Hnaaluene Tus i Aqane Lapa Itre Joxu

21 Thupene lai, hnei Iehosafata hna meköl ngöne la mec me itre qaaqaa i nyidrë, nge hna kelemi nyidrë me angatr, ngöne la Traone i Dravita. Ame hna acili joxu Iorama nekö i nyidrë, troa nyihna i nyidrë. 2 Hane hi la itre trejin me Iorama, itre nekö i Iehosafata: Azaria, me Iehiela, me Zakaria, me Azaria, me Mikaela, me Sefata. Angatre la itre nekö i Iehosafata joxu ne Isaraela. 3 Hnene la keme i angatr hna hamë angatr la itre ahnahna ka nyimutre, ahnahna sileva me gool, me itre ewekë ka tru thupen, me itre traon hna eköhagen e Iudra. Ngo ame kö la baselaia, hnei nyidrë hna nue koi Iorama, ke pane nekö i nyidrëti lai.

4 Thupene la hna xome la musi ne la keme i nyidrë, hnei Iorama hna humuthe hnei taua la nöjei trejin me nyidrë, me itre xa he ne nöj e Isaraela, matre acatrene la mus i nyidrë. 5 Traqa koi 32 lao macatre i Iorama, lo kola acili joxu nyidrë, nge hnei nyidrëti hna musi koi 8 lao macatre e Ierusalema. 6 Ceitune hi la itre ngazo i nyidrë me itre joxu ne Isaraela, lo itre ngazo hna kuca hnene la fami i Ahaba, ke hnei nyidrë hna faipoipo memine la nekö i Ahaba jajiny. Hnei nyidrëti hna kuca la ngazo qëmeke i Iehova. 7 Ngo tha ajane kö Iehova troa apatren la itre xötre joxu* ka xulu qaathei Dravita, ke nyidrëti a metrötrëne lo isisinyikeu i nyidrë me Dravita. Hnei nyidrëti lo hna sisinyi koi Dravita laka, tro pala hi angeic me itre nekö i angeic a hetre laame cil.

8 Ngöne la ijine mus i Iorama, hnene la nöje Edoma hna icilekeu memine la mus i Iudra, nge angatr a acile jë la sipu joxu i angatr. 9 Matre hnei Iorama hna mejë me itre tane isi i nyidrë, nge angatr a sasaithe ju la ifego memine la nöjei ikatre i nyidrë. Nge hnei angetre Edoma me itre tane la itre ka ti ikatr, hna cile xötreithi nyidrë. Ngo hnei nyidrë hna mejë e jidr, me ngaa angatr. 10 Ngo hnene pala hi la nöje Edoma hna icilekeu memine la mus i Iudra, nge uti pala hi enehila. Nge ngöne la ijine cili, hnene fe la itre atrene Libena, hna icilekeu me Iorama, ke hnei nyidrëti hna nuetriji Iehova, Akötresi ne la itre qaaqaa i nyidrë. 11 Nge hnei nyidrëti fe hna kuca la itre hnë hmi gaa hmitrötr hune la itre wetr ne Iudra, matre ukune la angetre Ierusalema troa tha mele nyipici ngöne la hmi angatr.* Matre nyidrëti a amenu Iudra jë.

12 Ame la pun, hnei nyidrëti hna kapa la ketre maca hna fejan hnei Elia perofeta, kola hape: “Hane hi la hna qaja hnei Iehova Akötresi ne la qaaqaa i ö Dravita, ‘Tha nyitipune kö eö la tulu i Iehosafata keme i ö, me Asa joxu ne Iudra. 13 Ngo hnei ö pe hna xome la thiina ne la itre joxu ne Isaraela, nge hnei ö hna uku Iudra, me angetre Ierusalema troa tha mele nyipici ngöne la hmi angatr,* tune lo aqane kuca hnene la fami Ahaba. Nge goi humuthe fe eö la itre trejin me eö, itre nekö ne la keme i ö, itre atre lai ka lolo kö hui ö. 14 Celë hi matre tro Iehova a lep angazone la nöje i ö, me itre nekö i ö trahmany, me itre föi ö, me nöjei ewekë i ö asë. 15 Nge ame eö, troa tithi ö hnei nöjei pengöne mec, nge tro fe eö a uti xel, uti hë la troa hulia e nöjei drai.’”

16 Thupene lai, hnei Iehova hna ukune la angetre Filisiti, me angetre Arab ka lapa ezine la angetre Aithiope, troa isi me Iorama. 17 Ame hnei angatr hna lö catr e hnine la nöje Iudra, me eöth asë la itre ewekë hnine la uma i joxu, me itre nekö i nyidrë trahmany, me itre föi nyidrë. Ngo lapa ju pe kö la ketre nekö i nyidrë, Iehoaza,* lo ka co. 18 Thupene lai, hnei Iehova hna lepi Iorama hnei meci ne xel ka pë nyin. 19 Matre thupene la lue macatre, hna hulia la itre xel i nyidrë hnene lai mec. Nge tru catre la akötre i nyidrë qëmekene tro nyidrëti a mec. Ngo tha hnene kö la nöje i nyidrë hna amele eë,* tune lo aqane kuca i angatr kowe la itre qaaqaa i nyidrë. 20 Traqa koi 32 lao macatre i Iorama lo kola acili joxu nyidrë. Hnei nyidrëti hna mus koi 8 lao macatre e Ierusalema. Pëkö ala casi ka hane treije pi nyidrë. Nge hna kelemi nyidrë ngöne la Traone i Dravita, ngo tha ngöne la itre hua ne la itre joxu.