Salamo
Masekil* i Ethana atre Ezera.
89 Pi tro ni a nyiman la itre hatrene ihnimi nyipici i Iehova uti hë epine palua.
Qa ngöne la qëng, tro ni a qaja amamane la nyipici i nyipë kowe la nöjei xötr.
2 Ke öning: “Tro ha cile huti* la ihnimi nyipici uti hë epine palua,
Nge hnei nyipëti hna acile hutine la nyipici i nyipë ngöne la itre hnengödrai.”
3 “Ase hë ni isisinyikeu memine la atr hnenge hna iën;
Ase hë ni sisinyi koi Dravita hlueng:
4 ‘Tro ni a acile hutine la itre matra i ö uti hë epine palua,
Nge tro ni a acatrene la therone i ö uti hë la nöjei xötr.’” (Sela)
5 Iehova fe, itre hnengödrai a atrune la itre huliwa ka mingöminge i nyipë,
Eje hi, kola atrune la aqane nyipici i nyipë ngöne la icasikeu i ange ka hmitrötr.
6 Ke drei la ka ceitu me Iehova e koho hnengödrai?
Nge drei la ka tui Iehova thene la itre nekö i Akötresie?
7 Hna metrötrë Akötresieti hnyawa ngöne la icasikeu i ange ka hmitrötr;
Ka draië nge pëkö sai nyidrë xötreithi nyidrë.
8 Iehova fe, joxu ne la itre trongene isi,
Drei la ka trene men tui nyipë, Ia fe?
Kola lapa xötreithi nyipë hnene la nyipici i nyipë.
9 Nyipëti a musinëne la ecatrene la hnagejë;
Ame la kola mejë la gejë, ke nyipëti a aupun.
10 Hnei nyipëti hna waja ficanyi Rahaba* me humuthi angeic.
Hnei nyipëti hna isa ijene la itre ithupëjia me nyipë hnene la ime ka catre i nyipë.
11 Ewekë i nyipëti la hnengödrai, nge ewekë i nyipëti la ihnadro;
Nyipëti la ka xup la ihnadro me itre alien ej.
12 Nyipëti la ka xup la götrane kolopi me kolojë;
Kola madrin me atrune la ëje i nyipë hnene la wetre Tabora me Heremona.
13 Ka men la ime i nyipë;
Ka catre la iwanakoime i nyipë;
Ka draië la ime maca i nyipë.
14 Hna nyitrepene la therone i nyipë hnene la meköt me thiina ka meköt;
Kola cile qëmekei nyipë hnene la ihnim* me nyipici.
15 Ka madrine la nöj ka atrunyi nyipë cememine la madrin.
Iehova fe, angatr a tro ngöne la lai ne la qëmeke i nyipë.
16 O drai, angatr a madrin pine la ëje i nyipë,
Nge kola adraië angatr hnene la thiina ka meköt i nyipë.
17 Ke nyipëti la elolone la trengecatre i angatr,
Nge pine laka nyipëti a kepe hun, kola hamë trengecatre* hun.
18 Ke ewekë i Iehova la petre hun,
Nge ewekë ne la Ka Hmitrötr e Isaraela la joxu hun.
19 Ame ngöne la ijine cili, hnei nyipëti hna qaja kowe la itre ka nyipici koi nyipë jëne la hna meköle goeën, ka hape:
“Ase hë ni thue trengecatrene la atr ka catr;
Ase hë ni adraiëne la ketre atr hna iëne qaathene la nöj.
20 Hnenge hna öhnyi Dravita hlueng;
Hnenge hna sië angeic hnene la oeleng ka hmitrötr.
21 Tro la iwanakoimeng a sajuë angeic,
Nge tro la imeng a aegöcatrenyi angeic.
22 Tha tro kö la ala cas thene la itre ithupëjia a upi angeic troa kuië mani,
Nge tha tro kö a akötrë angeic hnene la atr ka tha meköti kö.
23 Qëmekei angeic, tro hë ni a lep anyilanyilan la itre ithupëjia
Nge tro ni a apatrene la itre ka methinë angeic.
24 Tro hë la ihniming* me nyipicing a ce me angeic,
Nge jëne la ëjeng, tro ha tru la trengecatre i angeic.
25 Tro ni a xejë la ime i angeic hune la hnagejë*
Memine la ime maca i angeic hune la itre hneopegejë.
