Hnaaluene Tus i Samuela
24 Ame hna elëhni hnei Iehova koi Isaraela, ke hnene la ketre atr hna uku Dravita* me hape: “Tro jë troa e la etrune la angetre Isaraela me Iudra.” 2 Matre önine la joxu koi Ioaba, lo tan ne la trongene isi i nyidrë: “Tro jë ngöne la nöjei tribu ne Isaraela, qa Dana uti hë Bere-Seba, nge e jë la etrune la nöj, matre atre jë ni.” 3 Ngo öni Ioaba kowe la joxu: “Epi tro Iehova a nyixane la nöj koi 100 hmaca kö, nge epi tro la joxung a sipu öhn! Ngo hnauëne laka, mekune jë nyipë troa kuca la huliwa cili?”
4 Ngo catre kö la hna qaja hnei joxu hui Ioaba me itre tan. Matre Ioaba me itre tan a tro ju qaathei joxu, troa e la etrune la nöje Isaraela. 5 Angatr a sasaithe jë la Ioridrano, me acile la lapa i soc ezine Aroera, e götrane kolojë ne la traon ka cile nyipine la hnathup, ngöne la jë ne tro Gada. Nge angatr a tro hmaca ju a tro Iazera. 6 Ase jë hi, angatr a tro ju ngöne la nöje Gileada, me ngöne la nöje Tati-Hodesi, nge angatr a tro ju a tro Danaian, me jea e Sidona. 7 Nge angatr a tro ju kowe la hna xupi hag e Turo, me ngöne la nöjei traon i angetre Hivi me Kanana. Angatr a tro jë a tro Bere-Seba, ngöne la götrane kolojë ne Iudra. 8 Hane hi la aqane trongën angatre la nöj asë, nge angatr a bëeke ju a tro Ierusalema, thupene la 9 lao treu, me 20 lao drai. 9 Ame hnei Ioaba hna qaja koi joxu la etrun: E Isaraela, kola e la 800 000 lao soc ka cile fë taua, nge ala 500 000 e Iudra.
10 Ngo thupene la hna e la etrune la nöj, jole ju hi la mekuthetheu i Dravita. Matre öni nyidrë koi Iehova: “Ngazo ka tru la hnenge hna kuca. Matre Iehova fe, epi tro nyipë a nue la ngazong, ke ase hë ni huliwa menu.” 11 E hmakany, hmekune lo ijine hlë i Dravita, Iehova a ithanata ju me Gada, lo atre qeje pu ka hamë ithanata koi Dravita. Öni nyidrë: 12 “Tro ja qaja koi Dravita ka hape: ‘Hane hi la hna qaja hnei Iehova, “Eje qëmeke i eö la köni akötr, iëne jë la nyine tro ni a kuca koi eö.”’” 13 Matre Gada a lö ju koi Dravita me hape: “Nemene la mekuna i nyipë? Aja i nyipë tro la nöj a jiinë xeni koi 7 lao macatre? Maine pena, aja i nyipë tro itre ithupëjia a huzu nyipë koi köni treu? Maine tro pena a lepe la nöj hnei mec koi köni drai? Pane mekune hnyawa jë, nge qaja jë hë la nyine tro ni a sa kowe la atre upi ni.” 14 Ame hnei Dravita hna qaja koi Gada ka hape: “Ka seseu catre ni, ngo ka loi e tro sa kei kowe la lue ime i Iehova, ke atraqatre la trenge utipine i nyidrë. Ngo tha tro kö ni a kei kowe la ime i atr.”
15 Haawe, qaane ju hi la hmakanyi celë uti hë la drai hna sa, hnei Iehova hna lepi Isaraela asë hnei mec ka ixötrekeu. Matre traqa koi 70 000 lao atr ka mec qaan e Dana uti hë Bere-Seba. 16 Nge ame hë la kola xeji im koi Ierusalema hnene la angela, hace jë hi la hni Iehova. Matre öni nyidrë kowe la angela ka humuthe la nöj ka hape: “Loi ju hë! Aipiëne ju hë la ime i ö.” Nge ame lai angela i Iehova, angeice hë ezine la hnë lepe qitr i Aruna, qa Iebusi.
17 Matre ame hë la Dravita a öhne lai angela e humuthe la nöj, öni Dravita koi Iehova: “Eni hi la ka kuca la ngazo, nge eni hi la ka huliwa menu. Ngo ame la itre neköi mamoe celë, nemene fe la ngazo i nyudren? Eni hi la ka troa xeni pun, eni me fami i kaka.”
18 Nge ngöne la drai cili, Gada a lö jë kowe la hnalapa i Dravita, nge öni angeic: “Elë jë kowe la hnë lepe qitr i Aruna qa Iebusi, nge acile jë la ketre ita ne huuj koi Iehova.” 19 Dravita a elë jë kowe la hnë lepe qitr, tune lo hna qaja hnei Iehova jëne Gada. 20 Nge ame hë la Aruna a öhnyi joxu me itre hlue i nyidrë e traqa, angeic a canga tro ju koi angatr, me thil qëmekene la joxu. 21 Nge öni angeic koi Dravita: “Joxu fe, nyipëti a traqa fë nemen e celë hnalapang?” Sa jë hi Dravita ka hape: “Eni a pi itöne la hnë lepe qitr i eö, me acili ita ne huuj koi Iehova, matre patre pi la akötr ka lepe la nöj.” 22 Ngo öni Aruna koi Dravita ka hape: “Joxu fe, xome jë la hnepadrong, nge huujëne jë la hnei nyipëti hna ajan.* Hane fe hi la itre kau, xome jë troa tro fë huuj ne dreuth asë. Nge ame göi sinöe, hane hi la itre ikatr nyine lepelepe qitr, me sine inehe ne isilikeu* kau. 23 Joxu fe, eni a hamëne gufan asë koi nyipë.” Nge öni angeice hmaca: “Epi tro Iehova Akötresi nyipë a amanathithi nyipë.”
24 Ngo öni joxu koi Aruna: “Waea, tro ni a nyithupen, ke thatreine kö ni huujën koi Iehova Akötresing, la ewekë ka pë thupen.” Haawe, Dravita a itöne jë la hnë lepe qitr me itre kau, koi 50 lao sekele* sileva. 25 Thupene lai, Dravita a acili ita ne huuje jë koi Iehova, me tro fë la itre huuj ne dreuth asë, me itre huuj ne tingeting. Ame hnei Iehova hna drenge la itre xëwe thatraqane la nöj, nge patre ju hi la akötr ka lepi Isaraela.