Iosua

6 Ame pe, hna thinge hnyawan la itre qëhnelö ne la traon e Ieriko pine la angetre Isaraela; pëkö ka tro, nge pëkö ka lö ngöne la traon.

2 Matre öni Iehova jë hi koi Iosua: “Goeën, ase hë ni nue Ieriko koi ö, memine la joxu i angatr, me itre soc ka catre thei angatr. 3 Tro asë hi epun itre soc, a aca tro kanothe la traon. Tro epuni a kuca tun koi 6 lao drai. 4 Tro eö a upe la 7 lao atre huuj troa tro qëmekene la Pua Ne Isisinyikeu, me isa xome la ca trutru hna kuca hnei jiane nani trahmany. Ngo ame ngöne la hna 7 ne drai, tro epuni a a 7 lao kanothe la traon, nge tro la itre atre huuj a ufi trutru. 5 Ame hë la kola ho* la itre trutru, nge epuni a drei mejen, ke tro asë hi la itre soc a sue ne isi. E cili, tro ha kei la ihag ne la traon, nge tro la itre soc a lö hnine la traon, me isa tro meköt qëmekei angatr.”

6 Matre hnei Iosua nekö i Nuna hna hën asë la itre atre huuj, me hape: “Xututhe* jë la pua ne isisinyikeu, nge tro la 7 lao atre huuj a tro pa qëmekene la Pua i Iehova, me isa xome trongëne la ca trutru hna kuca hnei jiane nani trahmany.” 7 Thupene lai, öni angeic kowe la itre soc ka hape: “Tro jë hë, nge tro kanothe jë la traon. Tro la itre soc ka hetre jia ne isi a tro pa qëmekene la Pua i Iehova.” 8 Matre ame ju hi la Iosua a ase ithanata memine la itre soc, hnene lo 7 lao atre huuj ka xome trongëne la itre trutru qëmekei Iehova, hna tro pa me ufi trutru. Nge kola ixötrethenge hnene la pua ne isisinyikeu i Iehova. 9 Hnene la itre soc ka hetre jia ne isi hna tro pa, nge kola ixötrethenge hnene la itre atre huuj ka ufi trutru memine la Pua, nge itre xaa soc pë hë la ka thinge la tro. Nge kolo pala hi a ufi trutru hnene la itre atre huuj.

10 Ngo hnei Iosua pe lo hna amekötin kowe la itre soc ka hape: “The sue kö, nge the ithanata pi kö. The qaja pi kö la ketre ewekë uti hë la tro ni a upi epun ka hape: ‘Sue jë!’ Nge e cili, tro hë epuni a sue.” 11 Ame hnei Iosua hna upe troa aca kanothe fë la Pua i Iehova xötreithe la traon; thupene lai, hnene la itre trahmanyi hna bëeke hmaca kowe la lapa, me meköl e cili.

12 Nge ame hë e hmakany, hnei Iosua hna canga ilë. Hnene la itre atre huuj hna xututhe* la Pua i Iehova. 13 Ame pena lo 7 lao atre huuj ka tro qëmekene la Pua i Iehova, nge ka xometrongëne lo itre trutru hna kuca hnei jiane mamoe trahmany, ke angatre pala hi a ufi trutru. Kola tro qëmekei angatr hnene la itre soc ka hetre jia ne isi, nge itre xaa soc a thinge la tro me xötrethenge la Pua i Iehova; nge kolo pala hi a ufi trutru hnene la itre atre huuj. 14 Celë hi hnaaluene ijin angatr a tro kanothe la traon; hnei angatre hi hna aca kanothe la traon, me bëeke hmaca kowe la lapa. Nge aqane kuca i angatr pala hi lai ngöne la 6 lao drai.

15 Ame hë ngöne la hna 7 ne drai, hnei angatre hna canga ilë e kaqa ne lai, me kanothe la traon, tune pala hi lo aqane kuca i angatr. Ngo drai cili hmekuje hi, la angatr a a 7 lao kanothe la traon. 16 Thupene la angatr a a 7 lao kanothe la traon, hnene la itre atre huuj hna ufi trutru, nge öni Iosua kowe la itre soc: “Sue jë, ke ase hë Iehova nue la traone koi epun! 17 Lepe apatrene* pi la traon, me itre alien ej, ke itre ewekë i Iehova asë hi lai. Ngo tha tro pi kö epuni a ketri Rahaba lo föe ne gojeny, memine la itre atr e hnine la hnalapa i angeic, ke hnei angeic hna juetrëne lo lue espio hne së hna up. 18 The tro pi kö epuni a xome la ketre ewekë nyine apatren, wanga tro epuni a piin me xome la ewekë cili. Tro hë epuni e cili a hëne la hnëjin kowe la nöj Isaraela, nge tro hë ej a ketre ewekë nyine apatren. 19 Ngo ame kö la sileva me gool, me itre ewekë hna kuca hnei kopa me fao, ke ka hmitrötr koi Iehova. Nge tro ha amë la itre ewekë cili ngöne la hna ami trengamo i Iehova.”

20 Matre ame ju hi la kola mexeme la itre trutru, hnene la itre soc hna aca tro sue. Nge thupene la hnei angatr hna drenge la mejene trutru, me sue ne isi, ke kei pi hi la ihag. Ame hnene la itre soc hna lö kowe la traon, me isa tro meköt qëmekei angatr, me thapa la traon. 21 Hnei angatr hna humuth* asë la itre atren la traon, itre trahmany me föe, itre xötre ka co me itre qatr, itre kau me itre mamoe, me itre boliko.

22 Nge öni Iosua kowe lo lue espio ka hape: “Lö jë kowe la hnalapa ne la föe ne gojeny, nge lö sai angeice pi memine la itre ka lapa thei angeic, tune lo hnei epon hna sisinyi koi angeic.” 23 Ame hnene la lue nekö trahmany cili hna tro, me lö sai Rahaba memine la kem me thine i angeic, me itre xa i angeic, me nöjei atr ka lapa thei angeic, eje hi, kolo asë hi lo fami i angeic. Thupene lai, hnei nyidro hna tro sai angatre hnyawa uti hë la ketre götran tröne la lapa ne Isaraela.

24 Ame hnene la itre soc hna manithe la traon me itre alien ej. Ngo ame kö la sileva, me gool, me itre ewekë hna kuca hnei kopa me fao, ke hna amë asë hnine la hnahagë trengamo i Iehova, hnine la uma maano.* 25 Casi hi la hnei Iosua hna amelen a Rahaba lo föe ne gojeny, memine la fami ne la keme i angeic, me nöjei atr ka lapa thei angeic. Nge angeice pala hi a mel e Isaraela, ke hnei angeic hna juetrëne lo lue espio hnei Iosua hna upe troa waipengön e Ieriko.

26 Nge ngöne la ijine cili, hnei Iosua hna ieji* me hape: “Epi troa hnëjine la atr ka mekun troa xupe hmaca la traon e Ieriko, qëmekei Iehova. Maine tro angeic a ami trepene la traon, tro hë angeic a nyithupen hnene la mele ne la pane nekö i angeice trahmany. Nge maine tro angeic a acile la itre qëhnelö, tro hë angeic a nyithupen hnene la mele ne la nekö i angeice ka co.”

27 Celë hi aqane xatua Iosua hnei Iehova, nge ketre atr ka hlemu hë angeic e cailo fen.