Deuteronomi

25 “Maine tro la itre atr a iwesitrë, qa i angatr troa tro qëmekene la itre atre iameköti. Nge tro hë angatr a jele mekötin la atr ka pë engazon, me jele ngazone la atr ka ngazo. 2 Maine troa lepe la atr ka ngazo, tro hë la atre iameköti a ameköle angeic e kuhu hnadro, nge tro ha lepi angeic qëmekene la atre iameköti. Troa lepi angeic thenge la ngazo hnei angeic hna kuca. 3 Tro hi a a 40 lao hna koi angeic, ngo tha tro kö a sasaith. Ke maine tro pala hi a lepe la trejin me eö, tro ha ahmahmanyi angeic qëmekei ö.

4 “Tha tro kö eö a hnöthe la që ne la kau, ngöne la ej a wajawaja la itre wene qitr.

5 “Maine kola ce mele la itre trejin, nge meci pi hi la ketre, ngo pëkö nekö i angeice trahmany, tha tro kö la föi angeic a faipoipo tröne la fami i angeic. Qanyine la sipu trejin me angeic troa faipoipo memine la föe cili, matre eatrën la hnëqa i nyidrë.* 6 Ame la pane nekö i eahlo, ke troa ati ëjene lo pane föi eahlo ka mec, matre tha tro kö a patre la ëje i angeic e Isaraela.

7 “Ngo maine xele kö nyidrë ma xome la föe ne la trejin me nyidrë ka mec, tro hë eahlo a tro troa wange la itre qatr ngöne la qëhnelö ne la traon, me hape: ‘Xele kö la trejin memine la föeng troa amë hutine la ëjene la föeng e Isaraela. Xele kö nyidrë ma eatrën la hnëqa i nyidrë.’ 8 E cili, tro la itre qatr ne la traon a hë nyidrë, me ewekë koi nyidrë. Nge maine xele pala hi nyidrë, nge öni nyidrë: ‘Xele ni ma faipoipo me eahlo,’ 9 haawe, tro hë la sine föe a easenyi nyidrë qëmekene la itre qatr, me una la ibutre i nyidrë, me hnyijuëne la iqëmeke i nyidrë, me hape: ‘Hane hi la nyine troa kuca kowe la atr ka xele ma nyi matrane* la trejin me angeic.’ 10 Thupene lai, tro ha ati ëjene la hnalapa* i nyidrë e Isaraela ka hape: ‘Hnalapa ne la atr hna uni ibutren.’

11 “Maine kola isi la lue trahmany, nge fetra pi hi la foe ne la ketre e nyidro troa xatuane la föi nyën, nge e tro nyën a lii im me ea la kahmitrötr ne la ketre, 12 tro hë eö a thupatrij la iwanakoimene lai föe. Nge tha tro kö eö a utipi nyën.

13 “Tha tro kö a hetreny ngöne la watrenge i ö la lue pengöne tulu,* ca ka hace me ca ka hmaloi. 14 Nge tha tro kö a hetrenyi thei ö la lue pengöne trengene* nyine tulu, ca ka tru me ca ka co. 15 Tro pala hi ö a hetrenyi la tulu ka nyipici me meköt, ketre tune fe kowe la trengen, tro pala hi ej a nyipici me meköt, matre tro eö a mel aqeany ngöne la nöj hnei Iehova Akötresi ö hna troa hamëne koi ö. 16 Ke methi Iehova Akötresi ö la nöjei atr ka tha meköti kö, nge ka kuca la ewekë cili.

17 “The thëthëhmine kö lo hnei Amaleka hna kuca koi ö, lo eö a tro qa Aigupito, 18 lo angeic a ixelë me eö e kuhu gojeny, me lepe lo itre ka huli hmitr, ngöne lo eö a kucakuca me pë trengecatr. Tha hnei angeice kö hna xoue Akötresie. 19 E ase hë Iehova Akötresi ö hamë eö la tingeting nyipine la itre ithupëjia me eö, ngöne la nöj hnei Iehova Akötresi ö hna troa hamën nyine edrö i ö, qa i ö troa apatrenyi Amaleka, matre tha tro hmaca kö a meku angeic e celë fen. Tha tro pi kö eö a thëthëhmine lai.