Levitiko

7 “‘Hane hi la hna amekötin göne la huuj ne ialoinekeun: Celë hi ewekë ka nyipi hmitrötr. 2  Tro ha humuthe la öni nyine huuj ne ialoinekeun ngöne la götran hnë humuthe la itre huuj ne dreuth asë, nge tro ha thathane* la madran ej ngöne la nöjei götran ne la ita ne huuj. 3 Tro la atre huuj a tro fë asë la giris, ene la giris ka eje ngöne la pun, memine la giris ka heetrëne la itrenge xel, 4 me lue wene thulumat, memine la girisine ka atuthe la lue wene thulumat. Nge ame hë la angeic a hule la lue wene thulumat, tro fe angeic a xome la igiris ka heetrëne la idre. 5 Nge tro la atre huuj a huhajin itre ej hune la ita ne huuj, nyine huuj ne eë koi Iehova. Celë hi huuj ne ialoinekeun. 6 Nge tro la itre trahmany ka xom la hnëqa ne atre huuj, a isa öni ngöne la götrane gaa hmitrötr, ke ketre ewekë lai ka hmitrötre catr. 7 Casi hi la wathebo göne la huuj ne ngazo, me huuj ne ialoinekeun: ame la mitr ne la öni hna huujën hnene la atre huuj matre he la ngazo, ke thatraqai angeic.

8 “‘Maine tro la atre huuj a tro fë la huuj ne dreuth asë ne la ketre atr, ke thatraqane la atre huuj la ikupein öni.

9 “‘Ame la nöjei huuj ne wene feja hna san, maine hna atrone ngöne öl ka co maine falaipen, ke thatraqane la atre huuj. Ewekë i angeic hë la huuje cili. 10 Ngo ame pena la nöjei huuj ne wene feja hna nyi oelën maine ka qaqacil, ke thatraqane la itre nekö i Arona, nge troa thawa ceitun la itre huuj.

11 “‘Hane hi la hna amekötin kowe la atr ka mekune troa tro fë la huuj ne tingeting koi Iehova. 12 Maine angeic a tro fë la huuj matre amamane la ole i angeic, qa i angeic troa tro fë cememine la huuj ne ole, la itre falawa ka pë levenen hna nyi oelën kösë korona, me itre areto ka pë levenen hna fii hnei oel, me itre falawa kösë korona hna kuca hnei farin ka lolo, nge hna lomëne hnyawan me ce lep me oel. 13 Nge tro angeic a tro fë cememine la huuje i angeic, la itre falawa kösë korona hna levenën, memine la huuj ne tingeting hnei angeic hna nyi ahnahnan, matre amamane la hni ne ole i angeic. 14 Nge qa ngöne la huuje cili, tro angeic a xome la isa ca falawa ka isa pengön, me tro fë nyine huuje ka hmitrötr thatraqai Iehova. Nge ame la huuje cili, ke thatraqane la atre huuj, ka thathane* la madra ne la itre huuj ne tingeting. 15 Nge troa öni la mitr ne la huuj ne ole ngöne la drai ne kola huujën ej. Nge tha tro kö a ami munën uti hë e hmakany.

16 “‘Maine ame la huuje i angeic ke göne lo hna sisiny, maine ketre huuj hna tro fë xanën, tro ha öni ngöne la drai ne angeic a huujën, nge ame la munëne la mitr, ijiji angeice hmaca troa öni elany. 17 Ngo maine tro pala kö a hetre munëne ngöne la hnaakönine drai, ke tro ha dreuthetrij. 18 Nge maine troa öni la huuj ne tingeting ngöne la hnaakönine drai, tha tro kö a kapa la atr ka tro fë la huuje cili. Nge tha tro kö a e la huuje i angeic, ke ewekë lai ka sis. Nge ame la atr ka troa öni la huuje cili, tro hë angeic a xeni pun la ngazo i angeic. 19 Ame pe, tha tro kö a öni la mitr hna ketr hnene la ketre ewekë ka pui ngazo, ngo tro pe a dreuthetrij. Nge ame la nöjei atr ka hmitrötr, ijiji angatre hi troa öni la mitr hna ahmitrötrën.

