Deuteronomi
16 “Thupëne kö la treu Abiba, nge atrune jë la Paseka koi Iehova Akötresi ö, ke hnei Iehova Akötresi ö hna thepe eö qa Aigupito ngöne la treu Abiba, e jidr. 2 Tro eö a huujëne la Paseka koi Iehova Akötresi ö, ene la huuj hna xom qa ngöne la itre öni ka co me itre öni ka tru, ngöne la götran hnei Iehova hna iën troa acile la ëje i nyidrë. 3 Nge tha tro kö eö a ce xen la huuje cili memine la falawa hna levenën. Ngöne la 7 lao drai, tro eö a xen la falawa ka pë levenen, ene la falawa ne akötr, ke hnei ö hna tro nyimenyime qa Aigupito. Kuca jë lai ngöne la nöjei drai asë ne mele eö, matre troa amekunë eö la drai ne eö a tro qa Aigupito. 4 Nge ngöne la 7 lao drai, tha tro kö a hetre leven ngöne la nöje i ö asë; tha tro kö a amë uti hë e hmakany, la sine mitr hnei ö hna huujën ngöne la heji ne la pane drai. 5 Tha tro kö eö a huujëne la huuj ne Paseka, ngöne la nöjei traon hnei Iehova Akötresi ö hna hamë eö. 6 Ngo tro pe eö a huujëne la huuj ne Paseka ngöne la götran hnei Iehova hna iën troa acile la ëje i nyidrë. Tro eö a huujën ej e jidr, ngöne la kola lö la jö, hmekune lo ijine kola thepe eö qa Aigupito. 7 Tro eö a atron me öni ngöne la götrane hnei Iehova Akötresi ö hna troa iën. Nge ame hë e hmakany, tro hmaca eö a bëek kowe la itre itate i ö. 8 Ngöne la 6 lao drai, tro eö a xen la falawa hna tha levenën, nge ngöne la hna 7 ne drai, troa hetre icasikeu ka tru matre atrunyi Iehova Akötresi ö. Tha tro pi kö eö a kuca la ketre huliwa.
9 “Thupene lai, tro eö a e la 7 lao wiik qaane la ijine kola nyiqaane thupa la itre qiitr ka cil. Tro eö a e la 7 lao wiik, 10 me feetën la Feet Ne La Itre Wiik koi Iehova Akötresi ö, thenge la huuje hnei ö hna sipu axeciën. Ame la hnei ö hna troa hamën, ke troa ihmeku memine la etrune manathithi hnei ö hna kapa qaathei Iehova Akötresi ö. 11 Tro eö a madrin qëmekei Iehova Akötresi ö ngöne la götran hnei Iehova Akötresi ö hna iën troa acile la ëje i nyidrë; tro eö a madrin, eö me nekö i ö trahmanyi me jajiny, me hlue i ö (trahmanyi maine föe), memine la atre Levi ngöne la itre traone* i ö, memine la trenyiwa ka lapa thei ö, me nekön hna mecitrij hnei kem, me sine föe ka lapa nyipi ö. 12 The thëthëhmine kö laka, eö ekö la ketre hlu e Aigupito, nge qa i ö troa thupën me trongëne la itre wathebo celë.
13 “Ame hë la eö a xawan la itre xen qa ngöne la hnë lepe qitr, me hnë weje wene vin me oel, tro hë eö a atrune la Feet Ne La Itre Ihmelekap* koi 7 lao drai. 14 Tro eö a madrin ngöne la ijine cili, eö me nekö i ö trahmanyi me jajiny, me hlue i ö (trahmanyi maine föe), memine la atre Levi ngöne la itre traone i ö, memine la trenyiwa ka lapa thei ö, me nekön hna mecitrij hnei kem, me sine föe ka lapa nyipi ö. 15 Ngöne la 7 lao drai, tro eö a atrune la feet cili koi Iehova Akötresi ö ngöne la götrane hnei Iehova Akötresi ö hna troa iën, ke tro Iehova Akötresi ö a amanathithine la nöjei xeni asë, memine la nöjei huliwa i ö asë, nge tro hë eö a madrin.
16 “Ngöne la macatre, tro la nöjei trahmanyi asë a akönia cil qëmekei Iehova Akötresi ö ngöne la götran hnei nyidrëti hna troa iën: göne la Feet Ne La Itre Falawa Ka Pë Levenen, me Feet Ne La Itre Wiik, me Feet Ne La Itre Ihmelekap. Nge tha tro kö la ketre e angatr a cil qëmekei Iehova, nge pëkö hna traqa fë. 17 Ame la ahnahna hnei angatr hna isa traqa fë, ke troa ihmeku memine la etrune manathithi hnei angatr hna isa kapa qaathei Iehova Akötresi ö.
18 “Qa i ö troa acil la itre atre iameköti me itre ka elemeken, ngöne la itre tribu ne la itre traon asë hnei Iehova Akötresi ö hna hamë eö. Nge tro angatr a amekötine la nöj cememine la meköt. 19 Tha tro kö eö a aqaline la meköt, me ië hna hnim, me iameköti göi thupen, ke celë hi ka atimekën la atr ka inamacan, me atrian la itre trengewekë ne la atr ka meköt. 20 Tro hmekuje hi ö a xötrethenge la meköt, matre tro eö a mel, me hetrenyi la nöj hnei Iehova Akötresi ö hna hamë eö.
21 “Tha tro kö eö a acile la ketre sinöe, nyine ipoto ka hmitrötr ezine la ita ne huuj hnei ö hna troa kuca koi Iehova Akötresi ö.
22 “Tha tro kö eö a acil thatraqai ö la ketre ikapa ka hmitrötr. Ke celë hi hna methinën hnei Iehova Akötresi ö.