Salamo
HNAAKÖNINE ITUS
(Salamo 73-89)
Salamo i Asafa.
73 Ka nyipi lolo Akötresie koi Isaraela, kowe la itre ka hetre hni ka wië.
2 Ngo xönë hi tro ni a jea;
Maine ju, tro la lue cang a ucic.
3 Ke ame lo eni a öhne la tingeting ne la itre atr ka ngazo
Eni ha piine la itre ka pi tru.*
4 Eje hi, pëkö akötre i angatr la angatr a mec;
Pëkö engazone la ngönetrei* angatr.
5 Tha hnehengazo fe kö angatr tune la itre xaa atr,
Nge tha akötre kö angatr tune la itre xan.
6 Celë hi matre, ame la pi tru, ke otrene nyinawa* i angatr;
Hna heetrë angatr hnene la iakötrë.
7 Kola goe catre la itre luemeke i angatr pine la itre mo* i angatr;
Tru kö la hnei angatr hna hetreny hune la hnei angatr hna ajan.
8 Angatr a ihnyimasai me ithanata angazony.
Pine la aqane pi tru i angatr, angatr a thele troa iwajahuj.
9 Angatr a ewekë kösë ka draië angatr tune la hnengödrai,
Nge ka pi mama* la thineme i angatr e celë fen.
10 Qa ngöne lai, hnene la nöje i Akötresie hna ujë koi angatr,
Me iji la timi angatr ka tiqa.
11 Öni angatr: “Akötresie a atre tune kaa la ewekë ka traqa?
Atre jë fe kö hnene la Ka Draië Catr?”
12 Celë hi pengöne la itre atr ka ngazo laka, ka tingetinge pala hi la mele i angatr.
Tha mano kö angatr nyixane la itre mo i angatr.
13 Ka gufa la hnenge hna awiëne la hning
Memine lo eni a wasi wanakoim ngöne la pë ethan.
14 O drai, eni a hnehengazo;
Kola haji ni e nöjei hmakany.
15 Ngo maine qaja ju ni la itre ewekë cili,
Tro hë ni a mele thoi kowe la nöje i nyipë.*
16 Ame lo eni a thele troa trotrohnine lai,
Ke hna ajolëne la hning
17 Uti hë la eni a lö ngöne la uma ne hmi ka sisitria i Akötresie,
Ke öhne hë ni la pun kowe la itre atr ka ngazo.
18 Eje hi, nyipëti a ami angatr ngöne la gaa ucic.
Nyipëti a xomi angatr kowe la hnëjin.
19 Calemi hë la pune koi angatr!
Ekölöhini angatr, ke tro ha saqe me catrehnin!
20 Iehova fe, tune la kola hlë thupene la hna pu,
Tro nyipëti a apatrene triji* la hna puji angatr.
21 Ngo hnenge hna lapa fë trenge hni,
Nge hetre akötre ka tru e kuhu hning.*
22 Hnenge hna pë atrehmekun me pë inamacan;
Kösë eni la ketre öni ka pë trotrohnine qëmekei nyipë.
23 Ngo ame enehila, ce eni pala hi me nyipë;
Ke hnei nyipëti hna ea la ime macang.
24 Nyipëti a e ni hnene la eamo i nyipë,
Nge tro kö nyipëti a xomi ni kowe la lolo.
25 Ke drei la ka atreine xatua ni e koho hnengödrai e tha nyipëti kö?
Pë hmaca kö ewekë hnenge hna ajan e celë fen, ngo nyipëti hmekuje hi.
26 Ijije hi troa kucakuca la ngönetreing memine la hning,
Ngo Akötresie la giti ne la hning, me edröng epine palua.
27 Eje hi, tro ha patre la itre ka lapa ananyi nyipë.
Tro nyipëti a apatrene* la itre ka tha mele nyipici me nuetriji* nyipë.
28 Ngo ame koi ni, ka loi kö la troa easenyi Akötresie.
Hnenge hna xomi Iehova, Joxu Ka Sisitria nyine hnë zaeng,
Matre cainöjën asë la itre huliwa i nyipë.