Ezekiela

38 Hnei Iehova hmaca hna ithanata koi ni, me hape: 2 “Nekö i atr, xei jë koi Gog atre Magog, lo joxu* ka tru ne Meseka me Tubala. Nge perofetane jë la akötr ka troa lepi angeic. 3 Qa i ö troa hape: ‘Hane hi la hna qaja hnei Iehova Joxu Ka Sisitria: “Tro hë ni a lepi ö Gog, joxu* ka tru ne Meseka me Tubala. 4 Tro ni a abëekë eö, me ami nyine jel ngöne la që i ö, nge tro hë ni a lö sai ö me trongene isi i ö asë, ene la itre hos i ö me itre ka ti hos, lo itre ka heetrë iheetr ka mingöming, ketre trongene isi atraqatr ka cile fë petre ka tru me ka co,* nge ka maca troa huliwane la taua. 5 Ce angatr me angetre Peresi, me Aithiope, me Futa, itre ka cile fë petre ka co, me itrapetre ne isi. 6 Ce angatre fe me Gomera me itre soce i angeic asë, ka traqa qa ngöne la itre götran gaa nanyi ne kolopi, me itre matra i Togarama me nöjei soce i angatr. Ala nyimu la itre nöj ka ceme eö.

7 “‘“Hmeke jë nge hnëkë jë, eö me nöjei trongene isi ka ceme eö, nge tro hë eö a isigöli* angatr.

8 “‘“Thupene la nyimu drai, tro ha waipengöi ö.* Ngöne la itre macatre ne la pun, tro eö a lö hnine la ketre nöj hna abëekën lo itre atren, ene lo nöj hna lep ekö hnei taua. Hna xomi angatr qa ngöne la itre nöj ka nyimutre, matre acasi angatr hune lo itre wetr ne Isaraela hna nuetrij ekö. Hna abëekë angatr qa ngöne la itre nöj, matre angatr asë hi a mele tingeting. 9 Tro eö a lepi angatr tune la ketre wene, nge tro eö a hakuthe la nöj tune la itre iaw, eö, me itre soc i ö asë, memine la itre nöj ka ceme eö.”’

10 “Hane hi la hna qaja hnei Iehova Joxu Ka Sisitria: ‘Ngöne la drai cili, tro ha löthi ö hnene la itre mekun ka uku eö troa eköthe la ngazo. 11 Tro eö a hape: “Tro ni a lö hnine la nöj hna tha ekögölith.* Tro ni a lep la itre atr ka mele tingeting, nge ka pë hna xouen, lo itre atr ka mel ngöne lo itre götran hna tha eköhagen, gaa pë qëhnelö, me nyine acatrei qëhnelö.” 12 Tro ha kuca tun, matre thapa la itre trengamo ka tru me atrekënö; tro ha kuca tun, matre lepe la itre götran hna apatren ekö nge hna lapane hmaca, me lepe la ketre nöj hna acasine qa ngöne la itre xaa nöj, nge ka trene mani me trenamo, ene lo itre ka mel nyipine la fen.

13 “‘Tro pë hë Seba, me Dedana, me itre ka salem qa Tasesa, me itre soc i angatr a hnyingë eö ka hape: “Eö kö a lö hnine la nöj matre troa thapa la itre trengamo ka tru me atrekënö? Eö kö a acasine la trongene isi i ö matre xomi sileva me gool, me itre trengamo, me itre ewekë ka tru thupen, me thapa la itre mo ka tru?”’

14 “Haawe nekö i atr, perofetane jë nge hape jë koi Gog: ‘Hane hi la hna qaja hnei Iehova Joxu Ka Sisitria: “Ngöne la ijine tro Isaraela nöjeng a mele tingeting, canga tro hi ö lai a öhn, eje hi? 15 Tro hë eö a traqa qa ngöne la götrane i ö, qa ngöne la itre götran gaa nanyi ne kolopi, memine la itre nöj ka nyimutre. Tro asë hi epuni a ti hos, epun lo ketre trongene isi ka tru, me itre soce ka nyimutre. 16 Tune la itre iaw ka hakuthe la nöj, tro hë eö a uti koi Isaraela nöjeng. Ngöne la itre drai ne la pun, tro ni a kuca matre tro eö Gog a lep la nöjeng, nge jën eö, tro hë la itre nöj a atre ni, ngöne la eni a troa ahmitrötrë ni qëmekei angatr!”’

17 “Hane hi la hna qaja hnei Iehova Joxu Ka Sisitria: ‘Hapeu, tha eö kö lo hnenge hna qaja jëne la itre hlueng e Isaraela, lo itre ka perofetan qaan ekö ka hape, troa upi ö troa lepe la nöjeng?’

18 “‘Ngöne la drai ne tro Gog a lepe la nöje Isaraela, tro ha palulu la elëhning,’ öni Iehova Joxu Ka Sisitria. 19 ‘Tro ni a ewekë, hnene la trenge ajang memine la idreuthine la elëhning, nge ngöne la drai cili, tro ha traqa la ketre sa atraqatr e Isaraela. 20 Tro ni a kuca matre hmengöhmengöne jë la itre ii ne hnagejë, me itre waco ne hnengödrai, me itre öni wael ngöne la itre hlapa, me nöjei öni ka wewë, me nöjei atr e celë fen. Tro ha kei la itre wetr, me trotro lapa la itre git, nge tro ha mala asë la itre ihag.’

21 “‘Ngöne asë hi la itre wetreng, tro ni a hëne la taua matre lepi angeic,’ öni Iehova Joxu Ka Sisitria. ‘Tro la nöjei trahmany a isa xejë la taua i angeic, matre lepe la trejin me angeic. 22 Tro ni a eatrëne la hna amekötin koi angeic,* jëne la ketre meci ka ixötrekeu, me jëne la madra hna anenin. Nge tro ni upe koi angeic, me itre soce i angeic, me itre nöj ka nyixölë angeic, la mani ka catrehnin, me itre wene mani ka catr, me eë, me gaz. 23 Eje hi, tro ni a adraië ni e cili, me ahmitrötrë ni, nge tro hë ni a mama qëmekene la itre nöj ka nyimutre. Nge tro hë angatr a atre laka, Iehova ni.’