Levitiko

26 “‘Nge tha tro kö epuni a kuca la itre haze ka pë men, nge tha tro kö epuni a acili ketre hnasaatr, maine ketre ipoto ka hmitrötr.* Nge tha tro kö epuni a amë la ketre etë hna tratraun ngöne la nöje i epun nyine thili kow, ke Iehova ni, Akötresi epun. 2 Nge qa i epuni troa thupëne la itre sabathing, me metrötrëne* la uma ne hming. Iehova ni.

3 “‘Maine tro epuni a xötrethenge* la itre hnenge hna amekötin, me metrötrëne la itre wathebong, me trongën itre ej, 4 tro hë ni a hamë epun la mani ngöne la nyipi ijin, nge tro hë la ihnadro a aciane la itre wen ej, nge tro ha wa la itre sinöe ngöne la itre hlapa. 5 Ame la ijine lepelepe qitr, ke uti hë la ijine menuë rezë. Nge ame la ijine menuë rezë, ke uti hë la ijine traa feja; tro hë epuni a xeni mej la falawa i epun, me lapa tingeting ngöne la nöje i epun. 6 Tro hë ni a amë la tingeting ngöne la nöj, nge tro hë epuni a meköl nge pëkö nyine tro epuni a xouen; nge tro ni a apatrene qa ngöne la nöj la itre öni wael ka ihej, nge tha tro kö la taua ne isi a trongëne la nöje i epun. 7 Tro hë epuni a weje la itre ithupëjia me epun, nge tro hë angatr a kei hnene la taua qëmekei epun. 8 Tro la ala 5 thei epun a weje la ala 100, nge tro la ala 100 thei epun a weje la ala 10 000, nge tro la itre ithupëjia me epun a kei hnene la taua qëmekei epun.

9 “‘Tro ni a amanathithi epun,* me kuca matre tro epuni a hnaho me mana, nge tro ni a metrötrëne la isisinyikeung me epun. 10 Pine laka, epuni pala kö a xeni la hna menuën lo macatre hnapan, qa i epun troa trije la hnapan matre nyi göhnene la ka hnyipixe. 11 Tro ni a amë la uma maanong nyipi epun, nge tha tro kö ni a nuetriji epun. 12 Tro ni a tro nyipi epun, nge tro ni a Akötresi epun, nge tro epuni a nöjeng. 13 Iehova ni Akötresi epun, atre xomi epun qa Aigupito, matre tha tro hmaca kö epuni a nyi hlu; hnenge hna hutra la itre ehnefe ne hlue i epun, matre tro epuni a atreine cile meköt.*

14 “‘Ngo maine tha tro kö epuni a drei ni, me metrötrëne la itre wathebo celë, 15 nge maine tro epuni a thipetrij la itre wathebong, me methinëne la itre hnenge hna amekötin, matre tha metrötrën hë epun la itre wathebong, me ena la isisinyikeung, 16 haawe, hane hi la nyine tro ni a kuca koi epun: tro ni a axulune la xou koi epun, memine la meci ne idrefitr,* me fiva, nge tro ha lö la luemeke i epun, uti hë la troa pë trengecatre i epun. Nge tro ha gufa la itre hnei epun hna eëny, ke tro la itre ithupëjia me epun a xeni la itre hnei epun hna traan. 17 Tro ni a triji epun, nge tro la itre ithupëjia me epun a ngaa epun; tro la itre ka methinë epun a thahluë epun, nge tro epuni a kötr, ngacama pëkö ka weji epun.

18 “‘Nge maine tha drei ni pala kö hnei epun, ke tro hmaca kö ni a a 7 lao thaucë epun, pine la itre ngazo i epun. 19 Tro ni a kuca matre tha tro hmaca kö epuni a pi tru, nge tro ni a kuca matre tro la hnengödrai i epun a tune la fao, nge tro la ihnadro i epun a tune la kopa. 20 Nge tro hë epuni a huliwa gufa, ke tha tro kö la ihnadro a hamëne la itre wene ne ej, nge tha tro kö a wa la itre sinöe ne la nöj.

21 “‘Ngo maine tro pala hi epuni a icilekeu me eni me tha drei ni, tro hmaca kö ni a a 7 lao thaucë epun, thenge la itre ngazo i epun. 22 Nge tro ni a upe koi epuni la itre öni wael, nge tro itre ej a thapa la itre nekö i epun, me humuthe la itre si i epun, me acone la etru i epun. Nge tro ha pë atr ngöne la itre gojenyi epun.

23 “‘Ngo maine tha kapa pala kö epuni la ihajing, nge epuni pala hi a icilekeu me eni, 24 ketre tro fe ni a icilekeu me epun, me a 7 lao thaucë epun pine la itre ngazo i epun. 25 Tro hë ni a upe la itre ithupëjia me epun troa lepi epun, pine epuni tha metrötrëne la isisinyikeung. Nge maine tro epuni a kötre zae ngöne la itre traone i epun, tro hë ni a lö fë la mec koi epun, nge tro ha nue epun kowe la itre ithupëjia. 26 E traqa ni apatrenetrij la itre hnë* ami xen i epun, tro hë la 10 lao föe a sane la falawa i epun ngöne hi la ca ifur, me tuluth la falawa koi epun; tro hë epuni a xen, ngo tha tro kö epuni a mej.

