Salamo

8 Iehova fe Joxu hun, mingöminge catre la ëje i nyipë e cailo fen;

Hnei nyipëti hna adraiëne la elolo i nyipë e koho hune la itre hnengödrai!*

 2 Qa ngöne la që ne la itre nekönatr me itre medreng, hnei nyipëti hna acil la men

Pine la itre ka icilekeu me nyipë,

Matre lep ahumun la ithupëjia memine la atr ka itëkeun.

 3 Ame la eni a goeën la itre hnengödrai i nyipë, itre huliwa ne la lue ime i nyipë,

Ene la treu me itre wëtresij hnei nyipëti hna hnëkën,

 4 Öninge jë hi: “Ka ue la atr, matre tro nyipëti a meku angeic,

Memine la nekö i atr, matre tro nyipëti a nyipi angeic?”

 5 Hnei nyipëti hna xupi angeic, ngo tha ka iananyi kö* memine la edraiëne la itre angela,*

Nge hnei nyipëti hna petrë angeic hnene la lolo me mingöming.

 6 Hnei nyipëti hna acili angeic troa musinëne la itre huliwa ne la lue ime i nyipë;

Hnei nyipëti hna amë la nöjei ewekë asë, fene la lue ca i angeic:

 7 Ene la nöjei öni ka co me ka tru,

Memine la itre öni wael,

 8 Memine la itre waco ne hnengödrai, me itre i e kuhu hnagejë,

Memine la nöjei ewekë ka nyinyapën la itre hnagejë.