Deuteronomi

23 “Tha tro kö la ketre trahmany ka eatr ekön maine hna xöje pena la kahmitrötr, a hane lö kowe la icasikeu i Iehova.

2 “Tha tro kö la ketre neköne gojeny a hane lö kowe la icasikeu i Iehova. Goi tha tro fe la ketre matra i angeic a hane lö kowe la icasikeu i Iehova uti hë la hna 10 ne xötr.

3 “Tha tro kö la angetre Amona me angetre Moaba a hane lö kowe la icasikeu i Iehova. Goi tha tro fe la ketre matra i angatr a hane lö kowe la icasikeu i Iehova uti hë la hna 10 ne xötr, 4 ke ame lo eö a tro qa Aigupito, tha hnei angatre kö hna tro fë xeni me tim koi ö. Ngo hnei angatre pe hna thele troa eji ö me nyithupe i Balama nekö i Beora, ka lapa e Petora e Mesopotamia. 5 Ame pe, xele kö Iehova Akötresi ö ma drei Balama. Hnei Iehova Akötresi ö hna saze la ieji koi manathith, ke hnei Iehova Akötresi ö hna hnimi ö. 6 E nöjei drai ne mel eö, tha tro kö eö a nue angatr troa tingeting me atrenamo angatr.

7 “Tha tro kö eö a xele ma wange la atre Edoma, ke sipu trejine lai me eö.

“Tha tro kö eö a xele ma wange la atre Aigupito, ke hnei ö hna mele trenyiwa ngöne la nöje i angeic. 8 Nge ame la itre nekö i angatr qa ngöne la hnaakönine xötr, ke ijiji angatre hi troa hane sine la icasikeu i Iehova.

9 “Maine eö a tro troa isi memine la itre ithupëjia me eö, ke qa i ö troa kötrene la nöjei ewekë ka ngazo. 10 Maine tro la ketre trahmany a pui ngazo hnene la hna neni la zane ngönetrei i angeic e hej, qa i angeic troa tro tröne la lapa, nge tha tro kö angeic a bëeke hmaca. 11 Nge e hnaipajö hej, qa i angeic troa sië tim, nge ame la kola lö la jö, ijiji angeice hë troa bëek kowe la lapa. 12 Ketre, qa i ö troa hnëkëne la ketre götrane gaa nany tröne la lapa, nge e cili hi la hnë tro eö a kötrengönë. 13 Nge loi e tro fe eö a xome trongëne la ketre sine sinöe nyine si hnaop qëmekene troa lapa cil. Thupene lai, tro hë eö a kelem la hnei ö hna kötrengönë. 14 Ke Iehova Akötresi ö a tro nyipine la lapa i ö matre amele eö, me nue la itre ithupëjia koi ö. Qa ngöne lai, loi e troa hmitrötr la lapa i ö, matre tha tro kö Akötresie a öhne la ketre ewekë ka ngazo thei ö, nge tro pala hi nyidrëti a ce tro me eö.

15 “Maine tro la hlu a kötrene la maseta i angeic, me zae thei ö, tha tro kö eö a tro sai angeice hmaca kowe la maseta i angeic. 16 Tro angeic a lapa thei ö ngöne la götran hnei angeic hna iën qa ngöne la itre traone i ö, ngöne la götran hnei angeic hna ajan. Nge tha tro kö eö a qanangazo angeic.

17 “Tha tro kö la ketre föe ne Isaraela a salemë ngönetrei göi hmi. Nge tha tro fe la ketre trahmany ne Isaraela a salemë ngönetrei göi hmi. 18 Tha tro kö eö a traqa fë ngöne la uma i Iehova Akötresi ö, la thupen ne la föe ne gojeny, maine thupen ne la trahmany ka salemë ngönetrei matre troa sisiny, ke lue ewekë lai ka sis koi Iehova Akötresi ö.

19 “Tha tro kö eö a hamë ewekë göi thupen kowe la trejin me eö, ngacama mani ju hë maine xen, maine nöjei ewekë laka, ijiji ö hi troa hë thupen. 20 Ame pe, ijiji ö hi troa hë thupen kowe la trenyiwa, ngo tha tro kö eö a hë thupen kowe la trejin me eö, matre tro Iehova Akötresi ö a amanathithine la nöjei huliwa i ö ngöne la nöj hnei ö hna troa thapa.

21 “Maine tro eö a sisiny koi Iehova Akötresi ö, the hmitre kö troa eatrën, ke tro kö Iehova Akötresi ö a hnyingëne hmaca koi ö, nge troa hetre ngazo i ö. 22 Ngo maine tha sisinyi kö eö, ke tro ha pë ngazo i ö. 23 Qa i ö pe troa eatrëne la hnei ö hna qaja, me kuca la hnei ö hna sisiny kösë huuj hna tro fë xanën koi Iehova Akötresi ö.

24 “Maine tro eö a lö ngöne la hnënge vin ne la atre lapa ezi ö, ijiji ö hi troa iji wene rezë uti hë la tro eö a mej, ngo tha tro kö eö a huuj amë hnine la trengene i ö.

25 “Maine tro eö a lö ngöne la hlapa qitr ne la atre lapa ezi ö, ijiji ö hi troa huje la itre wene qitr ka macaj, ngo tha tro kö eö a hna ifos ngöne la hlapa ne la atre lapa ezi ö.