Hnaaluene Tusi Itre Joxu

6 Ngöne la ketre drai, hnei itre nekö i perofeta hna qaja koi Elisaia ka hape: “Goeën, coco pala ha la götran hne së hna lapan. 2 Matre e aja i nyipë, tro huni a tro kowe la Ioridrano. Nge e cili, tro huni a isa ajö ikapa troa xupi batima, me lapan.” Matre öni Elisaia ka hape: “Ka loi, tro jë.” 3 Ngo önine la ketre: “Tro fe kö nyipë a ce tro me eahun?” Nge sa jë hi Elisaia ka hape: “Ka loi.” 4 Matre angeic a ce tro ju me angatr, nge ezine la Ioridrano, angatr a nyiqaane sa sinöe. 5 Nge ame hë la ketre a sa la sinöe, mala pi hi la fao ne ze hnine la tim. Matre angeic a sue jë ka hape: “Ekölöini masetang, ifekë zene lai!” 6 Ame hnene la atre ne la nyipi Akötresie hna hnyingëne ka hape: “Hna mala ekaa la faon?” Nge hnene lai trahmanyi hna köjane koi Elisaia. Matre angeic a sa pi la ketre neköi sinöe, me kuiën e cili, nge manije jë hi la fao ne ze. 7 Thupene lai, öni Elisaia: “Xome jë hë.” Nge hnene lai trahmanyi hna li im, me ea la fao ne ze.

8 Ngo hnene la joxu ne Suria hna thele isi me Isaraela. Angeic a ithanata jë me itre tane sooce i angeic, me hape: “Tro ni a acile la lapa ne sooceng ngöne la götrane celë, nge tro epuni a ce me eni.” 9 Ame hnene la atre ne la nyipi Akötresie hna iupi fë maca kowe la joxu ne Isaraela, me hape: “Wai nyipëti kö, the cili thenge kö, ke hnene la angetre Suria hna acil la lapa ne sooce i angatr e cili.” 10 Matre hnene la joxu ne Isaraela hna iupi fë maca kowe la itre ka lapane la götrane cili, matre hmekë angatr. Nge hnei Elisaia hna anyimua hmekën la joxu, nge hnei nyidrëti hna anyimua ananyine la itre götran hna qaja hnei Elisaia.

11 Nge celë hi ka amejëne la trenge hni ne la joxu ne Suria, matre angeic a hëne jë la itre tane sooce i angeic, me hape: “Hetre atre ka ce xöl memine la joxu ne Isaraela thei easë! Drei? Qaja jë koi ni!” 12 Ame hnene la ketre tane sooce hna sa ka hape: “Tha eahuni kö joxung! Ngo zö i Elisaia, perofeta e Isaraela. Angeice hi la ka thuemacane la joxu ne Isaraela, la itre ewekë hnei nyipëti hna qaja hnine la hnahage i nyipë.” 13 Matre önine la joxu ka hape: “Thele angeice jë, nge tro hë ni a upe la itre xan troa xolouthi angeic.” E thupen, hna thuemacanyi nyidrë laka, Elisaia e Dothana. 14 Ame hnene la joxu hna upe la itre hos, me itre ikatr, memine la trongene isi ka ala nyimu. Nge hnei angatr hna traqa e hej, me cile xötreithe la traon.

15 Matre e hmahmakany, hnene la hlue ne la atre ne la nyipi Akötresie, hna mejë me tro, nge öhne ju hi angeic la trongene isi, me itre hos, me itre ikatr ka cile xötreithe la traon. Matre öni angeice jë hi ka hape: “Ekölöini maseta, tro së la a tune kaa?” 16 Ngo sa jë hi Elisaia ka hape: “The xou kö, ke ala nyimu kö së hui angatr.” 17 Thupene lai, Elisaia a thithi jë me hape: “Iehova fe, pane fe pi la luemeke i angeice la, matre öhne jë fe angeic.” Ame hnei Iehova hna canga fe la luemekene lai hlu, nge öhne ju hi angeic laka, ngöne la itre wetr xötreithi Elisaia, ka tiqa catr hnei hos me itre ikatr eë.

18 Matre ame hë la Elisaia a öhne laka, angetre Suria a nango easeny, angeic a thithi jë koi Iehova me hape: “Pane atimekë angatre* jë.” Nge Akötresieti a atimekë angatr ju, thenge lo sipo i Elisaia. 19 Thupene lai, öni Elisaia: “Epuni a imenu gojeny, tha traone celë kö la hnei epuni hna thel. Xötrethenge ni jë, tro ni a tro sai epun kowe la atr hnei epuni hna thel.” Ngo angeic a xomi angatre jë a tro Samaria.