20 “‘Ngo ame la nöjei atr ka pui ngazo, nge ka öni la huuj ne tingeting thatraqai Iehova, ke tro ha apatrenyi angatr qa ngöne la nöje i angatr. 21 Maine tro la ketre atr a ketr la ewekë ka pui ngazo, ngacama qaathene ju hë la ketre atr maine öni, maine nöjei ewekë ka sis ka pui ngazo, nge angeic a öni la huuj ne tingeting thatraqai Iehova, ke tro ha humuthi angeic qa ngöne la nöje i angeic.’”

22 Nge öni Iehova hmaca koi Mose: 23 “Qaja jë kowe la angetre Isaraela, ka hape: ‘Tha tro kö epuni a öni la igirisine la kau memine la nekö i mamoe trahmany, maine nani föe. 24 Nge ame la igirisin ne la öni hna öhn a ka meci hë, memine la igirisin ne la öni hna humuth hnene la ketre öni, ijije hi troa huliwan itre ej, ngo tha tro jë kö epuni a öni. 25 Ke ame la atr ka öni la igiris ne la öni hna tro fë nyine huuje ne eë thatraqai Iehova, tro ha apatrenyi angeic qa ngöne la nöje i angeic.

26 “‘Ngo tha tro kö epuni a öni la madra ngöne la itre götran hnei epuni hna lapa ngön, ene la madra ne waco maine ketre öni pena. 27 Ame la atr ka troa öni la madra, tro ha apatrenyi angeic qa ngöne la nöje i angeic.’”

28 Nge öni Iehova hmaca koi Mose: 29 “Qaja jë kowe la angetre Isaraela ka hape: ‘Ame la atr ka tro fë la huuj ne tingeting koi Iehova, qa i angeic troa hamëne la ketre sin ne la huuj ne tingeting, nyine huuj thatraqai Iehova. 30 Qa i angeic troa tro fë hnene la lue ime i angeic, la igiris memine la imano ne la öni, nyine huuj ne eë thatraqai Iehova. Nge tro angeic a jum ej nyine huuj ne jumejum qëmekei Iehova. 31 Nge qa ne la atre huuj troa huhajine la igiris hune la ita ne huuj, ngo ame la imano, ke thatraqai Arona me itre nekö i angeic.

32 “‘Nge qa ngöne la itre huuj ne tingetinge i epun, qa i epun troa tro fë kowe la atre huuj la inaea maca nyine huuje ka hmitrötr. 33 Nge ame la nekö i Arona ka troa tro fë la madra ne la itre huuj ne tingeting, memine la giris, ke tro hë angeic a xome la inaea maca. 34 Nge qa ngöne la itre huuj ne tingeting ne la angetre Isaraela, tro pena ni a xome lo imano ne la öni hna tro fë nyine huuj ne jumejum,* memine la inaean hna tro fë nyine huuj ka hmitrötr, nge tro ni a hamën itre ej koi Arona atre huuj, me kowe la itre nekö i angeic. Celë hi wathebo ka epine palua kowe la angetre Isaraela.

35 “‘Celë hi edrö qa ngöne la itre huuj ne eë koi Iehova, hna amë acon kowe la itre atre huuj, ene Arona me itre nekö i angeic, ngöne la drai ne kola ië angatr troa kuca la hnëqa i angatr koi Iehova. 36 Nge hnei Iehova hna amekötin troa hamë angatr la edrö hna xome qa ngöne la itre huuj ne la angetre Isaraela, ngöne la drai ne kola ië angatr. Celë hi wathebo ka epine palua ngöne la nöjei xötr thupei angatr.’”

37 Hane hi la hna amekötin göne la itre huuj ne dreuth asë, me itre huuj ne wene feja, me itre huuj ne ngazo, me itre huuj ne ialoinekeun, me huuj nyine acil la itre atre huuj, memine la huuj ne tingeting, 38 tune la hnei Iehova hna amekötin koi Mose hune la wetre Sinai, lo ijin angeic a ahnith kowe la angetre Isaraela, troa tro fë la huuje i angatr koi Iehova, ngöne la hnapapa e Sinai.