Numera

29 “‘Nge ame ngöne la pane drai ne la hna 7 ne treu, tro ha hetre ihë ka hmitrötr. Tha tro kö epuni a kuca la ketre huliwa ka hace. Nge ngöne la drai cili, troa ufe la trutru. 2 Tro epuni a huujën nyine huuje ne dreuth asë ka pui loi koi Iehova, la ca neköi kau, me ca mamoe trahmany, me 7 lao neköi mamoe ka ca macatre, nge ka pë ethan. 3 Nge tro fe epuni a tro fë la huuj ne la itre wene feja* ka ce tro memin, ene la farin ka lolo hna ce lomën* me oel: köni omera thatraqane la kau, nge lue omera thatraqane la mamoe trahmany, 4 nge ca omera thatraqane la isa ca neköi mamoe. 5 Tro fe a huujëne la ca neköi nani nyine huuj ne ngazo, matre troa nue la ngazo i epun. 6 Nge tro la itre huuje cili a nyixane lo huuj ne dreuth asë nyine tro fë e nöjei treu, memine la itre huuj ne wene feja ka ce tro memin, memine la huuje ne dreuth asë nyine tro fë lapaan, memine la itre huuj ne wene feja ka ce tro memin, memine la itre waina nyine fii huuj, thenge lo hna amekötin. Celë hi huuje ne eë ka pui loi koi Iehova.

7 “‘Ngöne la hna 10 ne drai ne la hna 7 ne treu, tro ha hetre ihë ka hmitrötr, nge tro hë epuni a xomacone la mele i epun.* Hmitrötr e tro epuni a kuca la ketre huliwa. 8 Nge qa i epun troa tro fë nyine huuje ne dreuth asë, ka pui loi koi Iehova, la ca neköi kau, me ca mamoe trahmany, me 7 lao neköi mamoe ka ca macatre nge ka pë ethan. 9 Nge ame kowe la itre huuj ne wene feja i angatr, ene la farin ka lolo hna ce lomën* me oel: troa köni omera thatraqane la kau, me lue omera thatraqane la mamoe trahmany, 10 me ca omera kowe la 7 lao neköi mamoe. 11 Tro fe a huujëne la ca neköi nani nyine huuj ne ngazo. Tro la itre huuje cili a nyixane la huuj ne ngazo ngöne la drai ne ialoinekeun,* memine la huuj ne dreuth asë hna tro fë lapaan, memine la itre huuj ne wene feja ka ce tro memin, memine la waina nyine fii huuj.

12 “‘Ame ngöne la hna 15 ne drai ne la hna 7 ne treu, troa hetre ihë ka hmitrötr. Hmitrötr e tro epuni a kuca la ketre huliwa ka hace, ngo tro pe epuni a kuca la ketre feet koi Iehova koi 7 lao drai. 13 Qa i epun troa tro fë la huuje ne dreuth asë, lo huuje ne eë ka pui loi koi Iehova, ene la 13 lao neköi kau, me lue mamoe trahmany, me 14 lao neköi mamoe ka ca macatre nge ka pë ethan. 14 Ame kowe la itre huuj ne wene feja ka ce tro memin, ene la farin ka lolo hna ce lomën* me oel: troa köni omera thatraqane la 13 lao kau, me lue omera thatraqane la lue mamoe trahmany, 15 nge ca omera thatraqane la 14 lao neköi mamoe. 16 Tro fe a huujëne la ca neköi nani nyine huuj ne ngazo. Nge tro itre ej a nyixane la huuje ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

17 “‘Ngöne la hnaaluene drai: troa tro fë la 12 lao neköi kau, me lue mamoe trahmany, me 14 lao neköi mamoe ka ca macatre nge ka pë ethan, 18 memine la itre huuj ne wene feja, memine la itre waina nyine fii huuj thatraqane la itre kau, me itre mamoe trahmany, me itre neköi mamoe thenge la etru i angatr, tune lo hna amekötin. 19 Tro fe a huujëne la ketre neköi nani nyine huuj ne ngazo, nge tro la itre huuj cili a nyixane lo huuje ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

