Salamo
Salamo i Dravita.
143 Iehova fe, pane drenge ju la thithing;
Drenge ju la xëweng.
Ngöne la nyipici me meköt i nyipë, sa jë koi ni.
2 The uti fë kö la hlue i nyipë ngöne la hnakootr,
Ke pëkö atr ka meköt qëmekei nyipë.
3 Kola huzu ni hnene la ithupëjia;
Angeic a akeinyi ni e kuhu hnadro me tro weji ni.*
Angeic a alapa ni ngöne la gaa melöhlem, tune la itre ka meci hë qaan ekö.
4 Kola ha pë trengecatreng;
Kola hace la hning.
5 Eni a mekun lo itre drai hnapan;
Eni a lapa mekune la nöjei ewekë hnei nyipëti hna kuca;
Eni a catre inine la itre huliwa ne la lue ime i nyipë.
6 Eni a saathe la lue imeng koi nyipë;
Tune la dro ka qaqacil nge ka aja tim, eni a aja nyipë. (Sela)
7 Iehova fe, canga sa jë koi ni;
Ke kola ha pë trengecatreng.
The nue ni kö,
Wanga tro jë ni a tune la itre ka uti koi Hua.
8 Loi e tro ni a dreng la ihnimi nyipici i nyipë e hmakany,
Ke eni a mejiune koi nyipë.
Amamai ni jë la gojeny nyine tro ni a trongën,
Ke eni a thele nyipë.
9 Iehova fe, amele ni jë qaathene la itre ithupëjiang.
Eni a thele troa zae thei nyipë.
10 Ini ni jë troa kuca la aja i nyipë,
Ke nyipëti la Akötresing.
Ka lolo la ua i nyipë;
Loi e tro ej a tro sai ni kowe la götran gaa meköt.
11 Iehova fe, pine la ëje i nyipë, thupëne kö la meleng.
Ngöne la meköt i nyipë, amele ni jë qa ngöne la akötr.
12 Ngöne la ihnimi nyipici i nyipë, apatrene* pi la itre ithupëjiang;
Humuth asë pi la itre ka lapaa akötrë ni,
Ke hlue i nyipëti ni.