Iobu
6 Matre öni Iobu ka hape:
2 “Maine troa tuluthe hnyawane la akötreng
Me atë la hleuhleung hune la itulu!
3 Ke enehila, hace pi hë ej hune la ngöni ne hnagejë.
Celë hi matre hnenge hna ewekë menu.
4 Ke hna jaqa ni, hnene la itre ane pehna ne la Ka Tru Trenge Men,
Nge hnenge hna iji la poizine itre ej;
Nge kola cile xötrë koi ni la itre ewekë nyine axouen qaathei Akötresie.
5 Hapeu, tro kö la boliko wael a ho e hetre hnitr?
Nge tro kö la kau a ho e hetre xen?
6 Nge ijije kö troa xeni la ka hnyëfelö nge pë pe sotr?
Hetre madrine kö troa iji la zan ne la ketre feja ka pë ehnyapan?
7 Itre ewekë lai hnenge hna xele ma ketr.
Ke kösë itre ewekë ka apoizinën la trepang.
8 Ekölöhini! Epi a kapa ju la sipong
Nge epi tro Akötresieti a kapa la ajang!
9 Epi tro Akötresie a wajaficanyi ni,
Me li ime me apatrenyi ni!
10 Ke tro lai a aupunyi ni;
Nge tro ni a sesësesë hnei madrin ngacama eni pala hi a akötr,
Ke tha hnenge kö hna cil kowe la itre trengewekë ne la Atre Ka Hmitrötr.
11 Nge hapeu, hetre trengecatrenge pala kö troa itreqe?
Nge nemene la pun koi ni matre tro pala kö ni a mel?
12 Nge hapeu, ceitu kö la trengecatreng memine la ecatrene la etë?
Maine hapeu, hna kuca kö hnei kopa la ngönetreing?
13 Tro ni a öhnyi ixatua tune kaa
Nge pë pe ka xatua ni?
14 Ame la atre cipane la ihnimi nyipici angeic kowe la ketre atr
Ke tha angeic hmaca kö a xouene la Akötresie Ka Tru Trenge Men.
15 Hnene la itre sipu trejin me eni hna mele thoi tune la hneopegejë ngöne la ijine hnötr,
Me tune la itre tim ka qaqacil ngöne la ijine lepany.
16 Angatr a jatr hnene la tim ka catr hnei lepany,
Nge hna löthi angatr hnene la kiona ka hmu.
17 Ngo ame la kola traqa la ijin, angatr a hmeje kötr me patr;
Nge ame la kola traqa la idreuth, angatr a qaqacil.
18 Hna ajeane la itre jë i angatr;
Ame hnei angatr hna neni kowe la hnapapa me patr.
19 Kola thele angatr hnene la itre trongene kamela qa Tema;
Nge kola treqe angatr hnene la itre ka traqa* qa Sheba.
20 Ame hnene la itre atr cili hna hmahma, pine la hna mejiune menu;
Hnei angatr hna traqa e cili, ngo angatr a traqa menu.
21 Haawe, celë hi aqane ujë i epun koi ni;
Öhne hi epun la etrune la akötreng, ngo xou i epuni fe.
22 Hnenge kö hna qaja ka hape: ‘Hamë ni pi la ketre ewekë,’
Maine pena, hnenge kö hna sipone la itre trengamo i epun?
23 Hnenge kö hna sipone troa amele* ni qa ngöne la ime ne la ithupëjia
Maine troa thepe ni qa ngöne la itre ka iaxösisi?
24 Ini ni jë, nge tro hë ni a lapa thaup;
Xatua ni jë troa atrehmekun la triang.
25 Ame la itre trengewekë ka meköt, ke tha ka akötre kö!
Ngo nemene la eloine la itre ihaji epun?
26 Epuni kö a mekune troa jelengazone la hnenge hna qaja,
La itre trengewekë ne la atre ka hleuhleu, nge hna ufe enyin?
27 Nge maine jë, ijiji epuni fe troa uthi trikitrën la nekön hna meci trij
Me salemëne la sipu sinee i epun!
28 Haawe enehila, pane goeë ni hnyawa ju,
Ke tha tro kö ni a thoi qëmeke i epun.
29 Pane mekune hmaca jë la ka traqa koi ni, nge waipengöi ni jë
Eje hi, pane mekune hmaca jë la ewekë celë, ke ka cile hut la meköting.
30 Nge hapeu, kolo kö a qaja la itre ewekë ka tha meköti kö hnene la thinemeng?
Hapeu, tha wangatrehmekune kö la qëng la itre ewekë ka tria?