Hnaaluene Tusi Itre Joxu
3 Ngöne la kola 18 lao macatre ne mus i Iehosafata joxu ne Iudra, hna acili joxu Iorama nekö i Ahaba troa joxu ne Isaraela. Hnei nyidrë hna mus koi 12 lao macatre e Samaria. 2 Hnei Iorama hna kuca la ngazo qëmeke i Iehova, ngo co ju kö la itre ngazo i nyidrë hune la kem me thine i nyidrë, ke hnei nyidrëti hna lep apatrene la sine feni ka hmitrötr* i Baala, lo hna acil hnei keme i nyidrë. 3 Ame pe, ceitune hi la itre ngazo i nyidrë, me itre ngazo hna kuca hnei Isaraela fene la mus i Ieroboama nekö i Nebata. Nge hnei nyidrëti pala hi hna kuca la itre ngazo cili.
4 Nge ame Mesa joxu ne Moaba, ke ka axö mamoe, matre hna upi angeic troa kuiëne kowe la joxu ne Isaraela la hna athip, ene la 100 000 lao neköi mamoe, me 100 000 lao nani trahmany hna tha xötre pen. 5 Nge ame hë la kola mec hnei Ahaba, hnene la joxu ne Moaba hna icilekeu memine la joxu ne Isaraela. 6 Matre ngöne la ijine cili, hnei Iorama joxu hna tro qa Samaria, me hën asë la itre sooc ne Isaraela. 7 Hnei nyidrëti fe hna upe la maca celë koi Iehosafata joxu ne Iudra: “Hnene la joxu ne Moaba hna icilekeu me eni. Tro kö eö a ce tro me eni troa isi me Moaba?” Matre sa jë hi Iehosafata ka hape: “Tro ni a ce tro me eö. Tha isa pengöi nyiso kö, nge tune fe la itre sooceng me itre sooce i eö, me itre hoseng me hose i ö.” 8 Thupene lai, öni nyidrë: “Tro sa kaa thenge?” Matre öni Iorama: “Tro sa tro thenge la gaa qaqacil e Edoma.”
9 Nge hnene la joxu ne Isaraela, memine la joxu ne Iudra, me joxu ne Edoma hna tro ju. Thupene la hna pane kano koi 7 lao drai, pë ju hi tim kowe la itre sooc, me itre öni hnei angatr hna xome trongën. 10 Matre önine jë hi la joxu ne Isaraela ka hape: “Ekölöini së! Hnei Iehova hna hë së, köni joxu, matre nue së koi angetre Moaba!” 11 Nge öni Iehosafata jë hi ka hape: “Hetre perofeta i Iehova kö e celë? Nge maine hetreny, tro sa pane hnyinge koi Iehova jëne lai perofeta.” Matre önine la ketre atre huliwa kowe la joxu ne Isaraela ka hape: “Nyipici, Elisaia nekö i Safata, lo ka nei tim kowe la lue ime i Elia.”* 12 Öni Iehosafata jë hi ka hape: “Nga thei angeice hi la trengewekë i Iehova.” Matre hnene la joxu ne Isaraela, me Iehosafata, memine la joxu ne Edoma hna tro troa wai Elisaia.
13 Ngo öni Elisaia kowe la joxu ne Isaraela ka hape: “Eö a ue ce? Tro pi troa wange la itre perofeta ne la keme me thine i eö.” Ngo önine la joxu ne Isaraela: “Waea ke hnei Iehova hna hë hun, köni joxu, matre nue huni koi angetre Moaba.” 14 Ngo sa jë hi Elisaia ka hape: “Qëmeke i Iehova Akötresie ka mel, joxu ne la itre trongene isi e hnengödrai, lo hnenge hna nyihluen,* eni hi la a qaja hnyawane koi ö, maine tha metrötrë Iehosafata ju ni, joxu ne Iudra, goi xele fe ni ma goeë eö, me nyipiewekë eö. 15 Ngo enehila, tro ja thenge la ketre ka elo arp.”* Matre ame ju hi la kola elo arp, hnene la ua* i Iehova hna nyiqaane huliwa thei Elisaia. 16 Matre öni angeice jë hi: “Hane hi la hna qaja hnei Iehova, ‘Sine jë la nyimu hnaop hnine la hnathupe celë, 17 ke hane hi la maca i Iehova: “Tha tro kö epuni a drei eny, me öhne la mani, ngo tro la hnathupe celë a tiqa hnei tim. Nge tro hë epuni a ij, me itre öni epun, me itre xa si i epun.”’ 18 Nge tha jole kö lai koi Iehova, ke tro fe nyidrëti a nue koi epuni la angetre Moaba. 19 Qa i epuni pe troa lep apatren asë la itre traon hna eköhagen, me itre traone ka tru. Tro fe epuni a satrije la itre sinöe ka lolo, me thinge la itre qeqe ne tim, me kuië etë ngöne la itre hlapa ka lolo.”
20 Nge ame hë e hmakany, hmekune la kola tro fë la huuj ne la itre wene feja, xulu pi hi la tim qa ngöne la nöje Edoma, ame hna di asë la hnathup.
21 Nge dreng asë hë angetre Moaba laka, hnene la köni joxu hna traqa troa isi me angatr. Matre angatr a hëne jë la nöjei trahmanyi ka atreine ajö jia ne isi,* me acili angatr ngöne la ifego ne la nöj. 22 Nge e hmahmakany la angatr a hlë, kola cicinyi la jö hune la tim. Nge pine laka, angatr a qëmek kowe la tim, ej a palulu kösë madra. 23 Matre öni angatr: “Madra lai! Ma hnene la itre joxu hna itö ihumuth hnei taua. Öi angetre Moaba, ewekë i easë pë hë la itre mo i angatr!” 24 Ngo ame hë la angetre Moaba a lö hnine la lapa ne sooc ne la angetre Isaraela, cile jë hi la angetre Isaraela troa humuthi angatr. Matre hnene la angetre Moaba hna ikötreny. Nge hnene la angetre Isaraela hna lö hnine la nöje Moaba troa humuthe la itre atren, 25 me lep apatrene la itre traon. Nge itre sooc asë a isa kuiëne la itre etë matre troa kelem la itre hlapa ka lolo. Nge angatr a thinge ju fe la itre qeqe ne tim, me satrije la itre sinöe ka lolo. Ngo cile ju pe kö la itra etë ne Kira-hareseth, matre hnene la itre sooc ka tha trehle hna cile xötreithe la ihag, me thëtrij.
26 Nge ame hë la kola öhn hnene la joxu ne Moaba laka, ase hë ngaa angeic, hnei angeic hna xome la 700 lao sooc ka cile fë taua, matre thele jëne troa tro kowe la joxu ne Edoma. Ngo tha eatre ju kö la mekuna i angeic. 27 Haawe, angeic a xome ju la pane nekö i angeic, lo ka troa nyihna i angeic troa joxu, matre huujën hune la ihag, nyine huuj ne dreuth asë.* Ame hna wesitre la itre atr kowe la angetre Isaraela, nge hnene la itre sooc hna mejë qa ngöne la nöj ne la joxu ne Moaba, me bëeke kowe la itre nöje i angatr.