Numera

17 Öni Iehova jë hi koi Mose ka hape: 2 “Ithanata jë kowe la angetre Isaraela, nge xome jë la ca sine sinöe qaathei angatr, qaathene la itre tane la isa tribu i angatr, ene la 12 lao sine sinöe. Nge cinyianyine jë la ëje i angatr hun itre ej. 3 Nge hune la sine sinöe i Levi, tro eö a sija la ëje i Arona, ke casi hi la tan ne la tribu, matre tro hi a xome la ca sine sinöe. 4 Nge amë ju la itre sine sinöe hnine la itat ne icasikeu, qëmeken la nyine Anyipicin, ngöne lo göhnë hnenge hna majemine mama koi epun. 5 Nge ame la sine sinöe ne la atre hnenge hna troa iën, ke tro ej a eng, matre tro ni a lep ahumune la angetre Isaraela ka qeje ni, nge ka qeje epone fe.”

6 Ame hnei Mose hna ithanata kowe la angetre Isaraela, nge hnene la itre tane i angatr hna hamëne la itre sine sinöe, isa cas qaathene la itre tane la itre tribu, matre traqa koi 12 lao sine sinöe. Nge e cili fe la sine sinöe i Arona. 7 Ame hnei Mose hna amë la itre sine sinöe qëmekei Iehova, hnine la itat ne Anyipicin.

8 Ame ngöne lo drai thupen, lo Mose a lö hnine la itat ne Anyipicin, ke enge hë la sine sinöe i Arona, lo sine sinöe ne la tribu i Levi. Eje ha eng, nge hetre iengen ka hum me ka thithë, me itre wene amad ka hmedr. 9 Matre hnei Mose hna xome la itre sine sinöe hna amë qëmekei Iehova, me tro fë kowe la angetre Isaraela. Hnei angatr hna goeën itre ej, me isa xomi sine sinöe.

10 Thupene lai, öni Iehova jë hi koi Mose: “Amë hmaca ju la sine sinöe i Arona qëmeken la nyine Anyipicin; celë hi hatren nyine amekunën kowe la itre nekön ka catre që, matre troa lep ahumune la itre ka qeje ni, nge matre tha tro kö angatr a mec.” 11 Ame hnei Mose hna canga kuca la hnei Iehova hna upi angeic, nge hnei angeic hna kuca asë.

12 Matre hnene la angetre Isaraela hna qaja koi Mose ka hape: “Tro huni a mec! Tro huni a patr! Tro huni asë a patr! 13 Hna mecine la troa easenyine la uma maano i Iehova! Hapeu, tro kö huni asë a meci tune lai?