Esodro
1 Hane hi la itre ëjene la itre nekö i Isaraela ka ce lö me Iakobo a tro Aigupito, angatr me itre fami angatr: 2 Reubena, me Simeona, me Levi, me Iudra, 3 me Isakara, me Zebulona, me Beniamina, 4 me Dana, me Nafatali, me Gada, me Asera. 5 Nge ala 70 la itre matra i Iakobo. Ngo Iosefa ha e Aigupito. 6 Ame hna meci pi hnei Iosefa, me itre trejin me angeic, memine la xötr atre cili. 7 Nge kola hnaho me mana la angetre Isaraela*, matre ala nyimu catr angatr. Nge nyine haine la aqane mana i angatr me catr, matre ala nyimu catre hë angatr ngöne la nöj.
8 E thupen, hnene la ketre joxu ka thatre Iosefa hna nyiqaane mus e Aigupito. 9 Öni nyidrëti jë hi kowe la nöje i nyidrë: “Goeën, kökötre hë la angetre Isaraela, nge catre kö angatre hu së.
10 Tro sa thele inamacanën la aqane troa sewe angatr troa hnaho atrun, ke maine troa traqa elany la ketre isi, tro hë angatre lai a ce xöl memine la itre ithupëjia me easë, me lepi së, me trotrije la nöj.”
11 Matre hna acile hui angatre la itre tane huliwa ka ifolosa,* matre troa axösisi angatr hnene la itre huliwa ka hace. Angatr a xupe jë la itre traone ne ami ewekë i Farao, ene Pithoma me Ramese. 12 Ngacama kolo pala hi a folosane la angetre Isaraela, ngo kolo jë pe ka hape, mana catre jë angatr, matre angatr a haöthe asë la nöj. Nge itre atr a xoue angatr me methinë angatr. 13 Matre hnene la angetre Aigupito hna thahluëne catrëne la angetre Isaraela. 14 Kola akötrën la mele i angatr hnene la itre huliwa ka hace catr. Kola upi angatr troa kuci sima me birik, me kuca la itre huliwa ka hace ngöne la itre hlapa. Eje hi laka, ka iaxösisi la aqane hamën koi angatr la itre huliwa ne hlu.
15 E thupen, hnene la joxu ne Aigupito hna ithanata kowe la lue ka xomi upune, lue föe ne Heberu, ene Sifera me Pua. 16 Nyidrëti a upi nyidroti jë ka hape: “Ame la epon a xome la upune ne la itre föe ne heberu, goeëne ju la medreng, nge maine trahmany, humuthe pi, ngo maine jajiny, nue nyëne pi.” 17 Ngo hetre xouene la nyipi Akötresie thene la lue föe, matre tha trongëne kö nyidroti la hna amekötin hnene la joxu ne Aigupito. Hnei nyidroti kö hna nuamelene la itre nekönatre trahmany. 18 Matre e thupen, hnene la joxu ne Aigupito hna hëne la lue föe, me hape: “Hnauën la epon a nue troa mel la itre nekönatre trahmany?” 19 Matre önine lai lue föe ka hape: “Kolo ke tha ceitu kö la itre föe ne Heberu me itre föe ne Aigupito, ke itre föe ka egöcatr, matre traqa pë hë la ka xomi upune, nge mala ha la nekönatr.”
20 Qa ngöne lai, hnei Akötresie hna kuca la loi kowe la lue föe cili, nge kola mana me catre la nöj. 21 Nge pine laka, hnene la lue ka xomi upune hna xouene la nyipi Akötresie, ame hnei nyidrëti hna isa hamë nekö i nyidroti e thupen. 22 Ame hnei Farao hna qaja kowe la nöje i nyidrë ka hape: “Tro epuni a trije ngöne la hneopegejë Nil, la nöjei nekönatre trahmanyi hna troa hnahon hnei angetre Heberu, ngo nuamelene ju pë hë la itre jajiny.”