, ngo tha drei ni kö hnei angatre la.”’”
17 “Haawe, hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tro ni a axulun koi Iudra me kowe la itre atrene Ierusalema la nöjei akötr hnenge hë hna hmekë angatr, ke hnenge hna ithanata koi angatr, ngo xele pe angatre ma dreng; hnenge pala hi hna hë angatr, ngo xele kö angatre ma sa.’”
18 Öni Ieremia jë hi kowe la fami i angetre Rekaba: “Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Pine laka, hnei epuni hna drengethenge la hna amekötin hnei Ionadaba qaaqaa i epun, me metrötrëne pala hi la hnei angeic hna ahnith, me trongëne hnyawa, 19 haawe, hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Tro pala hi a hetre matra i Ionadaba nekö i Rekaba, ka troa nyihlueng.”’”