27 “‘Ngo maine tro pala kö epuni a tha idrei, nge epuni pala hi a icilekeu me eni, 28 tro ha tru la elëhning koi epun, nge tro hë ni a a 7 lao thaucë epun, pine la itre ngazo i epun. 29 Tro hë epuni a öni la itre ngönetrei ne la itre nekö i epuni trahmany, nge tro hë epuni a öni la itre ngönetrei ne la itre nekö i epuni jajiny. 30 Tro ni a apatrene la itre hnë hmi i epun gaa hmitrötr, me apatrenetrij la itre ita ne dreu ka pui loi i epun, nge tro ni a iatëkeune la itre ngönetrei i epun ka mec, tune la itre ngönetrei ne la itre idrola ka sis* i epun. Nge tro ni a nuetriji epun, ke sisi hë epuni koi ni. 31 Tro hë ni a nue la itre traone i epun kowe la taua, nge tro hë ni a apatrene la itre hnë hmi epun, nge tha tro kö ni a hngölëne la itre so ka pui loi ne la itre huuje i epun. 32 Tro hë ni a apatrene la nöj, nge tro hë la itre ithupëjia me epun ka lapa ngöne la nöj a sesëkötr. 33 Nge tro hë ni a aisaije epun nyipine la itre nöj, me uthe la taua me weji epun; tro ha apatrene la nöje i epun, me lep apatrene la itre traone i epun.

34 “‘Ame hë la epuni a lapa ngöne la nöj ne la itre ithupëjia me epun, tro hë la ihnadro a mano.* Ngöne la ijine cili, tro la ihnadro a mano, ke ame ekö, tha hnei epuni kö hna nue la ihnadro troa pane mano. 35 Ame ngöne la ijine cili, tro la ihnadro a mano, ke tha hnen eje kö hna mano ngöne la itre sabathi epun, lo epuni a lapan ej.

36 “‘Ame pë hë la itre ka mel, ke tro ni a aciane la xou e kuhu hni i angatr, ngöne la itre nöj ne la itre ithupëjia me angatr; tro angatr a kötr hnene la mejene la itre dröne hnitr hna ufe hnei eny, nge tro angatr a kötr me kei kösë hna weje huzun hnei taua, ngo pë pe ka weji angatr. 37 Tro la ketre a kei tranyi ketre, tune la itre ka kötre taua, ngo pë pe ka wej. Thatreine jë kö tro epuni a cile kowe la itre ithupëjia me epun. 38 Tro epuni a mec nyipine la itre nöj, nge tro la nöj ne la itre ithupëjia me epun a ulumi epun. 39 Ame la itre atr thei epun ka troa lapa, tro angatr a hnyiqetr ngöne la nöj ne la itre ithupëjia me angatr, pine la itre ngazo i angatr. Eje hi, tro angatr a hnyiqetr pine la itre ngazo ne la itre keme i angatr. 40 Tro angatr a qaja amamane la itre ngazo i angatr, memine la itre ngazo me aqane mele thoi ne la itre keme i angatr. Nge tro angatr a jelenyipicin laka, hnei angatr hna mele thoi, lo angatr a icilekeu me eni. 41 Matre hnenge fe hna icilekeu me angatr, me tro sai angatr kowe la nöj ne la itre ithupëjia me angatr.

“‘Maine jë, tro hë la hni i angatr hna tha xötrehatren* a ipië, nge tro hë angatr a nyithupene la itre ngazo i angatr. 42 Nge tro hë ni a mekune lo isisinyikeung me Iakobo, memine lo isisinyikeung me Isaaka. Nge tro hë ni a mekune lo isisinyikeung me Aberahama, nge tro hë ni a mekune la nöj. 43 Ngöne la ijine tro angatr a nuetrij la nöj, tro hë eje lai a hane nyipiewekën la itre sabath, me lapa pë atren. Nge tro hë angatr a nyithupene la itre ngazo i angatr, ke hnei angatr hna nuetrije la itre hnenge hna amekötin, me methinëne la itre wathebong. 44 Ngo ngacama angatr a lapa ngöne la nöj ne la itre ithupëjia me angatr, tha tro kö ni a nuetriji angatr me sisi angatr, ke wanga apatrenyi angatre pi, nge wanga triane pi la isisinyikeung me angatr. Iehova ni, Akötresi angatr. 45 Pi angatr, tro hë ni a mekune la isisinyikeung memine la itre qaaqaa i angatr, lo hnenge hna lö fë qa Aigupito qëmekene la nöjei nöj, matre mama pi koi angatr laka, Akötresi angatre ni, Iehova ni.’”

46 Celë hi itre hna acil, me itre hna amekötin, me itre wathebo hnei Iehova hna acile göi nyidrë memine la angetre Isaraela, hune la wetre Sinai jëne Mose.