Levitiko

23 Öni Iehova hmaca jë hi koi Mose: 2 “Hape jë kowe la angetre Isaraela: “Ame la itre feete i Iehova hnei epuni hna troa atrun, ke itre icasikeu lai ka hmitrötr. Hane hi la itre feete koi ni:

3 “‘Ame ngöne la 6 lao drai, ijije hi troa huliwa, ngo ame ngöne la hna 7 ne drai, ke sabathi ne mano ka pexej, ketre icasikeu ka hmitrötr. Tha tro kö epuni a kuca la ketre huliwa. Sabathi hi lai thatraqai Iehova ngöne la nöjei götrane hnei epuni hna troa lapan.

4 “‘Hane hi la itre feet koi Iehova, itre icasikeu ka hmitrötr nyine tro epuni a atrun ngöne la ijine hna sa: 5 Ame la drai 14 ne la pane treu, ngöne la kola lö la jö,* ke Paseka* thatraqai Iehova.

6 Ame la drai 15 ne la treu cili, ke Feet Ne La Itre Falawa Ka Pë Levenen thatraqai Iehova. Tro epuni a xeni la itre falawa ka pë levenen koi 7 lao drai. 7 Ngöne la pane drai, troa hetre icasikeu ka hmitrötr. Tha tro kö epuni a kuca la ketre huliwa ka hace. 8 Ngo qa i epuni pe troa tro fë koi Iehova la huuje ne eë koi 7 lao drai. Ngöne la hna 7 ne drai, troa hetre icasikeu ka hmitrötr. Tha tro kö epuni a kuca la ketre huliwa ka hace.’”

9 Öni Iehova hmaca jë hi koi Mose: 10 “Hape jë kowe la angetre Isaraela: ‘Ame la epuni a troa lö kowe la nöj hnenge hna troa hamë epun, qa i epuni troa menuëne la itre hlapa i epun, me tro fë kowe la atre huuj la pane uke qitr* hnei epuni hna menuën. 11 Nge tro angeic a jumejume la uke qitr qëmekei Iehova, matre tro nyidrëti a kepe epun. Nge tro la atre huuj a jumejume ej, ngöne la drai thupene la sabath. 12 Ngöne la drai ne tro epuni a jumejume la uke qitr, qa i epuni troa tro fë koi Iehova la ketre huuj ne dreuth asë, ene la ketre neköi mamoe ka pë ethan, nge ka ca macatren. 13 Ame kowe la huuj ne wene feja ka ce tro memin, ke troa lue omera* ne farin ka lolo hna ithuenyikön me oel. Celë hi huuj ne eë ka pui loi koi Iehova; nge ame kowe la waina nyine fii huuj, ke troa traqa fë la sine* la ca hin. 14 Tha tro kö epuni a xeni falawa, me itre wene feja hna dreuth, me itre wene feja hna nyipi huj, e tha hnei epuni kö hna pane traqa fë la huuj ne la Akötresi epun. Celë hi wathebo ka cile hut ngöne la nöjei xötr atr, me ngöne la nöjei götran hnei epuni hna troa lapan.

15 “‘Tro epuni a e la 7 lao sabath, qaane la drai thupene la sabath, lo drai ne tro epuni a traqa fë uke qitr nyine huuj ne jumejum. Celë hi itre wiik ka pexej. 16 Tro epuni a e la 50 lao drai uti hë la drai thupene la hna 7 ne sabath. Thupene lai, qa i epuni troa tro fë huuj ne wene feja ka hnyipixe thatraqai Iehova. 17 Tro epuni a traqa fë qa ngöne la itre hnalapa i epun, la lue falawa nyine huuj ne jumejum, nge troa hnëkëne lue ej hnei lue omera* ne farin ka lolo me leven; celë hi itre pane wen hna menuën koi Iehova. 18 Tro fe epuni a tro fë memine la lue falawa, la 7 lao neköi mamoe ka pë ethan, nge ka ca macatren, memine la ca neköi kau trahmany, me lue nani trahmany. Nge tro epuni a huujëne itre ej nyine huuj ne dreuth asë koi Iehova, me ce huujën memine la itre huuj ne wene feja, memine la waina nyine fii huuj. Celë hi itre huuj ne eë ka pui loi koi Iehova. 19 Tro fe epuni a huujëne la ca neköi nani nyine huuj ne ngazo, me lue neköi mamoe ka ca macatren, nyine huuj ne tingeting. 20 Qa ne la atre huuj troa jumejume itre ej, nyine huuj ne jumejum qëmekei Iehova, ene la lue neköi mamoe, memine la itre falawa hna kuca hnene lo itre pane qitr hna menuën. Tro hë itre ej a hmitrötr koi Iehova, me thatraqane la atre huuj. 21 Ngöne la drai cili, tro epuni a sine la ketre icasikeu ka hmitrötr thatraqai epun. Tha tro kö epuni a kuca la ketre huliwa ka hace. Celë hi wathebo ka cile hut ngöne la nöjei xötr atr, me ngöne la nöjei götran hnei epuni hna troa lapan.