26 Tro hë angeic a hë ni ka hape: ‘Nyipëti la Kemeng,
Me Akötresing, me Giting atre amele* ni.’
27 Nge tro ni a acili angeic kösë hna pane hnahon,
Nge tro hë angeic a draië hune la nöjei joxu ne la fen.
28 Tro hë ni a thupëne uti hë epine palua la ihnimi nyipicing koi angeic,
Nge tha tro kö a hane senge la isisinyikeung me angeic.
29 Tro ni a acile la itre matra i angeic epine palua
Nge tro ni a acile hutine la therone i angeic tune la itre hnengödrai.
30 Maine tro la itre nekö i angeic a nuetrije la wathebong
Me xele ma trongëne la itre hnenge hna amekötin
31 Me angazone la itre hnenge hna ahnith
Me tha drengethenge* la itre wathebong,*
32 Haawe, tro hë ni a nyithupen la tha idrei* angatr hnei jia
Me itre tria i angatr hnene la wameuc.
33 Ngo tha tro kö ni a nue la ihnimi nyipicing me angeic
Me thoi* kowe la hnenge hna sisiny.
34 Tha tro kö ni a sasaith la isisinyikeung
Me saze la hna qaja hnene la ukeineqëng.
35 Pine laka Akötresieti ka hmitrötre ni, hnenge hna aca sisiny;
Tha tro kö ni a thoi koi Dravita.
36 Tro ha cile hut epine palua la matra i angeic;
Tro ha cile hut la therone i angeic tune la jö ka eje qëmekeng.
37 Tune la treu, tro hë angeic a cile hut epine palua
Me tune la treu ka mama lapaa* e koho hnengödrai.” (Sela)
38 Ngo hnei nyipëti hna thipetriji angeic me nue angeic;
Ke hnei nyipëti hna elëhni kowe la atr hnei nyipëti hna iën.
39 Hnei nyipëti hna nuetrij me wangacone la isisinyikeu i nyipë memine la hlue i nyipë;
Hnei nyipëti hna kuiëne trij e kuhu hnadro la korona i angeic.
40 Hnei nyipëti hna thë akaqan la itre ihag* etë i angeic;
Hnei nyipëti hna akeine la itre ihag atraqatr ne la traon.
41 Hnene la itre ka tro qëmekei angeic hna thapa la itre ewekë i angeic;
Hna hnyima sai angeic hnene la itre ka lapa ezi angeic.
42 Hnei nyipëti hna nue la itre ithupëjia troa ngaa* angeic;
Hnei nyipëti hna thue madrinen la itre ithupëjia me angeic.
43 Hnei nyipëti fe hna lep abëekëne la taua i angeic,
Nge tha hnei nyipëti kö hna nue angeic troa hun ngöne la isi.
44 Hnei nyipëti hna apatrene la elolo i angeic
Me kuiëne trij e kuhu hnadro la therone i angeic.
45 Hnei nyipëti hna ahopatrene la itre drai ne thupëtresiji angeic;
Hnei nyipëti hna heetrë angeic hnei hmahma. (Sela)
46 Iehova fe, uti hë eu la tro nyipëti a zae? Uti hë epine palua?
Hapeu, tro pala kö la elëhni i nyipëti a mel tune la eë?
47 Mekune kö laka, xalaithe hi la itre drai ne mele ni!
Hapeu, hetre aliene kö la nyipëti a xupe la itre atr?
48 Ke drei la atr ka atreine mel nge tha ka hane kö mec?
Atreine kö angeic troa amele angeice kö qa ngöne la menen la Hua?* (Sela)
49 Iehova fe, ekaa lo itre hatrene ihnimi nyipici i nyipëti ekö,
Lo hnei nyipëti hna isisinyikeu me Dravita ngöne la nyipici i nyipë?
50 Iehova fe, the thëthëhmine kö lo kola qaqane la itre hlue i nyipë;
Mekune kö laka, eni a xomihnine* la kola qaqa ni hnene la nöjei nöj asë;
51 Ke Iehova fe, kola iqaqa hnene la itre ithupëjia me nyipë;
Hnei angatr hna qaja angazone la itre jë ne la atr hnei nyipëti hna iën.
52 Loi e troa atrunyi Iehova, uti hë epine palua. Amen me Amen.