20 Nge ame hë la angatr a traqa e Samaria, öni Elisaia: “Iehova fe, pane fe pi la luemeke i angatr matre öhne jë angatr.” Ame hnei Iehova hna fe la luemeke i angatr, nge öhne ju hi angatr ka hape, angatr e nyipine Samaria. 21 Matre ame hë la kola öhnyi angatr hnene la joxu ne Isaraela, öni nyidrëti koi Elisaia ka hape: “Kaka, tro kö ni a humuthi angatr? Tro ni a humuthi angatr?” 22 Ngo öni Elisaia: “The humuthi angatr kö. Ka majemine kö eö humuth la itre hnei eö hna ngaan me oth? Thue falawa i angatre jë pe me tim, matre tro angatr a xeni me ij. Nge e thupen, nue angatre hmaca pi troa bëeke kowe la joxu i angatr.” 23 Ame hnene la joxu hna kuci xeni atrunyi koi angatr, nge hnene la angetre Suria hna xeni me ij, nge nyidrëti a upi angatre hmaca pi kowe la joxu i angatr. Qa ngöne lai, tha bëeke hmaca kö e Isaraela la itre sooc ne Suria ka atrekënö.

24 Nge e thupen, hnei Benadada joxu ne Suria, hna acasine la trongene isi* i angeic asë, nge angeic a tro ju troa lapa xötreithe Samaria. 25 Ame hna jiinë xen atruny e Samaria, ke qea pi hë la hnei angetre Suria hna cile xötreithe Samaria. Qa ngöne lai, hna traqa koi 80 lao piese sileva la ca hene boliko, nge ame la lue hnatrapaimë* agetri piny, ke traqa koi 5 lao piese sileva. 26 Nge ngöne la ketre drai, hnene la joxu ne Isaraela hna tro hune la ihag, nge hnene la ketre föe hna hë nyidrë me hape: “Wai hun joxung!” 27 Nge önine la joxu: “E tha xatua nyipoti kö hnei Iehova, nga tro ni a öhne ekaa la nyine xatua nyipo? Ngöne la hnë lepe qitr? Ngöne la hnë weje wene vin?* Ngöne la hna kuci oel?” 28 Nge öni nyidrëti hmaca: “Nyipoti a u?” Matre önine lai föe: “Hnene la föe celë hna qaja koi ni ka hape, ‘Awe jë la nekö i eö, matre tro nyiso a öni enehila, nge elany, tro pena nyiso a öni la neköng.’ 29 Matre hnei nyio hna atrone me öni la neköng. Ngo ngöne la drai thupen, öning koi angeic, ‘Awe jë pena la nekö i ö, matre tro nyiso a öni,’ ngo hnei angeic hna juetrëne la nekö i angeic.”

30 Nge ame hë la kola dreng lai hnene la joxu, hnei nyidrëti hna kuie zezene la iheetre i nyidrë. Matre ame ju hi la nyidrëti a tro hune la ihag, hnene la nöj hna öhne laka, nyidrëti a heetrë ibëek ka tru thenyin fene la itre iheetre* i nyidrë. 31 Nge öni nyidrë: “Epi tro Akötresieti a nyithupene koi ni, e tha thupa kö ni enehila la he i Elisaia nekö i Safata!”

32 Nge Elisaia a nango lapa hnine la uma i angeic, nge ce angeic me itre qatr. Matre hnene la joxu hna upe la ketre sooc troa tro pa. Ngo qëmekene tro la atr a traqa, hnei Elisaia hna qaja koi itre qatr ka hape: “Atre hi epuni ka hapeu, hnene la nekö i atre ihumuth, hna upe la ketre troa thupa la heng. Ngo e öhne hë epuni la sooc e traqa, thinge ju la qëhnelö, nge ea catrëne ju, matre tha tro kö angeic a lö. Tha drenge kö epuni la mejene la joxu i angeic ka tro hutrö i angeic?” 33 Angeice pala kö a ithanata me angatr, nge xulu pi hi la sooc. Nge önine la joxu: “Qaathei Iehova la akötre celë. Matre tro pala kö ni a mejiune fë nemene koi Iehova?”