22 “‘E tro epuni a menuëne la itre hlapa ngöne la nöje i epun, tha tro kö eö a menuën asë la itre ngon ne la hlapa i ö, nge tha tro kö eö a hleme la munëne la itre hnei ö hna menuën. Tro pe eö a nue kowe la ka pë ewekë, me kowe la trenyiwa. Iehova ni Akötresi epun.’”

23 Öni Iehova hmaca jë hi koi Mose: 24 “Hape jë kowe la angetre Isaraela: “Ame la pane drai ne la hna 7 ne treu, ke drai ne mano ka pexej thatraqai epun, ketre drai ne amekunën hna nyihatren hnene la kola ufi trutru, ketre ihë lai ka hmitrötr. 25 Tha tro kö epuni a kuca la ketre huliwa ka hace, nge qa i epun troa tro fë la huuj ne eë thatraqai Iehova.

26 Öni Iehova hmaca jë hi koi Mose: 27 “Ngo ame la drai 10 ne la hna 7 ne treu, ke drai ne ialoinekeun.* Troa hetre icasikeu ka hmitrötr, nge tro epuni a amamane la hleuhleu* i epun pine la itre ngazo i epun, me tro fë huuj ne eë koi Iehova. 28 Tha tro kö epuni a kuca la ketre huliwa ngöne la drai cili, ke drai ne ialoinekeun, matre kuca la huuj ne ialoinekeun thatraqai epun, qëmekei Iehova Akötresi epun. 29 Ame la atr ka tha latresi* pine la itre ngazo i angeic ngöne la drai cili, ke tro ha humuthi angeic qa ngöne la nöje i angeic. 30 Nge ame la atr ka troa kuca la nöjei pengöne huliwa ngöne la drai cili, ke tro hë ni a apatrenyi angeic qa ngöne la nöje i angeic. 31 Tha tro kö epuni a kuca la ketre huliwa. Celë hi wathebo ka cile hut ngöne la nöjei xötr atr, me ngöne la nöjei götran hnei epuni hna troa lapan. 32 Ketre sabathe ne mano ka pexeje lai koi epun, nge tro epuni a amamane la hleuhleu i epun, pine la itre ngazo i epun, ngöne la drai 9 ne la treu cili, e hej. Qa i epun troa metrötrën la sabath, qaane ju hi la heji cili uti hë la ketre hej.”

33 Öni Iehova hmaca jë hi koi Mose: 34 “Hape jë kowe la angetre Isaraela: ‘Ngöne la hna 15 ne drai ne la hna 7 ne treu, troa atrune la Feet Ne Ihmelekap* koi 7 lao drai, thatraqai Iehova. 35 Ngöne la pane drai, troa hetre icasikeu ka hmitrötr, nge pëkö huliwa ka hace nyine tro epuni a kuca. 36 Ngöne la 7 lao drai, qa i epuni troa tro fë huuj ne eë koi Iehova. Ngöne la hna 8 ne drai, troa hetrenyi la ketre icasikeu ka hmitrötr, nge qa i epuni troa tro fë huuj ne eë koi Iehova. Celë hi icasikeu ka hmitrötr, nge pëkö huliwa ka hace nyine tro epuni a kuca.

37 “‘Celë hi itre feete i Iehova nyine tro epuni a atrun, tune la itre icasikeu ka hmitrötr, matre tro fë huuj ne eë koi Iehova, ene la huuj ne dreuth asë, memine la huuj ne wene feja, memine la waina nyine fii huuj, thenge la hna amekötin kowe la drai. 38 Tro itre ej a nyixan la itre huuj hna tro fë ngöne la itre sabathe i Iehova, me itre ahnahna, me itre huuj hna sisiny, me itre huuj hnei epuni hna tro fë xanën koi Iehova. 39 Ngo ngöne la drai 15 ne la hna 7 ne treu, la epuni a menuëne la itre hlapa i epun, qa i epuni troa atrune la feete i Iehova koi 7 lao drai. Ame la pane drai, ke drai ne mano ka pexeje thatraqai epun. Nge ame la hna 8 ne drai, ke tro fe ej a drai ne mano ka pexej. 40 Ame ngöne la pane drai, qa i epuni troa xome la itre wen ne la itre sinöe ka cia hlöeë, memine la itre dröne pama,* memine la itre picine sinöe ka cia hlöeë, memine la itre picine sinöe ka cia ngöne la itre hnathup.* Nge tro epuni a madrin qëmekei Iehova Akötresi epun, koi 7 lao drai. 41 Qa i epuni troa atrune la feete cili, tune la ketre feet thatraqai Iehova, koi 7 lao drai ngöne la macatre. Tro epuni a atrun ej ngöne la hna 7 ne treu; celë hi wathebo ka cile hut ngöne la nöjei xötr atr. 42 Tro epuni a lapa fene la itre ihmelekap koi 7 lao drai. Tro asë la angetre Isaraela a lapa fene la itre ihmelekap, 43 matre tro la nöjei xötr atr a atre laka, hnenge hna alapane la angetre Isaraela fene la itre ihmelekap, ngöne lo eni a tro sai angatr qa ngöne la nöje Aigupito. Iehova ni Akötresi epun.’”

44 Ame hnei Mose hna qaja amaman kowe la angetre Isaraela la itre feete i Iehova.