Itre Edromë
19 Ka loi ju kö la troa pë ewekë me ujë cememine la nyipici
Hune la troa hmo me thoi.
2 Tha loi kö e tro la atr a pë atrehmekun,
Nge ka tria la atre saqe kuca la ketre ewekë.
3 Hnene la aqane menu ne la atr, matre angeic a xome la gojenyi ka ngazo,
Ngo hni i angeice pe a elëhni koi Iehova.
4 Itre mo a hëne la itre sinee ka nyimutre,
Ngo tro fe a nuetrije la atre ka pë ewekë hnene la sinee i angeic.
5 Tha tro jë kö a pë thupen kowe la temoë ka thoi,
Nge ame la atr ka thoi lapaa tune la angeic a mano, tro fe a nyithupen koi angeic.
6 Ala nyimu catre la itre ka thele troa kepe angatr hnene la atr ka ham,
Nge nöjei atr asë a nyi sineen la atr ka hamë ahnahna.
7 Ame asë hi la itre trejin memine la ka pë ewekë, angatr a methinë angeic;
Drei jë kö la aqane troa kötre angeic hnene la itre sinee i angeic
Ke tha mano kö angeic sipo, ngo pëkö ca ka semesinen!
8 Ame la atr ka hetre wangatrehmekun,* ke ka hnimi angeice kö.
Ame la atr ka wangatrun la atreine waiewekë, ke tro angeic a kepe thangane ka loi.
9 Tha tro jë kö a pë thupen kowe la temoë ka thoi,
Nge ame la atr ka thoi lapaa tune la angeic a mano, ke tro angeic a mec.
10 Tha ijije kö tro la hmo a mel tune la trenamo;
The qaja pala ha la hlu ka musinëne la itre nekö i joxu!
11 Ame la atreine thelewekë ne la atr, ke ka ahmitrëne la elëhni i angeic,
Nge tro ha qaja aloinyi angeic, ke tha nyipiewekëne* kö angeic la hna tria koi angeic.
12 Ceitune hi la elëhni ne la joxu memine la aqane ho ne la liona,*
Ngo ceitune la ihnim i nyidrë memine la wene lepany hune la itre feja.
13 Ame la nekön ka hmo, angeic a axulune la itre jol kowe la keme i angeic,
Nge ame la föe ka iwesitrë lapaa,* ke ka ceitu memine la hune uma ka xölaxöla lapaa.
14 Edrö qaathene la itre kem, la uma me trengamo,
Ngo qaathei Iehova la föe ka hetre wangatrehmekun.
15 Ame la troa geny, ke ka iameköle,
Nge tro la ka pë jol a mecijiin.
16 Ame la atr ka drengethenge la wathebo, ke ka thupëne la mele i angeic;
Ame la ka la huliwa i angeic, ke tro angeic a mec.
17 Ame la ka amamane la ihnimi angeic kowe la ka co, ke angeic a hamën koi Iehova,
Nge tro kö nyidrëti a nyithupene la hnei angeic hna kuca.
18 Hajine jë la nekö i ö e ijine pala kö,
Matre tha tro kö a upezö eö la mec i angeic.
19 Ame la atr ka elëelëhni, ke tro kö angeic a xeni pun;
Maine tro eö a thele troa xatua angeic, tro pala pë hë eö lai a kuca.
20 Drenge ju la itre eamo nge wangatrune ju la ihaji,*
Matre tro eö elany a inamacan.
21 Nyimu mekun e kuhu hni ne la atr,
Ngo musi kö la aja* i Iehova.
22 Ame la hne së hna ajan thene la atr, ke ihnimi nyipici i angeic;
Nge ka loi ju kö la troa pë ewekë hune la troa thoi lapaa.
23 Ame la xoue Iehova, ke jëne mel;
Ame la ka hetrenyi lai, ke ka meköle hnyawa, nge pëkö akötre i angeic.
24 Ame la atr ka geny, angeic a li iwanakoime kowe la trepe xen,
Ngo goi thatreine fe angeic abëekëne hmaca kowe la që i angeic.
25 Lepe ju la ka ihnyima sai, matre tro la ka majemin kapa asë la hna qaja a atreine hmek,
Nge hajine jë la atr ka trotrohnin, matre tro angeic a akökötrene la atrehmekun i angeic.
26 Ame la atr ka qanangazone la kem me helëne la thin
Ke ketre nekön ka axulune la hmahma me hnëjin.
27 Neköng, maine xele hë eö ma dreng la ihaji,
Ke tro hë eö a ananyine la itre trengewekë ne la atrehmekun.
28 Ame la temoë ka ngazo, ke angeic a methinëne la ewekë ka meköt,
Nge ame la që ne la itre ka iakötrë, ke angatr a madrine fë la ngazo.
29 Ame la iameköti, ke celë hi pun kowe la itre ka ihnyima sai,
Nge ame la jia, ke thatraqane la ju ne la itre hmo.