20 “‘Ngöne la hnaakönine drai: troa tro fë la 11 lao kau, me lue mamoe trahmany, me 14 lao neköi mamoe ka ca macatre nge ka pë ethan, 21 memine la huuj ne wene feja ka ce tro memin, memine la waina nyine fii huuj thatraqane la itre kau, me itre mamoe trahmany, me itre neköi mamoe thenge la etru i angatr, tune lo hna amekötin. 22 Nge tro fe a huujëne la ca nani trahmany nyine huuj ne ngazo, nge tro la itre huuje cili a nyixane la huuj ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

23 “‘Ngöne la hna 4 ne drai: troa tro fë la 10 lao kau, me lue mamoe trahmany, me 14 lao neköi mamoe ka ca macatre nge ka pë ethan, 24 memine la huuj ne wene feja ka ce tro memin, memine la waina nyine fii huuj thatraqane la itre kau, me itre mamoe trahmany, me itre neköi mamoe thenge la etru i angatr, tune lo hna amekötin. 25 Tro fe a huujëne la ca neköi nani nyine huuj ne ngazo. Nge tro la itre huuje cili a nyixane la huuje ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

26 “‘Ngöne la hna 5 ne drai: troa tro fë la 9 lao kau, me lue mamoe trahmany, me 14 lao neköi mamoe ka ca macatre nge ka pë ethan, 27 memine la huuj ne wene feja ka ce tro memin, memine la waina nyine fii huuj thatraqane la itre kau, me itre mamoe trahmany, me itre neköi mamoe thenge la etru i angatr, tune lo hna amekötin. 28 Nge tro fe a huujëne la ca nani trahmany nyine huuj ne ngazo. Nge tro la itre huuje cili a nyixane la huuj ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

29 “‘Ngöne la hna 6 ne drai: troa tro fë la 8 lao kau, me lue mamoe trahmany, me 14 lao neköi mamoe ka ca macatre nge ka pë ethan, 30 memine la huuj ne wene feja ka ce tro memin, memine la waina nyine fii huuj thatraqane la itre kau, me itre mamoe trahmany, me itre neköi mamoe thenge la etru i angatr, tune lo hna amekötin. 31 Nge tro fe a huujëne la ca nani trahmany nyine huuj ne ngazo. Nge tro la itre huuje cili a nyixane la huuj ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

32 “‘Ngöne la hna 7 ne drai: troa tro fë la 7 lao kau, me lue mamoe trahmany, me 14 lao neköi mamoe ka ca macatre nge ka pë ethan, 33 memine la huuj ne wene feja ka ce tro memin, memine la waina nyine fii huuj thatraqane la itre kau, me itre mamoe trahmany, me itre neköi mamoe thenge la etru i angatr, tune lo hna amekötin. 34 Nge tro fe a huujëne la ca nani trahmany nyine huuj ne ngazo. Nge tro la itre huuje cili a nyixane la huuj ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

35 “‘Nge ngöne la hna 8 ne drai, tro ha hetre ihë ka hmitrötr. Nge tha tro kö epuni a kuca la ketre huliwa ka hace. 36 Qa i epun troa tro fë la huuje ne dreuth asë, lo huuje ne eë ka pui loi koi Iehova, ene la ca kau, me ca mamoe trahmany, me 7 lao neköi mamoe ka ca macatre nge ka pë ethan, 37 memine la huuj ne wene feja ka ce tro memin, memine la waina nyine fii huuj thatraqane la kau, memine la mamoe trahmany, memine la itre neköi mamoe thenge la etru i angatr, tune lo hna amekötin. 38 Nge tro fe a huujëne la ca nani trahmany nyine huuj ne ngazo. Nge tro la itre huuje cili a nyixane la huuj ne dreuth asë hna tro fë lapaan, memine la huuj ne wene feja ka ce tro memin, memine la waina nyine fii huuj.

39 “‘Tro epuni a tro fë la itre huuje cili thatraqai Iehova, ngöne la itre ijine feete i epun. Nge tro itre ej a nyixane la itre huuj hnei epuni hna sisinyi fë, maine itre huuj hnei epuni hna tro fë xanën, ene la itre huuj ne dreuth asë, me itre huuj ne wene feja, me itre waina nyine fii huuj, me itre huuj ne tingeting.’” 40 Ame hnei Mose hna qaja asë kowe la angetre Isaraela, tune lo hnei Iehova hna amekötin koi angeic.