Esodro
31 Nge Iehova pala hi a ithanata me Mose, öni nyidrë: 2 “Dreng, ase hë ni ië* Bezaleli nekö i Uri, nekö i Huro qa ngöne la tribu ne Iudra. 3 Tro ni a atiqanyi angeic hnene la ua i Akötresie, matre tro angeic a hetre inamacan, me atrein, me wangatrehmekun ngöne la nöjei pengöne huliwa, 4 me atreine eköthe la itre huliwa nyine amingömingön, me huliwane la gool, me sileva, me kopa, 5 me thupa la itre etë me iacatrenekeun, me kuca la nöjei pengöne ewekë hnei sinöe. 6 Nge ketre, ase hë ni acili Aholiaba, nekö i Ahisamak ne la tribu ne Dana troa xatua angeic. Nge tro ni a ainamacanëne la hni ne la itre atr ka maca* troa huliwa, matre tro angatr a kuca asë la hnenge hna amekötine koi eö, 7 ene lo itat ne icasikeu, memine la pua ne Anyipicin, memine la ithingen e hune lai pua, me nöjei ewekë hnine la itat, 8 memine la laulau me itre ewekë ka ce tro memin, memine la ita ne laam hna kuca hnei nyipi gool, me itre ewekë ka ce tro memin, memine la ita ne dreu ka pui loi, 9 memine la ita ne huuj thatraqane la itre huuj ne dreuth asë, me itre ewekë ka ce tro memin, memine la trepene tim me trepen ej, 10 me itre iheetr hna sile hnyawan, me itre iheetr hna ahmitrötrën thatraqai Arona atre huuj, me itre iheetr kowe la itre nekö i angeic, ngöne la angatr a cilëne la hnëqa ne atre huuj, 11 memine la oel ne iën, memine la nyine dreu ka pui loi thatraqane la uma ne hmi. Nge qa i angatr troa kuca asë thenge la hnenge hna amekötine koi eö.”
12 Öni Iehova hmaca jë hi koi Mose: 13 “Ithanata jë kowe la angetre Isaraela nge hape jë, ‘Metrötrëne ju la itre sabathing, ke nyine hatrene lai koi ni me koi epun, ngöne la nöjei xötr atr i epun. Matre tro epuni a atre laka, ame ni Iehova, eni a ahmitrötrë epun. 14 Qa i epun troa metrötrëne la Sabath, ke ewekë ka hmitrötre lai koi epun. E tha metrötrëne kö ketre la Sabath, troa humuthi angeic. Nge e tro ketre a kuca la ketre huliwa la drai cili, tro ha apatrenyi angeic* qa ngöne la nöje i angeic. 15 Hna nue koi së troa huliwa koi 6 lao drai, ngo ame la hna 7 ne drai, tre sabath, drai ka pexej troa mano, nge ewekë lai ka hmitrötre koi Iehova. Ame la atr ka huliwa la drai Sabath, tro ha humuthi angeic. 16 Qa ne la angetre Isaraela troa metrötrëne la Sabath, tro angatr a metrötrëne la Sabath ngöne la nöjei xötr atr i angatr, celë hi isisinyikeu ka cile hut. 17 Hatrene lai ka epine palua koi ni me angetre Isaraela, ke ngöne la 6 lao drai, hnei Iehova hna xupe la hnengödrai memine la ihnadro, nge ame ngöne la hna 7 ne drai, fenesi hë nyidrë hna huliwa nge nyidrëti a mano.’”
18 Thupene la nyidrëti a ase ithanata me Mose hune la wetre Sinai, nyidrëti a hamë angeice pi la lue sine etë ne Anyipicin, lue sine etë hna cinyianyin hnene la hene wanakoime i Akötresie.